Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 60

Na Matanitu ena tu me Tawamudu

Na Matanitu ena tu me Tawamudu

E tadra ena dua na bogi o Tui Nepukanesa. E sega sara ga ni moce rawa ni lomaleqataka. E kacivi ira na daucakaiba, e tukuna vei ira: ‘Vakamacalataka mada noqu tadra.’ Era kaya: ‘Kemuni na tui, ni tukuna vei keimami na ka oni tadra.’ Ia e kaya vei ira o Nepukanesa: ‘Sega! Ni tukuna mai na noqu tadra, ke sega au na vakamatei kemuni.’ Era tukuna tale vua: ‘Ni tukuna mai nomuni tadra, keimami na qai vakamacalataka na kena ibalebale.’ E kaya o koya: ‘Oni via vakatovolei au. Tukuna mai na noqu tadra!’ Era tukuna vua na tui: ‘E sega ni dua ena cakava rawa qori. Sa rui dredre na ka oni kerea.’

E cudruvi ira vakalevu o Nepukanesa, mani vakarota mera vakamatei kece na tamata vuku. Qo e wili kina o Taniela, Setareki, Mesake, kei Apeteniko. A kerea o Taniela vua na tui me soli vua na gauna. E masu sara vei Jiova kei ratou na nona itokani me vukei ratou. Na cava e qai cakava o Jiova?

E vakaraitaka vei Taniela ena raivotu na tadra nei Nepukanesa kei na kena ibalebale. E lako sara vua na dauveiqaravi ni tui ena siga tarava, e kaya: ‘Kua ni vakamatei ira na tamata vuku. Au rawa ni vakamacalataka nona tadra na tui.’ E mani kauti Taniela na dauveiqaravi qori vei Nepukanesa. E kaya o Taniela vua na tui: ‘E vakaraitaka vei kemuni na Kalou na ka ena yaco ena gauna mai muri. Qo na nomuni tadra: Oni raica e dua na matakau levu e koula na uluna, na serena kei na ligana e siliva, na ketena kei na sagana e kopa, na temo ni yavana e kaukamea, kei na yavana sara e ra e veiwaki kina na kaukamea kei na qele. E qai kavida mai na ulunivanua e dua na vatu qai lauta na yava ni matakau. E vurumemeataka na matakau me vaka na pauta qai cagina yani.  E vuki na vatu me dua na ulunivanua levu me roboti vuravura.’

E kaya sara o Taniela: ‘Qo na ibalebale ni nomuni tadra: Na ulu koula e dusia na nomuni matanitu. Na siliva e dusia na matanitu ena taravi kemuni. Oti qori, ena veiliutaki na matanitu e vaka na kopa, ena lewa na vuravura taucoko. Na matanitu tarava ena kaukaua me vaka na kaukamea. Na iotioti ni matanitu ena tatawasewase, eso na tikina e kaukaua me vaka na kaukamea, eso e malumalumu me vaka na qele. Na vatu e vuki me ulunivanua, ya na Matanitu ni Kalou. Ena vurumemeataka na veimatanitu qori, ena tu ga me tawamudu.’

E tekicuva ina qele o Nepukanesa e mata i Taniela qai kaya: ‘E sega tale ni dua na Kalou e vaka na nomu Kalou, ni vakaraitaka vei iko na tadra qo.’ E sega gona ni vakamatei Taniela o Nepukanesa, e lesi koya ga me nodra iliuliu na tamata vuku, me liutaka tale ga na yasana o Papiloni. O raica rawa na sala e sauma kina o Jiova na masu nei Taniela?

“Eratou qai vakasoqoni ira ina vanua e vakatokai ena vosa vakaIperiu o Amaketoni.”—Vakatakila 16:16