Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 29

“Mo Dou Kila na Loloma i Karisito”

“Mo Dou Kila na Loloma i Karisito”

1-3. (a) Na cava e vakavuna me via ucui Tamana kina o Jisu? (b) Na cava eda na veivosakitaka me baleta na loloma i Jisu?

O SA bau raica e dua na gonetagane lailai ni via vakatotomuri tamana? Ena saga beka me vakatotomuria na ilakolako nei Tamana, nona ivosavosa, se nona ivukivuki. Lakolako sa rawa ni muria sara mada ga o gone na ivakarau ni bula i tamana​—vakayago, vakayalo tale ga. Io, na nona lomani tamana e dua na gone kei na nona qoroi koya, ena uqeti koya sara ga me via vakatotomuri tamana.

2 Ia, vakacava na veiwekani nei Jisu kei na tamana vakalomalagi? A kaya ena dua na gauna o Jisu, ‘au sa lomani Tamaqu.’ (Joni 14:31) Sega tale ni dua e rawa ni lomani Jiova vakalevu cake me vakatauvatani kei koya na Luvena. Ni bau dede sara ga nodrau tiko vata na veitamani oqo ni bera sara nira buli na veika tale e so. Na loloma oqo e vakavuna sara ga me via ucui Tamana o Luvena.​—Joni 14:9.

3 Ena itekitekivu ni vica na wase ni ivola oqo, eda a veivosakitaka kina na nona ucui Tamana vinaka o Jisu ena kaukaua, lewadodonu, kei na vuku. Ia, e ucui Tamana vakacava o Jisu ena loloma? Meda veivosakitaka mada e tolu na sala e laurai kina na loloma i Jisu​—nona solia nona bula me veiqaravi, nona yalololoma, kei na nona dau tu vakarau me veivosoti.

“Sa Sega na Nona loloma e Dua me Uasivi Cake e na Ka Oqo”

4. E vakaraitaka vakacava o Jisu na loloma levu duadua me bau kune vua na tamata?

4 E vakasakiti dina na ivakaraitaki ni loloma i Jisu ni dau solia nona bula me veiqaravi. Na yalo ni solibula e okati kina noda vakaliuca na nodra gagadre na tani. E vakaraitaka  vakacava o Jisu na loloma vaka oqo? A kaya sara ga o koya: “Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.” (Joni 15:13) E lomasoli sara ga o Jisu me solia nona bula ena vukuda. Oqo e ivakaraitaki ni loloma levu duadua me bau vakaraitaka e dua na tamata. Ia, e so tale na sala e vakaraitaka kina o Jisu na loloma vaka oqo.

5. Na cava e ivakaraitaki vakasakiti kina ni loloma na nona biuti lomalagi tu yani na Luve ni Kalou e duabau ga a vakatuburi?

5 A tu ena dua na itutu cecere mai lomalagi na Luve ni Kalou e duabau ga a vakatuburi ni bera ni mai bula vakatamata. E rau dau veivolekati kei Jiova, e dau volekati ira tale ga na agilosi mai lomalagi. E dina ni a tu ena dua na ivakarau ni bula cecere na Luve ni Kalou lomani oqo, ia “sa vakadravudravuataki koya, ka kauta vua nai tovo ni tamata dauveiqaravi.” (Filipai 2:7) E makutu me mai bula vata kei ira na tamata ivalavala ca ena vuravura e “sa tu . . . e na kaukauwa ni Vunica.” (1 Joni 5:19, VV) Sega li ni ivakaraitaki vakayalololoma oqo ni yalo ni solibula?

6, 7. (a) Ena sala cava e vakaraitaka kina o Jisu nona veikauaitaki vakayalololoma ni mai cakacaka vakaitalatala voli e vuravura? (b) Na ivakaraitaki uasivi cava ni veikauaitaki vakayalololoma e volatukutukutaki ena Joni 19:25-​27?

6 E levu tale na sala e laurai kina na yalo ni solibula i Jisu ena gauna taucoko e bula voli kina vakatamata. E sega ni dau nanumi koya ga. E vakuai koya mai na bula vakacegu e dau guti ena gauna oya, qai vakaliuca ga na nona cakacaka vakaitalatala. A kaya o koya: “Era vaqara na fokisi, ka ra vakasova na manumanu vuka; ia, na Luve ni Tamata ga e sega na vanua me kotora kina na uluna.” (Maciu 8:20, VV) E matai maqosa o Jisu, e rawa sara ga ni lai tara tu mada e dua na nona vale levu, se me ta iyaya vakalevu me rawa ni volitaka me levu kina nona ilavo. Ia a sega ni vakayagataka nona maqosa me rawa ka kina.

7 Dua na ivakaraitaki vakasakiti ni nona vakaliuci ira na tani o Jisu e volai ena Joni 19:25-​27. Vakasamataka mada na levu  ni ka ena tu ena lomai Jisu kei na nona vakasama ena yakavi e mate kina. Ni sa vako tu qai mosi vakalevu, se kauaitaki iratou ga na nona tisaipeli, na cakacaka vakavunau, vakauasivi na nona yalodina, kei na irogorogo kei Tamana. Io, na bula mai muri ni kawatamata e sa vakatau sara tu ga vei Jisu! Ia, ni vakarau mate sara toka ga, a vakaraitaka tale na nona kauaitaki Meri na tinana, sa rairai yada tiko ena gauna oya. E kerei Joni o Jisu me qai raici Meri, me okati koya tale ga me vaka e tinana dina. E qai cakava vaka kina o Joni ena nona qaravi Meri. Ena sala oqo e raica kina o Jisu me qaravi vinaka na tinana, vakayago, vakayalo tale ga. Sa ivakaraitaki vakasakiti dina ni nona veikauaitaki vakayalololoma!

“Sa Tubu na Nona Lomani Ira”

8. Na cava na ibalebale ni vosa vakirisi e vakayagataka na iVolatabu me vakamacalataka na yalololoma i Jisu?

8 E dau yalololoma o Jisu me vakataki Tamana ga. Na iVolatabu e vakamacalataki Jisu ni dua e dau saga me vukei ira na vakaleqai tu ni lomani ira dina. Na iVolatabu e vakayagataka e dua na vosa vakirisi e kena ibalebale “sa lomani ira” me vakamacalataka kina na yalololoma i Jisu. E kaya e dua na vuku: “Na vosa oqo e vakamacalataka . . . na yalololoma e vu sara ga mai loma. Oqo na vosa vakirisi titobu duadua me baleta na yalololoma.” Dikeva mada e so na ituvaki a tarai Jisu me via veivukei sara ga kina.

9, 10. (a) Na cava e vakavuna me ratou via lako kina ina dua na vanua lala ni vakacegu o Jisu kei iratou nona yapositolo? (b) Ni sevataki tale nodratou a via vakacegu, na cava a sega ni rarawa kina o Jisu?

9 E saga sara ga me veivakacegui ena ka vakayalo. Na itukutuku ena Marika 6:30-​34 e vakaraitaka na ka e dau vakavuna na yalololoma i Jisu. Vakasamataka mada na ka e yaco oqo. Dua na ka nodratou marau na yapositolo ni ratou se qai lesu mai ena dua na ilakolako ni cakacaka vakavunau. Eratou lai raici Jisu sara me ratou tukuna vua na ka kece eratou raica kei na ka eratou rogoca. Ia, sega ga ni dede era sa osota na vanua oya na lewenivanua, mani sega mada ga kina ni ratou kana  rawa o Jisu kei iratou nona yapositolo. Ia, ena nona dau veikauaitaki, e raica o Jisu ni ratou sa oca sara ga na nona yapositolo. Mani kaya vei iratou: “Dou lako mai ka vakatikitiki ki na dua na vanua lala, ka mo dou vakacegu mada vakalailai.” Ratou mani vodo ena dua na waqa, ratou sokota cake sara na vualiku ni Wasawasa o Kaleli ina dua na vanua lala. Ia, era raica na lewevuqa na nodratou sa biubiu. E so era rogo italanoataka ga. O ira kece oqo era sa qai cici muria cake na baravi me lai yaco sara i yasana kadua, ni se bera mada ga ni yaco yani na waqa!

10 E rarawa beka o Jisu nira tabili ga yani na tamata, dina ga ni ratou via vakacegu? Sega sara ga! E tarai koya dina na nona raici ira na udolu era sa wawa tu mai. E vola o Marika ni sa “raici ira era sa lewe vuqa sara, a sa lomani ira, ni ra sa vaka na sipi sa sega na nodrai vakatawa: a sa vakatekivu me vakatavulici ira e na ka e vuqa.” E kila o Jisu ni o ira na tu mai oya e dodonu mera vukei vakayalo. Era vaka na sipi lakosese e sega e dua me vakatawai ira. E kila o Jisu ni o ira na tauvanua oqo era vakawaleni dina mai vei ira na iliuliu ni lotu sega ni dau veinanumi, o ira a dodonu mera qarava ena makutu na qelenisipi. (Joni 7:47-​49) E lomani ira dina na lewenivanua, sa mani tekivu vakavulici ira ena “ka ni matanitu ni Kalou.” (Luke 9:11) Na yalololoma gona i Jisu e yavutaki ena nona vinakata sara ga me veivukei, e sega ni qai yalololoma ga vei ira era vakabauta na nona ivakavuvuli. Se ra rogoca na nona ivakavuvuli se sega, e kauaitaki ira ga o Jisu.

‘E dodoka yani na ligana, qai tarai koya’

11, 12. (a) Na cava e dau caka vei ira na vukavuka ena gauna vakaivolatabu, ia na cava e cakava o Jisu ni torovi koya yani “e dua na vukavuka”? (b) Na cava beka ena yacovi koya na vukavuka oqo ni tarai koya o Jisu, me vaka a yaco vua e dua na vukavuka ni tarai koya e dua na vuniwai?

11 Vinakata sara ga me vakacegui ira na rarawa tu. Era kila na tauvimate ena gauna oya ni turaga dauloloma o Jisu, oya na vuna era lako kina vakalewelevu vua. E vakadinadinataki oqo ena nona lakovi Jisu e dua na turaga e “roboti koya na vukavuka,” e dina nira a muri Jisu voli mai na lewevuqa. (Luke 5:12) Ena gauna vakaivolatabu, era dau lai tu vakatikitiki na  vukavuka me kua kina ni dewa na kedra mate. (Tiko Voli mai na Lekutu 5:1-4) Ia, ni toso na gauna, sa ra qai bulia na iliuliu ni rapai e so na lawa kaukaua era sa beci tale kina na vukavuka. * Ia, dikeva na ka e qai cakava o Jisu vua na vukavuka: “A sa lako mai vei koya e dua na vukavuka, ka vakamasuta, ka tekiduru vua, ka kaya vua, Kevaka ko ni sa vinakata, ko ni sa vakasavasavataki au rawa. A sa yalololoma ko Jisu, ka dodoka na ligana, ka tarai koya, ka kaya vua, Au sa vinakata; mo savasava mai. Ia ni sa vosa oti, sa takali vakasauri vua na vukavuka, a sa savasava mai.” (Marika 1:40-​42) E kila o Jisu ni sega ni dodonu me lai tu e kea o koya na vukavuka. Ia, a sega ni vakatalai koya lesu, dua na ka na nona lomani koya, sa qai cakava e dua na ka e sega sara ga ni dua e tadra. E tarai koya!

12 Ena raica beka vakacava na vukavuka na nona tarai koya o Jisu? Meda raica mada e dua na kena ivakaraitaki. E talanoataka o Paul Brand, e dua na vuniwai ni vukavuka, na ka a yaco ena gauna e qarava tiko kina e dua e tauvi vukavuka mai Idia. Ni vakadikevi koya tiko, sa qai tara na vatuvatunitabana me vakamacalataka vei koya e vakadewataka tiko nona vosa na ka e sa nanuma me caka. E kidacala ni sa tabaka na tagi o koya na vukavuka. Mani taroga o vuniwai: “Isa, dua beka na ka cala au tukuna?” Mani tarogi koya e vukavuka ena vosa vakaidia o koya e vakadewa tiko, oti e qai sauma mai: “Sega vuniwai. E kaya o koya ni tagi baleta ni o tara na vatuvatu ni tabana. Sa mai dede toka e valenibula, ia e sega ni dua e tarai koya ena loma ni gauna kece oya.” Sa na qai wacava o koya na vukavuka e tarai koya o Jisu! Baleta ni oti oya, e yali vakadua na mate a dau vakavuna tu na nona beci kei na nona sevaki!

13, 14. (a) Na ilakolako cava e sotava o Jisu ni volekata yani na koro o Neini, na cava e vakaloloma kina na ituvaki e lai sotava? (b) Na cava e cakava o Jisu vua na yada mai Neini ena vuku ni nona yalololoma?

 13 Gu na yalona me vakaotia na rarawa. E tarai Jisu dina na rarawa e raica. Dikeva mada na ka e volai ena Luke 7:11-​15. E yaco na ka oqo ni se vakacagau sara tu ga na cakacaka vakaitalatala i Jisu, ni se qai yacova yani o Jisu na saula ni koro o Neini, ena vanua o Kaleli. Ni voleka yani ina matamata ni koro o Jisu, sa sotava sara e dua na ilakolako ni veibulu. E tarai koya sara ga na ka e raica. E mate e dua na cauravou, e yada na tinana ia na cauravou oqo e luvena duabau ga na yada. Sega ni vakabekataki ni sa lako oti ena dua na ilakolako vaka oqo o koya na yada​—na ilakolako ni veibulu i watina. Oqo e sa lai buluti na luvena, na iotioti ni nona inuinui. Era rairai salavata tale tiko ga yani kei koya e so na dautagi kei na so na dauuvubitu era uvuca voli e so na ivakatagi ni lolosi. (Jeremaia 9:17, 18; Maciu 9:23) Ia, ni rai yani o Jisu, e rairai coba sara na matana vua na tinanigone e luvuci koya tu na rarawa, sega ni vakabekataki ni na lako sara yani ena yasa ni vatavata e colati tiko mai kina na yago i gonetagane.

14 E gu na lomai Jisu me vakaceguya na yada oqo, ni “sa lomana.” Ena domo e veivakacegui, e qai kaya vua na yada: “Kakua ni tagi.” Sega tale ni wawa ena nona lako ga yani tara na vatavata. Ra tu vakadua na cola tiko​—ra rairai tu vakadua tale ga na kena vo. Ena domo e nuidei, sa qai kaya o Jisu vua na gonetagane sa mate: “Ko iko na cauravou, au sa kaya vei iko, Tu cake”! Cava e qai yaco? “A sa duri cake na mate, ka vakatekivu me vosa” me vaka sara ga e dua e qai yadra mai na moce! Vakaciriloloma nona sa qai ‘soli koya o Jisu vei tinana.’

15. (a) E salavata vakacava na yalololoma kei na caka sara ga ni ka, me vaka eda raica ena yalololoma i Jisu? (b) Eda na vakatotomuri Jisu vakacava ena tikina oqo?

15 Na cava eda vulica mai na veika e yaco oqo? O na raica ena vica na ituvaki oqo ni yalololoma e vakaraitaki sara ga. E sega ni rawa ni raica tu o Jisu na rarawa me qai sega ni cakava kina e dua na ka. Eda na muria vakacava na nona  ivakaraitaki? Nida lotu Vakarisito, e noda itavi meda vunautaka yani na itukutuku vinaka, meda vakayaco tisaipeli tale ga. E yavalati keda vakalevu duadua na noda lomana na Kalou. Ia, meda kua ni guilecava ni oqo e cakacaka tale ga ni veinanumi. Nida veinanumi me vakataki Jisu, ena gu na lomada meda vota yani na itukutuku vinaka. (Maciu 22:37-​39) Vakacava na noda yalololoma vei ira na tacida vakayalo era rarawa se ra lolosi voli? E sega ni rawa nida veivakabulai vakacakamana, se vakatura e dua ke sa mate. Ia, e rawa nida vakaliuliu sara ga ena noda kauaitaki ira, kei na noda vakacegui ira.​—Efeso 4:32.

“Tamaqu, ni Vosoti Ira”

16. Ni mai vako tu ena kaunirarawa o Jisu, e kilai vakacava ni dau tu vakarau me veivosoti?

16 Dua tale na sala e vakatotomuria vinaka kina o Jisu na loloma i Tamana, oya nona “daulomadonu [se, “dau tu vakarau me veivosoti,” NW].” (Same 86:5) Ni sa vako tu ena kau, se laurai ga vua na yalo ni lomasoli oqo. Ni sagai me vakamatei ena sala e vakaloloma sara, ni sa curubasikata tu na ligana kei na yavana na ivako, na cava e qai tukuna o Jisu? E masuti Jiova beka me totogitaki ira na vakararawataki koya? Sega sara, oqo e dua vei ira na ka a tukuna: “I Tamaqu, ni vosoti ira ga; ni ra sega ni kila na ka era cakava tiko.”​—Luke 23:34; VV. *

17-19. E vakaraitaka vakacava o Jisu ni vosoti Pita na yapositolo, e dina ni a cakitaki koya vakatolu?

17 Ena rairai tarai keda tale ga vakalevu na ivakaraitaki ni  veivosoti i Jisu nida raica na nodrau veimaliwai kei na yapositolo o Pita. Sa macala tu ga ni dau lomani Jisu o Pita. Ena ika14 ni Naisani, na bogi me qai mate kina o Jisu, a qai tukuna vua o Pita: “Turaga, au sa vakarau tu me’u lako vata kei kemuni ki na valeniveivesu kei na mate tale ga!” Ia, e qai cakitaki Jisu vakatolu o Pita ni oti ga e vica na aua! E vakaraitaka vei keda na iVolatabu na ka e qai yaco ena ikatolu ni gauna e cakitaki Jisu kina o Pita: “Sa qai vuki na Turaga ka rai vakadodonu sara vei Pita.” E tarai Pita na bibi ni nona cala, sa qai “lako ko Pita ki tuba ka tagi vakararawa sara.” Ni mate o Jisu ena siga oya, de dua a veiciciyaki na nodratou vakasama na nona yapositolo, ‘A vosoti au beka na noqu Turaga?’​—Luke 22:33, 61, 62, VV.

18 Sega ni dede ga sa kila o Pita na kena isau. A vakaturi o Jisu ena mataka ni ika16 ni Naisani, qai vaka e laurai mai na ivolatukutuku ni a sikovi Pita o Jisu ena siga tiko ga oya. (Luke 24:34; 1 Korinica 15:4-8) Na cava me kauai kina o Jisu vua e dua na yapositolo a sega sara ga ni via kilai koya? Me vaka ni qai veivutuni o Pita, de dua a via raici koya na nona Turaga me vakaraitaka vua ni se lomani koya, se vakadonui koya tiko ga. Ia, e sega ni yala wale ga e kea na ka e cakava o Jisu.

19 E muri a qai rairai o Jisu vei iratou nona tisaipeli ena Wasawasa o Kaleli. Ena gauna oqo, a tarogi Pita kina vakatolu (ni a vakatolu nona cakitaki koya nona Turaga) se vakacava sara mada nona lomani koya. E qai kaya o Pita ena ikatolu ni nona tarogi: “Turaga; ko ni sa kila ni’u sa lomani kemuni.” Io, e kila rawa o Jisu na loma i Pita, e raica rawa ni sa lomani koya dina o Pita, e kauaitaki koya tale ga. Ia, e solia vei Pita o Jisu e dua tale na gauna me vakaraitaka kina se vakacava tiko nona lomani koya. Ia, kena ikuri nona qai lesi Pita o Jisu me ‘vakania’ qai “vakatawana” na nona “sipi.” (Joni 21:15-​17) A sa lesi oti vei Pita na ilesilesi ni vunau. (Luke 5:10) Ia e vakaraitaka sara ga o Jisu nona nuitaki koya, mani lesi koya tale ina dua na itavi bibi​—me na qaravi ira era na yaco mera imuri i Karisito. Oti ga vakalailai sa qai solia o Jisu vei Pita e dua na itavi bibi ena nodra cakacaka na tisaipeli. (Cakacaka 2:1-​41)  Sa na marau mada ga o Pita ni raica nona sa vosoti koya o Jisu, e nuitaki koya tale ga!

O ‘Kila na Loloma i Karisito’?

20, 21. Sala cava eda na ‘kila kina na loloma i Karisito”?

20 Io, e vakamatatataki ena Vosa i Jiova na loloma i Karisito. Ia, eda na dolea vakacava na loloma i Jisu? E uqeti keda na iVolatabu meda “kila . . . na loloma i Karisito, ni sa uasivia na ka kece ga e kilai rawa.” (Efeso 3:19; VV) Me vaka eda sa raica mai, e levu sara na ka eda na vulica me baleta na loloma i Jiova mai na itukutuku ni nona bula kei na cakacaka vakaitalatala ena Kosipeli. Ia, na noda ‘kila na loloma i Karisito’ e okati kina na noda vulica na ka e kaya na iVolatabu me baleti koya.

21 Na vosa vakirisi e vakadewataki me “kila” e vakaibalebaletaki ena kilai ni ka “ena ka sara ga e sotavi.” Nida vakaraitaka ena noda bula na loloma me vaka a vakaraitaka o Jisu​—ena noda soli keda meda qaravi ira kina na tani, noda vakacegui ira ena veika era gadreva, kei na noda vosoti ira mai vu ni lomada​—sa na qai rawa nida kila na ka a vakila sara ga o Jisu. Ena ka eda sotava sara ga, sa na qai rawa nida ‘kila kina na loloma i Karisito, ni sa uasivia na ka kece ga e kilai rawa.’ Qai kua ni guilecava ni levu ga ni noda saga meda ucui Karisito, na noda voleka tale ga vei koya a vakatotomuria vakavoleka sara o Jisu, na noda Kalou dauloloma, o Jiova.

^ para. 11 Na nodra lawa na rapai e kaya me kakua ni dua e volekata yani e dua na vukavuka ena va na kiupiti (voleka ni rua na mita). Ia, ke mudre tiko na cagi, e dodonu me tu vakayawa sara o koya na vukavuka ena 100 na kiupiti (rauta ni 45 na mita). Na ivola na Midrash Rabbah e volatukutukutaka na nona vunitaki koya e dua na rapai mai vei ira na vukavuka, e dua tale na rapai e vakaviriki ira na vukavuka mera lako tani vakayawa. Dua gona na bula dredre era sotava na vukavuka nira sevaki, ra beci, ra qai vakasisilataki.

^ para. 16 E so na ivolaliga makawa ni iVolatabu era sega ni okata na imatai ni icegu ni Luke 23:34. Ia, era kunei ena levu na ivolaliga kilai, oya na vuna e okati kina ena New World Translation kei na levu tale na vakadewa ni iVolatabu. E macala ni cavuta tiko na vosa oqo o Jisu vei ira na sotia ni Roma era vakoti koya. Era sega ni kila na sotia oqo na ka era sa cakava tiko, nira sega ni kila se o cei o Jisu. Io, na ka e yaco oqo e bale ga vakalevu vei ira na iliuliu ni lotu ni o ira ga era a bukana me vakamatei o Jisu, ia era kilai Jisu vinaka, e matata tale tu ga vei ira se o cei o koya. E levu ga vei ira era na sega ni vosoti rawa.​—Joni 11:45-​53.