Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 5

Cakava Tiko ga na ka Dodonu o Samuela

Cakava Tiko ga na ka Dodonu o Samuela

Se gone sara o Samuela sa lai vakaitikotiko qai veiqaravi ena valeniveitavaki, na vanua e sokaloutaki kina o Jiova. O kila se lai tu vakacava ena valeniveitavaki o Samuela? Meda veivosakitaki Ana mada e liu, na tinai Samuela.

Dua na gauna balavu nona vinakata voli o Ana me vakaluveni, ia e sega ni rawa. A mani masu qai kerei Jiova me vukei koya. Ke dua na luvena tagane, a yalataka o Ana ni na kauti koya me lai vakaitikotiko qai veiqaravi ena valeniveitavaki. A sauma o Jiova nona masu, mani dua na luvena tagane qai vakayacana me o Samuela. Ni se qai yabaki tolu se va o Samuela, a kauti koya o Ana me lai veiqaravi ena valeniveitavaki ni Kalou me vaka ga e yalataka.

A bete levu tiko ena valeniveitavaki o Ilai, erau veiqaravi tale ga kina vakabete na luvena tagane. Nanuma tiko na valeniveitavaki e sokaloutaki kina na Kalou, e dodonu me caka kina na veika vinaka. Ia erau cakava na luvei Ilai na veika ca qai raica tu qori o Samuela. Vakacava e cakava tale ga na veika ca me vakataki rau na luvei Ilai?— Sega, e cakava tiko ga na ka dodonu o Samuela me vaka erau vakavulici koya kina nona itubutubu.

Na cava o nanuma me cakava o Ilai vei rau na luvena?— A dodonu me totogitaki rau, me vakacegui rau tale ga ena nodrau veiqaravi ena vale ni Kalou. Ni sega ni cakava ya o Ilai, a cudruvi ratou vakaveitamani o Jiova, e totogitaki ratou tale ga.

A tukuna vei Ilai o Samuela na vosa i Jiova

Ni moce toka ena dua na bogi o Samuela, e rogoca ni kacivi koya e dua: ‘Samuela!’ A cici vei Ilai, ia e kaya o Ilai: ‘Au sega ni kacivi iko.’ A yaco vakarua tale qori. Ena ikatolu ni gauna sa qai tukuna vei Samuela o Ilai, ke rogoca tale na domo, me tukuna: ‘Yalovinaka, ni vosa mai Jiova, au sa vakarorogo tu.’ Qori sara ga na ka e cakava o Samuela. A qai  kaya vei Samuela o Jiova: ‘Tukuna vei Ilai niu na totogitaka nona vuvale ena veika ca eratou cakava.’ O nanuma ni rawarawa me lai tukuna qori o Samuela vei Ilai?— Sega. A rere tale ga o Samuela, ia e cakava na ka e tukuna vua o Jiova. A yaco dina na vosa i Jiova, e qai mate o Ilai kei rau na luvena.

E ivakaraitaki vinaka vei keda o Samuela. A raica nodra caka ca eso tale, ia e cakava na ka dodonu. Vakacava o iko? O na vakataki Samuela mo cakava tiko ga na ka dodonu? Ke o cakava qori, ena marau o Jiova kei rau nomu itubutubu.

WILIKA ENA NOMU IVOLATABU