Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 71

Taqomaki Jisu o Jiova

Taqomaki Jisu o Jiova

Era tiko ena tokalau kei Isireli o ira na nuitaka na veidusimaki ni kalokalo. Dua na bogi, eratou raica e vica na tagane mai na vanua qori e dua na ka e vaka na kalokalo ramase ni toso tiko e macawa, eratou muria sara. E dusimaki ratou na “kalokalo” qori i Jerusalemi. Eratou taroga: ‘I vei na gone ena nodra tui na Jiu? Keitou mai cuva vua.’

Ni rogoca o Eroti na tui Jerusalemi na itukutuku ni tui vou, dua na ka nona lomaleqa. E tarogi ira na iliuliu ni bete: ‘Ena sucu i vei na tui qo?’ Era tukuna vua: ‘Era kaya na parofita ni na sucu e Peceliema.’ E mani kacivi ratou na tagane mai na Tokalau qai tukuna: ‘Dou vaqara na gone qo e Peceliema. Dou lesu tale mai mo dou tukuna na vanua e tiko kina. Au via cuva tale ga vua.’ Ia e sega ni dina qori.

E toso tale na “kalokalo,” ratou muria sara na tagane me yaco i Peceliema. E tu vakadua na “kalokalo” donuya e dua na vale, ratou curu i loma. Ratou raici Jisu kei Meri na tinana. Eratou mani cuva vua na gone, ratou lolomataka vua na koula, drega boivinaka, kei na mura. Vakacava, e talai ratou mai na tagane qo o Jiova? Sega.

Ena bogi qori e tadra o Josefa, e kaya vua o Jiova: ‘E via vakamatei Jisu o Eroti. Kauta na watimu kei na luvemu tagane, dou dro i Ijipita. Dou tiko e kea me yacova niu kaya mo dou lesu.’ E mani lako o Josefa kei na nona vuvale i Ijipita.

A tukuna o Jiova vei ratou na tagane mai na Tokalau me ratou kua ni lesu vei Eroti. Dua na ka na cudru i Eroti, mani vakarota mera vakamatei kece na gone lalai era tabavata kei Jisu. Ia e taqomaki vinaka o Jisu ni tu vakayawa mai Ijipita.

Toso na gauna e qai mate o Eroti. E kaya  o Jiova vei Josefa: ‘O sa rawa ni lesu tale.’ Ratou mani lesu i Isireli o Josefa, Meri, kei Jisu, ratou lai vakaitikotiko ena koro o Nasareci.

“Ena vaka kina na noqu vosa e lako mai gusuqu . . . , ena yaco dina na ka au tala kina.”​—Aisea 55:11