Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 31

‘Toro Voleka Yani Vua na Kalou, ena Qai Toro Voleka Mai Vei Iko o Koya’

‘Toro Voleka Yani Vua na Kalou, ena Qai Toro Voleka Mai Vei Iko o Koya’

1-3. (a) Na cava eda kila rawa me baleti keda na tamata nida dikeva na veimaliwai ni itubutubu kei na luvena? (b) Na cava e dau cakava e dua ni lomani? Na taro bibi cava meda dui tarogi keda kina?

ERA dau vinakata na itubutubu mera raica ni matadredredre na luvedra se qai sucu. Era dau kabira yani na ucudra ina ucui gone dramidrami ena nodra vakamenemenea, era matadredredre vua. Era vinakata me laurai tale ga mai vei gone na marau. Sega ni dede, sa ra raica ni sa yavala vakamalua na gusu i gone kei na baluna ena nona sa matadredredre. Na matadredredre lailai oqo e ivakaraitaki ni nona marau, e idole ni loloma e vakila vei rau nona itubutubu.

2 Nona matadredredre na gone oqo eda liaca lesu kina e dua na ka bibi me baleti keda na tamata. Eda dau vakaraitaka lesu na loloma vei ira era lomani keda. Eda a buli ga me vaka oya. (Same 22:9) Nida tubu cake, e tubu cake tale ga na ivakatagedegede ni noda vakaraitaka na loloma. De dua o se nanuma nodrau dau lomani iko nomu itubutubu, ira na wekamu, kei ira nomu itokani ni o se gone. E tara na lomamu na nodra loloma, e uqeti iko tale ga. O sa qai dau dolea lesu na nodra loloma. Vakacava, o vakayacora tale tiko ga oqo ena nomudrau veiwekani kei na Kalou o Jiova?

3 E kaya na iVolatabu: “Eda sa lomani koya, e na vuku ni sa taumada na nona loloma vei keda.” (1 Joni 4:19) O sa na raica mai na iWasewase 1 me yaco ina 3 ni dau vakayagataka vakayalololoma o Jiova nona kaukaua, nona lewadodonu, kei na nona vuku ena sala mo vinaka kina. Ena Wasewase 4, o raica kina na nona lomana na kawatamata—nona lomani iko sara mada ga. Ia, oqo e dua na taro. De dua e taro bibi duadua  sara ga o rawa ni tarogi iko kina: ‘Au na dolea vakacava na loloma i Jiova?’

Meda Lomana na Kalou, na Cava na Kena iBalebale

4. Sa ra veilecayaki tu vakacava e levu nikua ena sala mera lomana kina na Kalou?

4 E kila vinaka o Jiova, o koya na Vatuka ni loloma, ni loloma e rawa ni vakavotuya mai na nodra ivalavala vinaka na tani. O koya gona, e dina nira sega ga ni via rogoci koya na tamata talaidredre, e kila o koya ni na tiko e so era na dolea na nona loloma. Ia e dina, e vica vata na milioni era sa vakayacora oqo. Ia, e ka ni rarawa ni levu nikua era sa veilecayaki tu ena vukudra na veilotu ni vuravura oqo, sa ra sega ni kila tu kina se mera lomani koya vakacava na Kalou. Era kaya e levu nira lomana na Kalou, ia era nanuma ni loloma oqo e cavuti ga e gusu. E rawa ni vaka oya na kena itekitekivu, me vaka na loloma ni gonedramidrami vua na nona itubutubu, ni tekivu ga ena nona matadredredre. Ia, vei ira era qase cake, na loloma oqo e okati kina e levu tale na ka.

5. E vakamacalataka vakacava na iVolatabu na ibalebale ni noda lomana na Kalou? Na cava me uqeti keda kina na ivakamacala oqo?

5 E vakamatatataka o Jiova na sala meda lomani koya kina. E kaya na Nona Vosa: “Ni sai koya oqo na loloma vua na Kalou, me da muria na nona vunau.” Na loloma gona vua na Kalou e vakaraitaki ena ka e caka sara ga. E levu era sega ni taleitaka mera muria na ivunau ni Kalou. Ia e tomana na tikinivolatabu oqo: “A sa sega ni ka bibi na nona vunau.” (1 Joni 5:3) E vakarautaki na vunau kei na ivakavuvuli i Jiova meda vinaka kina, e sega ni kena inaki meda rarawa kina. (Aisea 48:17, 18) Na Vosa ni Kalou e vutucoqa ena ivakavuvuli ena vukei keda meda toro voleka vua. Ena sala cava? Meda dikeva mada oqo e tolu na basoga ni noda veiwekani kei na Kalou. Oqo e okati kina noda veitaratara, veiqaravi, kei na noda vakatotomuri koya.

 Nona Veitaratara kei Keda o Jiova

6-8. (a) Sala cava eda na vakarorogo kina vei Jiova? (b) Na cava meda cakava me bula kina na Vosa ni Kalou nida wilika?

6 A tekivu na Wase 1 ena taro, “Rawa beka ni drau veitalanoa sara ga kei na Kalou?” Eda a raica ni sega ni taro wale oya. Baleta oqo na ka a sotava o Mosese. Vakacava o keda? Sa oti na gauna a dau tala mai kina nona agilosi o Jiova me veitaratara kei na tamata. Ia, e tiko na sala vakasakiti e veitaratara kina kei keda o Jiova ena gauna oqo. Ia, eda na rogoci koya vakacava?

7 E “vakavuna [na Kalou] nai Vola Tabu kecega,” o koya gona, eda rogoci Jiova ena noda wilika nona Vosa, na iVolatabu. (2 Timoci 3:16) Oya na vuna e vakauqeti ira kina na tamata i Jiova na daunisame mera wilika na iVolatabu “e na siga kei na bogi.” (Same 1:1, 2) Oqo ena gadrevi kina vakalevu vei keda na sasaga. Ia, na sasaga vinaka vaka oqo ena vakaicovitaki. Me vaka eda raica mai ena Wase 18, na iVolatabu e nona ivola na Tamada vakalomalagi vei keda. Meda kua gona ni wilika wale ga me rawa. Meda saga me bula na Vosa ni Kalou ena gauna eda wilika kina. Eda na cakava vakacava oqo?

8 Raivakatayaloyalotaka na ka o wilika ena iVolatabu. Me vaka o raici ira sara tiko ga na tamata o wilika na kedra itukutuku. Saga mo kila na veika lalai e so me baleti ira, kedra ituvaki, kei na nodra inaki. Qai vakasamataka vakatitobu na ka o wilika, tarogi iko ena so na taro vaka beka oqo: ‘Na cava au vulica ena itukutuku oqo me baleti Jiova? Na nona itovo cava e vakamacalataki tiko i ke? Na ivakavuvuli cava e vinakata tiko i ke o Jiova meu kila, na sala cava au na bulataka kina?’ Wilika, vakananuma, bulataka sara—ni o cakava oqo, ena bula na Vosa ni Kalou.—Same 77:12; Jemesa 1:23-25.

9. O cei na “dauveiqaravi yalo dina ka vuku,” kei na cava meda rogoci koya vinaka kina na “dauveiqaravi” oya?

9 E vosa tale ga mai vei keda o Jiova ena nona vakayagataka na “dauveiqaravi yalo dina ka vuku.” Me vaka a parofisaitaka o Jisu, sa digitaki e vica na tagane lotu Vakarisito lumuti mera vakaitavi ena kena vakarautaki mai ena gauna dredre oqo,  na “kakana [vakayalo] e na kena gauna dodonu.” (Maciu 24:45-47, VV) Nida wilika na ivola e vakarautaki meda kila kina na ka dina mai na iVolatabu, nida tiko tale ga ena soqoni vakarisito kei na soqo cokovata, eda sa kania tiko na kakana e vakarautaka na dauveiqaravi oya. Oqo na dauveiqaravi i Jiova, oya na vuna eda rogoca kina na vosa i Jisu: “Ni qarauni kemudou kina e na i tovo ni nomuni rogoca.” (Luke 8:18, VV) Eda vakarorogo vinaka nida kila ni vakayagataka tiko o Jiova na dauveiqaravi yalodina me veitaratara mai kina kei keda.

10-12. (a) Cava eda kaya kina ni dua na isolisoli vinaka i Jiova na masu? (b) E rawa vakacava ni vakamarautaki Jiova noda masu? Na cava eda nuidei kina ni na taleitaka noda masu?

10 Ia, vakacava na noda veitaratara kei na Kalou? Rawa beka nida vosa vei Jiova? E vakasama vakatubuqoroqoro dina oqo. Ena rawa beka mo vosa vua na iliuliu levu duadua ena nomu vanua mo vakaraitaka vua na lomamu? E so e rawa ni yaco vei ira na leqa ke ra tovolea mada ga! Ena gauna i Esiteri kei Moatekai, e rawa ni vakamatei e dua ke sega ni sureti qai via lai raici koya na Tui Perisia. (Esiteri 4:10, 11) Ia, qai vakasamataka mo torovi koya na Turaga Sau ni lomalagi kei vuravura! O koya “sa vaka na vodre” na tamata e matana. (Aisea 40:22) Meda domobula beka, meda rere ni torovi koya? Me kua sara!

11 E vakarawarawataka o Jiova noda torovi koya, e vakarautaka tale ga e dua na sala rawarawa sara—na masu. O ira mada ga na gone e rawa nira torovi Jiova ena vakabauta, ena nodra masu ena yaca i Jisu. (Joni 14:6; Iperiu 11:6) Ia, e rawa tale ga nida talaucaka na lomada ena masu—okati e ke na veika e dau dredre sara mada ga meda tukuna. (Roma 8:26) Ena sega ni yaga ke da nanuma meda vakadrukai Jiova ena noda cavuta e so na vosa bibi beka qai vakaturaga, se meda masu sara tu vakabalavu. (Maciu 6:7, 8) Ena yasana kadua, e vakatau ga vei keda na balavu ni noda masu, kei na levu ni gauna eda masu kina. E uqeti keda mada ga na Nona Vosa meda “masu tikoga ka kua ni mudu.”—1 Cesalonaika 5:17.

12 Kua ni guilecava ni o Jiova duadua ga e “Daurogoca na  masu,” e dau kauaitaka tale ga. (Same 65:2) Sa dau ka ni vosota tu beka ga vua na nona rogoca na nodra masu na nona tamata? Sega, e ka ni marau vua na nona rogo masu. Na Nona Vosa e vakatauvatana na nodra masu na nona tamata kei na ka boi vinaka. E dau kama qai teteva yani na vanua na kena iboi totoka. (Same 141:2; Vakatakila 5:8; 8:4) Sega li ni veivakacegui meda kila ni noda masu e vakamarautaki koya na Turaga Sau ni vaka na ka boi vinaka e cagina yani? Ke o vinakata gona mo toro voleka vei Jiova, dau masu vakawasoma vua ena yalomalumalumu, e veisiga. Talaucaka vua na lomamu; kua ni vakavoca e dua na ka. (Same 62:8) Vakaraitaka vua na Tamamu vakalomalagi na nomu leqa, nomu marau, nomu vakavinavinaka, kei na nomu veivakacaucautaki. Sa na qai rawa ni qaqaco ga na nomudrau veiwekani.

Qaravi Jiova

13, 14. Nida qaravi Jiova, na cava na kena ibalebale? Na cava e ganita ga kina me qaravi?

13 Nida veitaratara kei na Kalou o Jiova, eda sega ni vakarorogo se vosa wale tiko ga me vaka beka noda veitaratara kei na dua noda itokani se wekada. Eda sa qaravi koya sara tiko ga, eda sa vakaraitaka tiko vua na veidokai e ganiti koya. E tiki ni noda bula na sokalou dina. Eda vakaraitaka kina vei Jiova noda lomani koya mai vu ni lomada kei na noda via qaravi koya, e vakaduavatataki keda tale ga na dauveiqaravi i Jiova, mai lomalagi, se vuravura. A raica ena dua na raivotu na yapositolo o Joni na nona kacivaka na ivakaro oqo e dua na agilosi: “Dou vakarokoroko vei koya; [se, “qaravi koya,” NW] ka buli lomalagi, kei vuravura, kei na wasawasa, kei na veivurevure-ni-wai.”—Vakatakila 14:7.

14 Na cava meda qaravi Jiova kina? Vakasamataka mada na idivi kei Jiova eda a veivosakitaka mai me vaka na nona savasava, kaukaua, lewai koya vinaka, lewadodonu, yaloqaqa, yalololoma, vuku, yalomalumalumu, loloma, veinanumi, dau dina, kei na nona vinaka. Eda sa raica mai ni o Jiova e  uasivi duadua, e cecere duadua, qai lagilagi duadua ena nona ivalavala kece. Eda druka nida vulici koya, eda liaca ni sega ni ganita me divi wale ga. Eda sega ni katuma rawa na nona lagilagi, e cecere, eda somidi wale e matana. (Aisea 55:9) E sega ni vakatitiqataki tale ni o Jiova ga na Turaga Sau, o koya ga e dodonu meda qarava. Ia, meda na qaravi Jiova vakacava?

15. Sala cava eda na qaravi Jiova kina, “vakayalo ka vakaidina”? Na cava gona e rawa nida cakava nida tiko vata ena soqoni vakarisito?

15 A kaya o Jisu: “A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” (Joni 4:24) Meda qarava “vakayalo” na Kalou, e bibi me tiko vei keda na yalona tabu, me dusimaki keda tale ga. Na noda sokalou me salavata kei na dina, na ka dina e tiko ena Vosa ni Kalou. E noda itavi gona meda qaravi Jiova, “vakayalo ka vakaidina,” ena gauna eda soqoni vata kina kei ira na tacida vakayalo. (Iperiu 10:24, 25) Nida tabalaka noda sere vei Jiova, duavata ena masu,  nida vakarorogo da qai vakaitavi ena veivosakitaki ni nona Vosa, sa da vakaraitaka tiko kina ena noda veiqaravi na noda lomani koya.

Na soqoni vaKarisito e gauna vinaka meda qaravi Jiova kina

16. Na cava e dua vei ira na ivakaro levu e vakacolati vei ira na lotu Vakarisito dina? Na cava eda guta kina meda talairawarawa ina ivakaro oqo?

16 Eda qaravi Jiova tale ga ena noda tukuni koya yani, nida vakacaucautaki koya e matanalevu. (Iperiu 13:15) Io, e dua na ivakaro levu e vakacolati vei ira na lotu Vakarisito dina oya mera kacivaka yani na itukutuku vinaka ni Matanitu i Jiova. (Maciu 24:14) Eda talairawarawa ena ivakaro oqo nida lomani Jiova. Nida vakasamataka nona “sa vakamatabokotaka na nodra vakasama na tamata tawa vakabauta na kalou ni vuravura oqo,” o Setani na Tevoro, kei na nona vakatetea na lasu gaga e so me baleti Jiova, sega li ni gu na lomada meda vakadinadinataki koya na noda Kalou, meda vakavotuya kina na lasu i Setani? (2 Korinica 4:4, VV; Aisea 43:10-12) Nida vakasamataka tale ga na itovo uasivi kece i Jiova, sega li ni uqeti keda meda tukuni koya yani? E sega ni dua tale na ka dokai me tautauvata kei na noda vukei ira na tani mera mai kilai koya na Tamada vakalomalagi, mera qaravi koya tale ga.

17. Na cava e okati ena noda qaravi Jiova? Na cava meda qaravi koya kina ena yalodina?

17 Ia, e levu tale na ka e okati ena noda qaravi Jiova. E tara na veibasoga ni noda bula kece. (Kolosa 3:23) Ke da ciqomi Jiova dina me noda Turaga Sau, eda na via cakava na lomana ena veika kece ga—noda bula vakavuvale, noda cakacaka saumi, noda veimaliwai kei ira na tani, kei na noda gauna ni vakacegu. Eda na saga meda qaravi Jiova “e na yalo dina.” (1 Veigauna 28:9) Na veiqaravi vaka oqo e sega kina na lomalomarua se na veivakaisini—me laurai vua e dua ni qaravi Jiova, ia e cakava lo tiko e so na cala bibi. Ena sega ni veivakaisini na tamata yalodina ni na taqomaki koya na nona loloma. E taqomaki koya tale ga na nona rerevaki koya dina na Kalou. E kaya na iVolatabu ni rere vaka oqo e salavata kei na nona rawa ni veivolekati e dua kei Jiova.—Same 25:14.

 Vakatotomuri Jiova

18, 19. Na cava eda kaya kina ni tamata ivalavala ca e rawa ni vakatotomuria na Kalou o Jiova?

18 Na iwasewase yadua ni ivola oqo e tini ena dua na wase e vakamacalataka na sala meda ‘vakadamurimuria kina na Kalou, me vakataki ira na gone ni toko.’ (Efeso 5:1) Eda tamata ivalavala ca, ia me matata tiko vei keda ni rawa nida vakatotomuria na ivakaraitaki uasivi i Jiova ena nona vakayagataka nona kaukaua, lewadodonu, vuku, kei na nona loloma. Eda kila vakacava ni rawa nida vakatotomuri koya na Kalou Kaukaua Duadua ga? Nanuma tiko ni yaca i Jiova e kena ibalebale ni na tu vakarau o koya me raica ni yaco ga na lomana. Eda qoroqoro dina ena ka e rawa ni cakava o Jiova, ia sa na bau wadrega sara beka ga meda qai vakatotomuri koya? Sega sara.

19 Eda buli meda ucuya na Kalou. (Vakatekivu 1:26) Eda duatani duadua gona na tamata ni vakatauvatani kei na ka bula cava ga e vuravura. E sega ni porokaramutaki tu na noda bula me vaka na manumanu, e sega tale ga ni sa lewai oti tu mai. E solia vei keda o Jiova e dua na isolisoli talei—meda vakatulewataka sara ga na noda bula. E dina nida dau lekata e so na ka, da bula ivalavala ca tale ga, ia e soli vei keda na galala meda digia ga na ka eda vinakata. O vinakata mo dauloloma, vuku, lewadodonu, mo qai vakayagataka vakadodonu nomu kaukaua? E rawa sara ga ni o cakava oqo ena veivuke ni yalo i Jiova! Vakasamataka mada na ka vinaka o na rawata kina.

20. Na ka vinaka cava e rawa nida vakila nida vakatotomuri Jiova?

20 O na vakamarautaka na lomai koya na tamamu vakalomalagi. (Vosa Vakaibalebale 27:11) E rawa mada ga ni ‘vinakati keda sara’ o Jiova baleta ni kila vinaka noda malumalumu. (Kolosa 1:9, 10) Ni o saga tiko mo vakaitovotaki iko ena itovo i koya na Tamamu vakalomalagi, o na vakalougatataki ena dua na itavi cecere. O na lesi mo dauvakacila rarama ena vuravura sa solega tu oqo na o loaloa. (Maciu 5:1, 2, 14) O na vakaitavi ena kena kacivaki yani na ivalavala lagilagi e so i Jiova. Sa dua dina na ka dokai!

 ‘Toro Voleka Yani Vua na Kalou, ena Qai Toro Voleka Mai Vei Iko o Koya’

Mo dau toro voleka tiko mada ga vei Jiova

21, 22. Na ilakolako tawavakaiyalayala cava mera na muria o ira kece era lomani Jiova?

21 Na veivakamasuti rawarawa e volai ena Jemesa 4:8 e sega ni isausau wale ga. Oqo e vaka e dua na ilakolako. Ena sega ni cava na ilakolako oqo ke da yalodina tiko ga. Eda na sega ni cegu ena noda toro voleka tiko ga vei Jiova. Na veika vovou li meda vulica me baleti koya ena sega ni oti rawa. Meda kua ni nanuma ni ivola oqo e sa vakavulici keda ena ka taucoko sara ga me baleti Jiova. Oqo e itekitekivu wale ga ni noda vulica na veika e kaya na iVolatabu me baleti koya na noda Kalou! Ia, na iVolatabu mada ga e sega ni tukuna vei keda na itukutuku kece e baleti Jiova. A vakabauta na yapositolo o Joni ni kevaka a volai kece na ka a cakava o Jisu ena gauna a cakacaka vakaitalatala voli kina e vuravura, ena “oso ko vuravura e na veivola e na volai.” (Joni 21:25) Ke sa rawa ni tukuni oya me baleti Luvena, sa na qai wacava o Tamana!

22 Ena sega mada ga ni cava na noda kilai Jiova nida sa bula  tawamudu. (Dauvunau 3:11) O koya gona, vakasamataka na veika lelevu se tu e matada. Nida sa na bula me vica na drau na yabaki, vica na udolu, vica na milioni, se vica sara na bilioni, sa na qai levu sara na ka eda kila me baleti Jiova ni vakatauvatani kei na ka eda kila ena gauna oqo. Ia, se levu ga na ka e se vo meda vulica. Ena lomada meda vuli tiko ga, nida na vakila ni na yaga tiko ga meda lagata me vakataki koya na daunisame: “E yaga vei au me’u toro vua na Kalou.” (Same 73:28) E levu na veimataqali ka e tu meda na cakava ena noda bula nida sa na bula tawamudu—ia na tikina totoka duadua oya na noda na saga meda toro voleka tiko ga vei Jiova.

23. Na cava e vakauqeti mo cakava?

23 Mo dolea mada ga na loloma i Jiova ena gauna oqo ena nomu lomani koya ena lomamu taucoko, yalomu taucoko, nomu bula taucoko, nomu nanuma kece, kei na nomu kaukaua kece. (Marika 12:29, 30) Me dina mada ga, qai dei na nomu loloma. Me laurai mada ga ena nomu vakatulewa kece e veisiga—ena vakatulewa lelevu kei na vakatulewa lalai—ni o na digia tu ga mo muria na sala ena qaqaco tiko ga kina na nomu veiwekani kei na Tamamu vakalomalagi. Kena ilutua, mo toro voleka tiko mada ga vei Jiova, me toro voleka mada ga mai vei iko o koya—me yacova na gauna e sega ni mudu!