Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Kena iKau

Kena iKau

Vei Kemuni na Dauwiliwili:

Vakacava, o vakila ni o volekati koya na Kalou? Levu era vakabauta ni sega ni rawa. So era kaya ni sa rui yawaki keda o koya; so tale era kaya ni sega ni ganiti ira mera toro voleka vua, nira sa rui dukadukali. Ia, e uqeti keda na iVolatabu: ‘Toro voleka yani vua na Kalou, ena qai toro voleka mai vei iko o koya.’ (Jemesa 4:8) E vakacegui ira sara mada ga na qaravi koya ena nona kaya: “Sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.”​—Aisea 41:13.

Na cava meda cakava meda veivolekati kina kei na Kalou? Na veitokani kece ga e yavutaki ena veikilai vinaka, na kilai ni nona itovo o koya kadua, kei na veika e dau divi kina. O koya gona, e rawa nida vulica mai na iVolatabu na itovo e so ni Kalou, kei na kena idivi. Nida vakasamataka na itovo i Jiova se ka e divi kina, da vakasamataka tale ga na nona ucui koya vinaka sara ga o Jisu Karisito, sa na qai rawa nida siqema na sala meda vakatotomuri rau kina. Eda na raica ni o Jiova e Turaga Sau dina ga ni lomalagi kei na vuravura qai Tamada vinaka duadua. E Kalou kaukaua, lewadodonu, vuku, dauloloma, qai sega vakadua ni biuti ira na luvena yalodina.

Me vukei iko mada ga na ivola oqo mo toro voleka yani kina vua na Kalou o Jiova, mo qai vaqaqacotaka nomudrau veiwekani, mo rawa kina ni bula tu ga, mo qai vakacaucautaki koya me tawamudu.

O Iratou na Tabaka na iVola Oqo