Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iVola Mai na iLawalawa Dauvakatulewa

iVola Mai na iLawalawa Dauvakatulewa

Ra Veitacini:

Eda raica ena imatai ni tabataba ni Vale ni Vakatawa ni 1 Janueri, 2008, na isevu ni ulutaga e vakatokai “Vakadamurimuria Nodra Vakabauta.” Tekivu mai na gauna qori, eda marau ni sa dau tabaki e dua na ulutaga vou ena veiyatolu na vula!

Na cava era kaya na dauwiliwili? Ni wilika oti na italanoa kei Marica, e kaya e dua: “Au dredre sara ga niu wilika, qori na ka sara ga au dau cakava. Au dau ogaoga na vakarautaka na veika vinaka vei ira noqu vulagi, so na gauna au guilecava ni gadrevi meu cegu qai marautaka neimami veimaliwai.” E kaya e dua na itabagone ni wilika oti na italanoa kei Esiteri: “E rawa nida bobula ena isulusulu kei na kena iculacula vou. E dodonu ga me rakorako noda isulusulu ia me kua ni sivia tale. E kauaitaka ga na lomada o Jiova.” Qo na ka e tukuna e dua na tacida yalewa me baleta na kena italanoa na yapositolo o Pita: “E tarai au sara ga na ka au wilika. E vaka sara ga au tu kina! Au raica, au rogoca sara ga na veika e talanoataki tiko.”

Era vakavinavinakataka mai na dauwiliwili qo kei na levu tale na veiulutaga sa tabaki oti qori. Era vakadeitaka kina na veika e vola makawa tu na yapositolo o Paula: “Na ka kece e volai e liu e volai meda vakavulici kina.” (Roma 15:4) E vakarautaka gona ena iVolatabu o Jiova na kedra itukutuku na tamata yalodina qo meda vuli kina. Se mani vakacava na balavu ni gauna eda tu kina ena dina, e yaga taucoko vei keda na nodra ivakaraitaki.

Keitou uqeti kemuni moni wilika na ivola qo ena gauna ga oni taura kina. Ni vakayagataka tale ga ena nomuni Sokalou Vakavuvale, era na marautaka na gone! Ni vulici ena Vuli iVolatabu ni iVavakoso, saga mo kua sara ni calata e dua na gauna ni vuli! Wilika vakamalua qai vakasamataka vakatitobu. Raitayaloyalotaka na ka o wilika, mo vakila sara ga. Biuti iko ena kedra ituvaki, mo raica sara ga na ka era raica. Vakatauvatana na veika era cakava ena dua na ituvaki kei na ka o na rairai cakava ena ituvaki ya.

E ka ni marau dina me keitou vakarautaka yani na ivola qo. Me yaga mada ga vei kemuni kei na nomuni vuvale. Loloma vaKarisito kei na vakanuinui vinaka,

iLawalawa Dauvakatulewa ni iVakadinadina i Jiova