Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 59

Va na Cauravou Talairawarawa

Va na Cauravou Talairawarawa

Ni kauti ira na turaga ni Juta o Nepukanesa i Papiloni, e lesia e dua na vakailesilesi ni valenitui o Asipinasi me raici ira tiko. E tukuna vei Asipinasi me raica mai eso na cauravou bulabula vinaka, era vuku tale ga. Era na vakavulici me tolu na yabaki, me vakarautaki ira mera veiqaravi e Papiloni. Era na vulica na cauravou na wilivola, volavola, kei na vosa vakaAkadini e Papiloni. Era na kania tale ga na kakana e dau kania na tui kei ira nona vakailesilesi. E va vei ira na cauravou qori, o Taniela, Enanaia, Misaeli, kei Asaraia. E vakayacani ratou o Asipinasi ena yaca vakaPapiloni, o Pelitisasari, Setareki, Mesake, kei Apeteniko. Vakacava ena tarova nodratou qaravi Jiova na veivakavulici qori?

 Eratou vakatulewataka na va na cauravou qo me ratou talairawarawa vei Jiova. Ratou kila ni tabu me ratou kania eso na kakana e dau kania na tui, ni tukuni ena Lawa ni dukadukali. Eratou mani kaya vei Asipinasi: ‘Yalovinaka, kua ni solia vei keitou na kena na tui.’ E kaya vei ratou o Asipinasi: ‘Ke dou sega ni kania qai raica na tui ni dou sega ni bulabula, ena vakamatei au!’

E qai tukuna o Taniela vua na ivakatawa: ‘Yalovinaka, solia ga vei keitou na kakana draudrau kei na wai me tini na siga. Oti qai raica na keitou irairai kei ira na cauravou era kania na kena na tui.’ E mani vakadonuya na ivakatawa.

Ni cava na tini na siga, e bulabula vinaka o Taniela kei ratou na nona itokani ni vakatauvatani kei ira na vo ni cauravou. E marau o Jiova ni ratou talairawarawa vua. E qai solia na vuku vei Taniela me kila na ibalebale ni raivotu kei na tadra.

Oti na veivakavulici, e kauti ratou na cauravou o Asipinasi vei Nepukanesa. Ni vosa vei ratou na tui, e raica ni ratou vuku, eratou yalomatua tale ga o Taniela, Enanaia, Misaeli, kei Asaraia vei ira na vo ni cauravou. E digitaki ratou me ratou veiqaravi ena nona vale. E dau tarogi ratou tale ga ena so na veika bibi. O Jiova e vakavukui ratou vakalevu, e lailai tale o ira na nona tamata vuku na tui kei ira na daucakaiba.

Eratou vulagi ena vanua qo o Taniela, Enanaia, Misaeli, kei Asaraia, ia eratou sega ni guilecava ni ratou qaravi Jiova. Vakacava, o na nanumi Jiova tiko ga ni rau yali nomu itubutubu?

“Me kua sara ni dua e beci iko ni o se cauravou. Ia mo ivakaraitaki vei ira na yalodina ena vosa, ena itovo, ena loloma, ena vakabauta, ena ivalavala savasava.”—1 Timoci 4:12