Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 11

Eratou Vola na Veika me Baleti Jisu

Eratou Vola na Veika me Baleti Jisu

O kilai ratou na tagane ena iyaloyalo?— Qori o Maciu, Marika, Luke, Joni, Pita, Jemesa, Juta, kei Paula. Eratou bula kece na tagane qori ena gauna i Jisu, eratou vola tale ga na veika me baleti koya. Meda raica mada eso na ka me baleti ratou.

Cava o kila me baleti ratou na tagane qo?

E tolu eratou yapositolo, ratou dau vunau kei Jisu O kilai ratou?— O Maciu, Joni, kei Pita. Erau kilai Jisu vinaka na yapositolo o Maciu kei Joni rau qai vola e  yadua na ivola me baleta na bula i Jisu. A vola tale ga na yapositolo o Joni na Vakatakila, na iMatai ni Joni, iKarua ni Joni, kei na iKatolu ni Joni. Na yapositolo o Pita a vola e rua na ivola ena iVolatabu, na iMatai kei na iKarua ni Pita. Ena ikarua ni nona ivola, a vakamacalataka kina nona tukuna mai lomalagi o Jiova me baleti Jisu: ‘Qo na luvequ. Au dau lomana, au sakitaka tale ga.’

Eso tale na tagane ena iyaloyalo eratou vakamacalataki Jisu tale ga ena nodratou ivola. Dua o Marika, a rairai tiko ena gauna a vesu kina o Jisu qai raica na ka kece e yaco. Dua tale na vuniwai o Luke, e rairai qai lotu vaKarisito ni sa mate o Jisu.

E rua tale na dauvola iVolatabu o raica ena iyaloyalo erau taci Jisu. O kilai rau?— O Jemesa kei Juta. Erau sega ni vakabauti Jisu e liu. Erau nanuma mada ga ni lialia. Ia rau qai vakabauti Jisu e muri, rau mai lotu vaKarisito sara.

Na iotioti ni dauvola iVolatabu o raica ena iyaloyalo o Paula. A yacana tu e liu o Saula ni bera ni veisau me lotu vaKarisito. E dau cati ira na lotu vaKarisito qai ca nona itovo vei ira. O kila na vuna e via lotu vaKarisito kina o Paula?— Ni gole tiko e gaunisala ena dua na siga, a rogoca ni vosa vua e dua mai lomalagi. Qori na domoi Jisu! A tarogi Paula: ‘Cava e ca kina nomu itovo vei ira era vakabauti au?’ Oti ga na ka e yaco ya, a tavuki sara me lotu vaKarisito. A qai vola e 14 na ivola ena iVolatabu, mai na Roma ina Iperiu.

Eda wilika e veisiga na iVolatabu.— Nida wilika na iVolatabu, eda vulica kina e levu na ka me baleti Jisu. O via vulica e levu tale na ka me baleti Jisu?—