Raica sara na lewena

Raica na lewenivola

 LESONI 12

Yaloqaqa na Vugoi Paula

Yaloqaqa na Vugoi Paula

Meda veitalanoataka mada e dua na cauravou a vakabulai nona momo. Na cauravou qori e vugoi Paula na yapositolo. Eda sega ni kila na yacana, eda kila ga ni yaloqaqa ena ka e cakava. O via kila na ka e yaco?—

A tu ena valeniveivesu e Jerusalemi o Paula. A vesu ni vunautaki Jisu. Era cati Paula eso, era mani nanuma mera nakicataki koya. Era kaya: ‘Meda kerea na turaganivalu mera kauti Paula i valeniveilewai na nona sotia. Eda na vuni tu ena yasa ni gaunisala. Ni tasivi o Paula, eda na vakamatei koya!’

Tukuna o vugoi Paula vei nona momo kei na turaganivalu na ka ca era nakita eso

A rogoca o vugoi Paula na ka ca era nakita eso. Cava ena cakava? A gole ina valeniveivesu me lai tukuna vei Paula. E tukuna sara o nona momo me lai tukutuku totolo vua na turaganivalu. Vakacava e rawarawa me lai vosa vua na turaganivalu na vugoi Paula?— Sega, baleta e kilai levu na turaganivalu. Ia e yaloqaqa na vugoi Paula me lai vosa vua.

E kila na turaganivalu na ka me cakava. A vakarautaka e dua na mataivalu era lewena e 500 na sotia mera taqomaki Paula! E tukuna vei ira mera kauti Paula i Sisaria ena bogi ga ya. Cava e qai yaco?— Era sega ni cakava rawa vei Paula e dua na ka na tamata ca! A seva nodra inaki ca.

Cava o vulica ena italanoa qo?— O rawa tale ga ni yaloqaqa me vakataki vugoi Paula. E bibi meda yaloqaqa nida tukuni Jiova vei ira eso tale. Vakacava o na yaloqaqa mo tukuni Jiova tiko ga?— Ke o cakava qori, o rawa ni vakabula e dua.