Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 73

Vakarautaka na Sala o Joni

Vakarautaka na Sala o Joni

Ni tubucake o Joni na luvedrau o Sakaraia kei Ilisapeci, e yaco me dua na parofita. E vakayagataki koya o Jiova me vunautaka vei ira na lewenivanua ni sa vakarau basika na Mesaia. E sega ni vunau ena valenilotu se koro, e vunau ga ena vanua talasiga. E vakavulici ira na gole mai Jerusalemi kei na veivanua kece e Jutia. Era vulica mera kua ni cakava na ka ca ke ra via vakamarautaka na Kalou. Levu era veivutunitaka nodra ivalavala ca qai papitaisotaki ira o Joni ena uciwai na Joritani.

E dau bula rawarawa tu ga o Joni. Na nona isulu e caka mai na vuti ni kameli, e dau kania na vodre kei na denioni ni veikau. E levu era vaqaqa se o cei o Joni, era lako mada ga vua na Farisi kei na Setoki. E tukuna vei ira: ‘Ni veisautaka nomuni ivakarau, moni veivutuni. Ni kua ni nanuma ni oni sa dua na ka baleta oni kaya ni oni luvei Eparama. E sega ni kena ibalebale qori ni oni sa luve ni Kalou.’

Levu era lai tarogi Joni: ‘Na cava me keimami cakava me keimami vakamarautaka kina na Kalou?’ E tukuna vei ira na Jiu: ‘Ke rua tiko nomu kote, solia e dua vei koya e sega na nona.’ O kila na vuna e tukuna kina qori o Joni? E vinakata mera kila nona tisaipeli ni dodonu mera dau loloma ke ra via vakamarautaka na Kalou.

E tukuna o Joni vei ira na daukumuni ivakacavacava: ‘Moni  dau dina, ni kua ni lawakitaka e dua.’ E kaya vei ira na sotia: ‘Ni kua ni dau veivaqumi se lasu.’

Era lai tarogi Joni tale ga na bete kei na Livai: ‘O cei mada o iko? Keimami vinakata kece me keimami kila.’ E kaya o Joni: ‘O yau ga na domo ena vanua talasiga e tukuna o Aisea ni na dusimaki ira na tamata vei Jiova.’

E taleitaki na ka e vakavulica o Joni. Levu era nanuma ni o koya na Mesaia. Ia e tukuna vei ira: ‘E lako tiko mai e dua e uasivi sara. E sega ni ganiti au meu sereka na wa ni nona ivava. Au veipapitaisotaki ena wai, ia o koya qori e veipapitaisotaki ena yalo tabu.’

“E lako mai na tagane qo me ivakadinadina, me vakadinadinataki koya na rarama mera vakabauta na tamata kece ena vukuna.”​—Joni 1:7