Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 7

O Bau Galili Qai Rere?

O Bau Galili Qai Rere?

Raica mada na gonetagane ena iyaloyalo. E vaka me galili qai rere, se vakacava? Sa bau yaco vei iko ya?— Qori na ka e yacovi keda kece ena so na gauna. Era cavuti ena iVolatabu eso na itokani i Jiova era galili, era rere tale ga. Dua vei ira o Ilaija. Meda raica mada eso na ka me baleti koya.

Via vakamatei Ilaija o Jesepeli

Se bera sara ni sucu o Jisu, sa tiko voli e Isireli o Ilaija. Na tui Isireli o Eapi e sega ni qarava na Kalou dina o Jiova, rau qarava kei na watina o Jesepeli na kalou lasu o Peali. E levu gona na lewe i Isireli era sa sokalou vei Peali. E ranadi ca o Jesepeli qai via vakamatei ira kece na sokalou vei Jiova, wili kina o Ilaija! O kila na ka e cakava o Ilaija?—

A dro sara vakayawa ina vanua talasiga, a lai vuni tu ena dua na qaravatu.  Cava e cakava kina ya?— Io, a rere o Ilaija. Ia e sega ni dodonu me rere. Baleta? A kila ni rawa ni vukei koya o Jiova. Sa vakaraitaka oti vei Ilaija o Jiova na nona kaukaua. Dua na gauna a lutu mai lomalagi na bukawaqa me sauma kina o Jiova na masu i Ilaija. Kena ibalebale e rawa ni vukei Ilaija tale o Jiova!

A vukei Ilaija vakacava o Jiova?

Ni tiko voli ena qaravatu o Ilaija, a vosa vua o Jiova qai taroga: ‘Cava o cakava tiko eke?’ E sauma o Ilaija: ‘O yau ga na nomuni dauveiqaravi sa vo. Sa vo sara ga o yau, au rere tale ga niu na vakamatei.’ A nanuma o Ilaija nira sa vakamatei kece na dauveiqaravi i Jiova. Ia e tukuna vei Ilaija o Jiova: ‘E sega ni dina qori. Era se tiko e 7,000 na noqu dauveiqaravi. Mo yaloqaqa. Se levu tu na cakacaka au vinakata mo cakava!’ Vakacava e marau o Ilaija ni rogoca ya?—

Cava o vulica vei Ilaija?— Sega ni dodonu mo galili se rere. Era tu na nomu itokani era lomani Jiova, era lomani iko tale ga. E tu vei Jiova na kaukaua levu, ena vukei iko tiko ga! Vakacava o marau ni o kila ni na tokoni iko tiko ga o Jiova?—

WILIKA ENA NOMU IVOLATABU