Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iTinitini

iTinitini

‘Moni vakadamurimuri ira era taukena na vosa ni yalayala ni Kalou ena vuku ni nodra vakabauta kei na yalovosota.’—IPERIU 6:12.

1, 2. Na cava e bibi kina ena gauna qo meda vaqaqacotaka noda vakabauta? Vakatauvatana.

NA VAKABAUTA e dua dina na vosa dokai ni vakaibalebaletaka e dua na itovo talei. Nida rogoca ga eda vakasamataka sara na vosa: “Totolo se bibi!” Ke sega vei keda na vakabauta, meda qara totolo. Ke sa tiko vei keda, e bibi meda taqomaka qai vaqaqacotaka tiko ga. Na cava na vuna?

2 Kaya mada ke o taubale tiko ena vanua dravuisiga vakaitamera. Dua na ka nomu karamaca. Ni o kunea na wai, o na taqomaka sara ga mai na katakata ni siga. Ena vinakati mo tawana tale eso me rawa ni tauri iko tiko me yacova ni o yaco ina vanua o lako tiko kina. Nikua, eda bula tiko ena vanua dravuisiga vakayalo, na vuravura e kunekunei dredre kina na vakabauta dina—vaka ga na wai ya—ena totolo na kena maca ke sega ni taqomaki se tawani tale. Sa qai gadrevi ga vakalevu ena gauna qo na vakabauta. Nida gadreva na wai meda bula, eda na kaukaua ga vakayalo ke tiko vei keda na vakabauta.—Roma 1:17.

3. Na cava e vakarautaka o Jiova meda bucina kina na vakabauta, na cava e rua na ka meda nanuma?

3 E kila o Jiova nida gadreva dina na vakabauta, e kila tale ga ni ka ni sasaga nikua meda bucina qai taqomaka tiko ga. Sa rauta me vakarautaka mai kina eso na ivakaraitaki meda vakadamurimuria. O Jiova e uqeta na yapositolo o Paula me vola: ‘Moni vakadamurimuri ira era taukena na vosa ni yalayala ni Kalou ena vuku ni nodra vakabauta kei na yalovosota.’ (Iper. 6:12) Qori na vuna e uqeti keda kina na isoqosoqo i Jiova meda gumatua ni vakadamurimuria na nodra ivakaraitaki na tagane kei na yalewa yalodina eda sa dikeva mai. Na cava meda cakava qo? Meda nanuma tiko e rua na ka: (1) Meda vaqaqacotaka tiko ga na noda vakabauta; (2) me dei tiko ga vei keda na noda inuinui.

4. Sala cava e meca kina ni vakabauta o Setani, na cava meda kua kina ni yalolailai?

4 Vaqaqacotaka tiko ga nomu vakabauta. O Setani na meca levu ni vakabauta. Ni iliuliu ni vuravura qo, sa veisautaka na veika vakavuravura nikua me vaka na vanua dravuisiga, e dredre ni dei kina na vakabauta. E kaukaua cake vei keda. Vakacava, meda yalolailai ni bucina da qai vaqaqacotaka noda vakabauta? Kua vakadua! O Jiova e nodra itokani vinaka kece o ira na vakabauta dina. E vakadeitaka nida na rawa ni vorata na Tevoro, e rawa sara mada ga ni cemuria tani ni tiko kei keda o koya! (Jeme. 4:7) Eda na vorati koya  nida vaqaqacotaka tiko ga e veisiga na noda vakabauta. Ena sala cava?

5. Era mai vakabauta vakacava na tagane kei na yalewa yalodina ena gauna vakaivolatabu? Vakamacalataka.

5 Eda sa dikeva oti nira sega ni sucu kaya mai na vakabauta na tagane kei na yalewa yalodina ena gauna vakaivolatabu. Era vakadinadinataka ni vakabauta e dua na itovo e umani ena vua ni yalo tabu i Jiova. (Kala. 5:22, 23) Era masuta na nona veivuke, qai vaqaqacotaka tiko ga nodra vakabauta o Jiova. Meda cakava tale ga qori. Kua ni guilecava vakadua ni yalorawarawa o Jiova me solia nona yalo tabu vei ira ga era kerea ra qai cakacakataka. (Luke 11:13) Vakacava, e tiko tale eso na ka meda cakava?

6. Ena yaga vakacava vei keda na ka eda vulica ena iVolatabu?

6 Eda sa veivosakitaka mai ena ivola qo e vica ga na ivakaraitaki vakasakiti ni vakabauta. Ia e levu tale tu! (Wilika Iperiu 11:32.) Eda rawa ni vuli vakalevu vei ira ke da vakasamataka vakatitobu nodra ivakaraitaki qai masulaka. Ke da wilika tu ga vakatotolo na kedra italanoa na tamata vakabauta ena iVolatabu, ena sega ni dei na noda vakabauta. Me yaga vei keda na ka eda wilika, e vinakati meda vakadikeva vinaka na veitikina yavolita kei na ituvaki e yaco ena gauna ya. Ke da vakasamataka nira sega ni uasivi o ira qo, era qai “vakataki keda” ga, ena yaga dina vei keda na nodra ivakaraitaki. (Jeme. 5:17) Eda na kauai qai rawa ni raitayaloyalotaka na veika era vakila nira sotava na ituvaki dredre eda sotava tale ga nikua.

7-9. (a) Na cava era na rairai cakava eso na tagane kei na yalewa vakabauta ena gauna vakaivolatabu ke tukuni mera sokaloutaki Jiova ena ivakarau eda cakava nikua? (b) Na cava meda vaqaqacotaka kina noda vakabauta nida cakacakataka?

7 Ena vaqaqacotaka tale ga noda vakabauta na veika eda cakava. Meda nanuma tiko ‘ena mate na vakabauta ni sega ni cakacakataki.’ (Jeme. 2:26) Wacava nodra marau na tagane kei na yalewa eda sa dikeva mai ke lesi vei ira na cakacaka e vakarota vei keda nikua o Jiova meda cakava!

8 Kena ivakaraitaki, vakacava ke tukuni vei Eparama me maliwai ira na sokaloutaki Jiova ena Vale ni Soqoni tara vakamaqosa, ena soqo cokovata, na vanua e veivosakitaki kina vakamatailalai na vosa ni yalayala e raica “vakayawa tu” mai, sega ena icabocabonisoro vatu ena vanua talasiga? (Wilika Iperiu 11:13.) Vakacava ke tukuni vei Ilaija ni nona cakacaka e okati kina nodra sikovi na lewenivanua qai vakasavui vei ira na itukutuku ni vakacegu kei na inuinui, sega ni itukutuku ni nodra totogitaki na parofita ca i Peali ni saga tiko me qaravi Jiova ena gauna ni nona veiliutaki na tui vukitani? Era na sega tale ni wawa na tagane kei na yalewa vakabauta qori mera qaravi Jiova vakataki keda ga nikua.

 9 Meda vaqaqacotaka tiko ga noda vakabauta nida cakacakataka. Nida cakava qori eda sa muria sara tiko ga na nodra ivakaraitaki na tagane kei na yalewa vakabauta e tukuni ena Vosa uqeti ni Kalou. Me vaka ga e vakamacalataki ena iKau, eda na veitokani veivolekati sara kei ira. Sa vakarau yaco dina na veitokani veivolekati qori.

10. Na cava eda na marautaka ena Parataisi?

10 Me dei tiko ga nomu inuinui. E dau vakayaloqaqataki ira na tagane kei na yalewa vakabauta na inuinui e solia vei ira na Kalou. Vakacava o iko? Kena ivakaraitaki, vakasamataka na marau o na vakila ni o sotavi ira na dauveiqaravi yalodina ni Kalou ni ra sa “vakaturi . . . na yalododonu.” (Wilika Cakacaka 24:15.) Na cava o na taroga vei ira?

11, 12. Ena vuravura vou na cava o na rairai taroga vei (a) Epeli? (b) Noa? (c) Eparama? (d) Ruci? (e) Apikali? (f) Esiteri?

11 Ni drau sota kei Epeli, o na via kila na veika me baleti rau na nona itubutubu? De dua o na taroga: “O bau vosa ina jerupi e yadrava tu na sala ina were o Iteni? E bau vosa mai?” Vakacava o Noa? De dua o na taroga: “O bau rerevaki ira na Nefilimi? O qaravi ira vakacava na manumanu kece ena loma ni waqa ena yabaki ya?” Ni o sotavi Eparama de dua o na taroga: “O bau veitaratara kei Semi? O kilai Jiova vakacava? Vakacava, bau dredre na biubiu mai Uri?”

12 Vakasamataka tale ga eso na taro o na taroga vei ira na yalewa yalodina era vakaturi. “Ruci, na cava e uqeti iko mo qaravi Jiova kina?” “Apikali, o bau rere ni tukuna vei Nepali na sala o vukei Tevita kina?” “Esiteri, na cava drau qai cakava kei Moatekai ni sa cava na italanoa ena iVolatabu?”

13. (a) Na cava era na rairai taroga na vakaturi? (b) O raica vakacava na gauna o na sotavi ira kina na tagane kei na yalewa yalodina ena gauna vakaivolatabu?

13 Sa macala tu ga ni levu na taro era na taroga vei iko na tagane kei na yalewa yalodina qori. Ena marautaki mo tukuna vei ira na iotioti ni veisiga kei na sala e vakalougatataki ira kina nona tamata o Jiova ena veigauna dredre! Ena tarai ira sara ga nira kila ni vakayacora dina o Jiova na nona vosa ni yalayala kece. Ena gauna qori, ena sega ni gadrevi meda raitayaloyalotaki ira tale na dauveiqaravi yalodina ni Kalou era tukuni tu ena iVolatabu. Eda sa na bula vata tu ena Parataisi! Tomana tiko ga na veika o rawa ni cakava ena gauna qo me rawa ni o sotavi ira. Vakadamurimuria tiko ga na nodra vakabauta. Mo marautaka mada ga nomu qaravi Jiova kei ira na nomu itokani qo me tawamudu!