Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 23

“Sa Taumada na Nona Loloma Vei Keda”

“Sa Taumada na Nona Loloma Vei Keda”

1-3. Na cava e so na ka e duatani duadua kina na mate i Jisu?

ENA dua na vulaitubutubu ena rauta e 2,000 na yabaki sa oti, a beitaki kina e dua na turaga tawacala, lewai sara ena so na cala bibi a sega mada ga ni kila, vakararawataki, vakamatei sara. Oqo e sega ni qai matai ni gauna me vakamatei kina e dua na tamata tawacala; ka ni rarawa ni sega tale ga ni kena iotioti. Ia, e duatani duadua na nona mate na turaga oqo.

2 Ena iotioti ni vica na aua e vakararawataki voli kina ni bera ni mate, sa qai vakaraitaka na lomalagi ni oya e dua na gauna bibi. Se sigalevu tutu, ia e qai sobu na butoleka. E kaya e dua na dauvolavola makawa ni a “vakabutobutotaki na mata-ni-siga.” (Luke 23:44, 45) Ni bera ni cavuka nona icegu na turaga oqo, e qai cavuta na veivosa guiguilecavi dredre oqo: “Sa oti”! Io, ena nona solia nona bula, sa vakaotia kina e dua na itavi lagilagi. Na nona isoro e ivakaraitaki ni loloma levu duadua me bau vakaraitaka e dua na tamata.—Joni 15:13; 19:30.

3 Na turaga oya o Jisu Karisito. E kilai levu na rarawa a sotava kei na nona vakamatei ena ika14 ni Naisani, 33 S.K. Ia, e dua na ka bibi e dau guilecavi. Dua na ka na rarawa e sotava o Jisu, ia e tiko e dua e rarawa vakalevu cake sara. E dua e soli ka vakalevu cake ena siga oya—na ivakaraitaki ni loloma e sega ni dua e se bau vakaraitaka e lomalagi e cake vaka kina e ke e vuravura. Na loloma i cei oqo? Na kena isau e itekitekivu vinaka me veivosakitaki kina e dua na ulutaga bibi duadua: Na loloma i Jiova.

Na Loloma Levu Duadua

4. E qai kila vakacava na turaganivalu ni Roma ni sega ni tamata wale o Jisu? Na cava e qai kaya?

4 Dua na ka na nona kidroa na turaganivalu ni Roma a liutaka na vakamatei nei Jisu ena sobu ni butoleka ni bera na mate, kei  na uneune kaukaua ni sa mate oti. E qai kaya: “E dina ga sa Luve ni Kalou ko koya oqo.” (Maciu 27:54) E macala ni sega ni tamata wale o Jisu. Sa vakaitavi sara tiko ga na turaganivalu oya ena nona vakamatei na Luvena duabau na Kalou Cecere Duadua! Ia, e dau vakamareqeti koya beka na Luvena oqo o Tamana?

5. E vakacava na balavu ni gauna erau tiko vata kina mai lomalagi o Jiova kei Luvena, ni bera ni mai bula e vuravura na Luvena?

5 E kaya na iVolatabu ni o Jisu e “ulu ni veika buli kece ga.” (Kolosa 1:15, VV) Vakasamataka mada—se bula makawa tu mai na Luve i Jiova oqo ni bera mada ga ni buli na lomalagi kei na vuravura. E vakacava na dede ni nodrau tiko vata na veitamani oqo? Era vakabauta e so na saenitisi ni noda lomalagi kei na vuravura e sa via 13 na bilioni na yabaki na kena dede. Sa gauna balavu dina oya se vakaevei? Ia, kevaka mada ga e dina na vakabauta oqo, se na lailai tiko ga ni vakatauvatani kei na dede ni nona bula na Luvei Jiova! Ia, na cava e cakava voli ena loma ni gauna kece oya?

6. (a) Na cava a cakava voli na Luve i Jiova ni bera ni mai bula vakatamata? (b) E vakacava sara mada na veivolekati nei Jiova kei na Luvena?

6 A marautaka voli na Luvena na nona itavi “me matai daucakacaka.” (Vosa Vakaibalebale 8:30) E kaya na iVolatabu: “Sa sega e dua na ka sa caka, me sega ni cakava ko koya.” (Joni 1:3) Erau cakacaka vata gona na veitamani oqo ena buli ni veika kece. Sa na gauna marautaki mada ga vei rau! Ia, e levu era na vakadinata ni loloma e tiko vua e dua na itubutubu kei na luvena e dau duatani sara. Na loloma li e “sai vau vinaka sara.” (Kolosa 3:14) Ia, sa na qai wacava na kaukaua ni nodrau veivolekati e rua erau tiko vata ena dua na gauna balavu? Sega tale ni vakabekataki ni kaukaua ni ivau ni veivolekati i Jiova na Kalou kei na Luvena e duatani duadua, e sega ni vakatauvatani rawa.

7. Ni papitaiso o Jisu, e vakaraitaka vakacava o Jiova nona marautaki Luvena?

7 Ia, e talai Luvena ga mai o Tamana me mai sucu vakatamata. Nona vakayacora oqo e kena ibalebale ni sa na yali toka mada mai tikina na Luvena lomani. Dua na ka nona kauai ni vakararai toka mai lomalagi qai raici Luvena ni tubu cake me yacova  ni sa dua na tamata bula uasivi. Sa via yabaki 30 o Jisu qai papitaiso. Eda sa na kila ga na marau levu i Jiova ena ka e yaco oqo. A rogo sara ga kina na domo i Tamana mai lomalagi: “O koya oqo na noqu Gone ni toko, au sa dauvinakata vakalevu.” (Maciu 3:17) Sa na marau mada ga o Tamana ni raici Jisu ni vakayacora ena yalodina na ka kece a parofisaitaki, kei na ka kece a talai mai kina!—Joni 5:36; 17:4.

8, 9. (a) Na cava a sotava o Jisu ena ika14 ni Naisani, 33 S.K.? E lai tarai Tamana vakalomalagi vakacava na ka e sotava? (b) Na cava e vakalaiva kina o Jiova me rarawa qai mate na Luvena?

8 Ia, e marautaka beka o Jiova na ka e raica ena ika14 ni Naisani, 33 S.K.? E vakacava sara mada na ituvaki ni lomana, ni sa dabuitaki o Jisu ra qai vesuki koya na meca ena bogi? Nira biuti Jisu na nona itokani ra qai dui seuta, qai lai veilewaitaki tu ena dua na ituvatuva ni veilewai e cala vakalawa? Ni vakalialiai, kasiviti, qai lauroba? Ni kuitataki, lai tavaseisei kina na kuliniyagona? Ni vako na ligana kei na yavana ena dua na kau qai vakaliligi tu mera vakalialia? Ena vakacava na loma i Tamana ni sa tagici koya yani na Luvena ena levu ni nona mosi? E vakacava na loma i Jiova ni sa kaburaka mai o Jisu na iotioti ni nona icegu, qai imatai ni gauna oqo me tekivu sara mai ena gauna ni bulibuli, me sa na mai cava toka kina na bula i Luvena lomani?—Maciu 26:14-16, 46, 47, 56, 59, 67; 27:38-44, 46; Joni 19:1.

‘E solia na Kalou na Luvena e duabau ga sa vakatubura’

9 E sega vei keda na kena vosa. Eda sega ni vakamacalataka rawa na mosi ni loma i Jiova ni sa mate na Luvena. Eda rawa ga ni tukuna na vuna e vakalaiva kina me yaco na ka oqo. Ia, na cava e bolea kina o Tamana me sotava na rarawa oqo? E vakaraitaka vei keda o Jiova e dua na ka totoka ena Joni 3:16 (VV)—e dua na tikinivolatabu bibi e dau vakatokai sara mada ga me Kosipeli lailai. E kaya: “Sa lomani vuravura sara vaka oqo na Kalou, sa solia kina na luvena e duabau ga sa vakatubura, me kakua ni rusa ko ira yadua era sa vakabauti koya, me nodra ga na bula tawa mudu.” E bolea gona o Tamana me sotava na rarawa oqo ena vuku ni nona loloma. E ivakaraitaki ni loloma levu duadua na nona solia mai na Luvena o Jiova—me mai rarawa, me mate ena vukuda.

 Na Loloma Dina Vakalou

10. Na cava e dua na gagadre levu ni tamata, ia na cava e sa yaco ena ibalebale ni vosa na “loloma”?

10 Na cava na ibalebale ni loloma oqo? E tukuni ni loloma e dua vei ira na ka e gadreva vakalevu duadua na tamata. Mai na gauna ga e sucu kina me lai yacova tale nona mate, e dau qara na loloma na tamata, e marau ni vakila, e so mada ga era malumalumu ra qai mate yani nira sega ni lomani. Ia, e dredre sara me vakamacalataki. E macala ni dau wewe ni gusudra e levu na loloma. E sega ni caka rawa na kena ivola, kena sere, kei na kena serekali. Ia, e vaka me sa lecavi tale nikua na kena ibalebale dina. De dua, e vu oqo ena sivia tale ni kena vakayagataki.

11, 12. (a) E vei ga eda na kila kina vakavinaka na ibalebale ni loloma, ena vuku ni cava? (b) Na mataqali loloma cava soti a vakamatatataki ena vosa makawa vakirisi? Ia, na loloma cava e cavuti vakalevu duadua ena iVolatabu Vakirisi Vakarisito? (Raica tale ga na ivakamacala e ra.) (c) Na cava na a·gaʹpe?

11 Ia, e vocia vakavudi na iVolatabu na ibalebale ni loloma. E kaya na Expository Dictionary of New Testament Words nei Vine: “Ena qai kilai ga na loloma ke vakaraitaki.” E levu sara na ka eda kila me baleta na loloma i Jiova nida raica na ka e dau cakava vei ira nona ibulibuli me vaka e volatukutukutaki ena iVolatabu. Me kena ivakaraitaki, eda qai kila ga na loloma i Jiova nida dikeva na nona ivakaraitaki levu ni loloma eda se qai veivosakitaka mai! Eda na qai raica ena vica na wase e tu oqo e liu e levu tale na ivakaraitaki ni loloma i Jiova. Kuria oya noda rawa ni kila e levu tale na ka me baleta na loloma, ena noda dikeva na kena vosa taumada. Ena vosa vakirisi makawa, na vosa oqo na “loloma” * e va na kena vosa taumada. Ena  va na vosa oqo, e dau vakayagataki vakalevu duadua ena iVolatabu Vakirisi Vakarisito na a·gaʹpe. E kaya e dua na volavosa ni iVolatabu ni vosa oqo e vakadewataka vakavoleka duadua na “loloma” dina. Ena vuku ni cava?

12 Na a·gaʹpe e mataqali loloma e vakaraitaka e dua ni kila ni dodonu qai kilikili me vakaraitaka. Oqo e sega ni loloma e dau tuburi keda nida taleitaka na nona itovo se nona vosa e dua noda itokani. Na loloma oqo e nakiti, e uqeta e dua me kauaitaka e dua tale se mani vakacava tu na nona itovo. Qai kena ilutua, na a·gaʹpe e sega ni dau nanumi koya ga. Kena ivakaraitaki, raica tale mada na Joni 3:16, (VV). Na “vuravura” cava e lomana vakalevu na Kalou me solia kina na Luvena e duabau ga sa vakatubura? Oqo o ira kece na kawa i Atama e rawa mera vakabulai ena isoro i Jisu. Era okati e ke e levu sara na tamata e ca tu na nodra ivalavala. E lomani ira beka o Jiova me vaka era nona itokani voleka, me vaka na nona lomana na nona itokani yalodina o Eparama? (Jemesa 2:23, VV) Sega, ia e lomana ga na kawatamata o Jiova, e dina ni na vakila kina na rarawa. E vinakata ga me veisautaka na tamata na nona ivalavala. (2 Pita 3:9) Levu sa ra veisau. E marau me ciqomi ira oqo mera nona itokani.

13, 14. Eda kila vakacava ni a·gaʹpe e okati tale ga kina na veidredreti?

13 Ia, e so e cala nodra nanuma me baleta na a·gaʹpe. Era nanuma ni a·gaʹpe e vulici, ni sega ni vu dina mai lomada. Ia, e cala na vakasama oqo, baleta na a·gaʹpe e dau salavata kei na veikauaitaki se veidredreti. Me kena ivakaraitaki, a vola o Joni, “Sa lomana na Luvena ko Tamana,” a vakayagataki e ke na vosa e yavutaki ena a·gaʹpe. (Joni 3:35) Ia, e sega beka na veidredreti ena nodrau veilomani? Dikeva ni a qai kaya o Jisu me vaka e volai ena Joni 5:20, “Sa lomana na Luvena ko Tamana,” e vakayagataki e ke na vosa phi·leʹo. Na loloma i Jiova e dau yavutaki tu ga ena nona mositi keda na tamata. Ia, e sega ni dau veivakademeni. Na nona loloma e dau salavata tu ga kei na nona vuku, kei na lewadodonu.

 14 Me vaka eda sa raica mai, era vakasakiti kece na itovo i Jiova, era sega ni vakamelei rawa. Ia, e duatani duadua ga na nona loloma. Na nona loloma ga e dreti keda vakavoleka sara vua. Eda marau dina ni dau kilai vakalevu duadua ga o koya ena nona loloma. Ia, e dina beka? Eda kila vakacava?

“Sa Loloma na Kalou”

15. Na cava e kaya na iVolatabu me baleta na idivi oqo kei Jiova, na loloma? Na cava e duatani duadua kina na kena itukutukuni oqo? (Raica tale ga na ivakamacala e ra.)

15 Vei ira kece na idivi kei Jiova, e duatani duadua na ka e tukuna na iVolatabu me baleta na loloma. Na iVolatabu e kaya ni o Jiova e itaukei ni vuku, lewadodonu, kei na kaukaua. E sega ni dua e tautauvata kei koya ena tolu na kena idivi oqo. Ia, e kaya me baleta na kena ikava: “Sa loloma na Kalou.” * E sega ni taukena na loloma o koya, o koya sara ga na loloma. (1 Joni 4:8) Na cava e kena ibalebale?

16-18. (a) Na cava e kaya kina na iVolatabu ni “sa loloma na Kalou”? (b) Ena veika buli kece era tu e vuravura, na cava e vakatayaloyalotaka vinaka duadua ga kina na loloma ni Kalou na tamata?

16 Na kena tukuni, “Sa loloma na Kalou” e sega ni tautauvata kei na nodra nanuma e so ni “loloma ga na Kalou.” E sega ni rawa nida kaya ni “Kalou ga na loloma.” O Jiova e dua dina na ka bula. E bula dina o koya, e vakila na ka qai vakaitovo ena levu tale na itovo me ikuri ni loloma. Ia, e kilai tani duadua ga ena loloma. Me vaka e kaya e dua na ivola me baleta na tikinivolatabu oqo: “E bula sara ga i Jiova na loloma.” E rawa nida biuta vaka oqo: Na kaukaua i Jiova e cakava rawa kina na ka. Na nona lewadodonu kei na nona vuku e dusimaki koya ena  ka me cakava. Ia, na nona loloma e uqeti koya me cakava kina e dua na ka. Qai kena ilutua ni sega ni dau yali na loloma ena gauna e vakaraitaka kina na vo ni kena idivi.

17 E dau tukuni ni o Jiova na vatuka ni loloma. Ke da vinakata gona meda kila na loloma dina, e dodonu meda kilai Jiova. Ia, de dua eda sa raica na idivi totoka oqo vua na tamata. Ia, e mai tu vakacava vei keda? Ena gauna ni bulibuli, e vakabauti ni a cavuta na vosa oqo o Jiova vua na Luvena: “Daru bulia na tamata me ucui kedaru, me tautauvata kei kedaru.” (Vakatekivu 1:26NW) Vei ira na ka buli kece era tu e vuravura, na tamata ga e rawa ni loloma, ena sala oqo e ucuya kina na Tamana vakalomalagi. Nanuma ni a vakayagataka o Jiova e so na nona ibulibuli mera vakatayaloyalotaka na kena idivi. Ia, e qai digia na ibulibuli cecere duadua e vuravura, na tamata, me vakatayaloyalotaka na kena idivi qoroi duadua, na loloma.—Isikeli 1:10.

18 Nida vakaraitaka na loloma e sega ni veivakaisini, e dodonu qai kilikili, sa da vakaraitaka tiko na idivi e kilai tani duadua kina o Jiova. Me vaka ga e vola na yapositolo o Joni: “Eda sa dauloloma ni sa lomani keda taumada na Kalou.” (1 Joni 4:19, VV) Ia, ena sala cava soti e lomani keda taumada kina na Kalou?

E Liu Sara ga o Jiova

19. Na cava e rawa nida tukuna kina ni loloma i Jiova e dua sara ga vei ira na vuna levu a bulibuli kina?

19 E sega ni ka vou na loloma. Sega li ni oqo ga na ka a uqeti Jiova me tekivu bulibuli kina? E sega ni bulibuli baleta ni galili se gadreva na veitokani. E taucoko o Jiova, e sega ni dua na ka e lekata se gadreva. Ia, na loloma oqo, na itovo e sega ni dau kinoci, e uqeti koya me via vota yani na marau vei ira na nona ibulibuli era na taleitaka na isolisoli oqo. “Ai vakatekivu ni cakacaka ni Kalou” na Luvena e duabau. (Vakatakila 3:14) Sa qai vakayagataki koya na nona matai daucakacaka oqo o Jiova ena bulibuli, tekivu sara ga vei ira na agilosi. (Jope 38: 4, 7; Kolosa 1:16) E vakalougatataki ira na agilosi o Jiova ena bula galala, vuku, mera vakila tale ga na ka. Sa rawa gona vei ira na ibulibuli kaukaua oqo mera bucina na veilomani —vei ira vakataki ira, kei na nodra lomani Jiova. (2 Korinica 3:17NW) Era sa mai veilomani gona, nira a lomani e liu.

20, 21. Eda kila vakacava ni o Jiova a dua na ka nona lomani rau o Atama kei Ivi? Ia, erau qai dolea vakacava na nona loloma?

20 E vaka tale ga oqo vua na tamata. Mai na ivakatekivu, sa vakavatukanataki mai vei rau o Atama kei Ivi na loloma. Se e vei ga erau rai kina ena nodrau itikotiko Parataisi e Iteni, erau na raica ga na ivakatakilakila ni loloma i Tamadrau vei rau. Dikeva na ka e kaya na iVolatabu: “A sa tea e dua na were na Kalou ko Jiova, mai na tu-i-cake mai Iteni, a sa kauta kina na tamata ka bulia ko koya.” (Vakatekivu 2:8) O sa bau sikova e dua na were se veisenikau totoka? Na cava o taleitaka vakalevu duadua? Nomu sarava na rarama ni cila basikata na draunikau ena dua na vanua rugurugua? Na duiroka ena dua na loganisenikau? Na rorogo ni wai ni lutuma toka na savu qai salavata kei na nodra sere na veimanumanu vuka, kei na nodra vagugu na manumanu lalai me vaka na maka? Vakacava na iboi ni veivunikau, na boibetabeta ni vuadra, kei na iboi kamica ni sedra? Ia, se mani vakacava na rairai totoka ni veiloganisenikau era tu nikua, e sega ga ni dua e siviti Iteni. Ena vuku ni cava?

21 E tea na were oya o Jiova! E macala tu ga ni na sega ni tukuni rawa na kena totoka. E tu e kea na kau vinaka kece ga—koya e laukana, kei na kena me saravi tu mada ga ena kena totoka. E bulabula na were oqo ni vakasuasuataki vinaka, vakarautaki vakamaqosa, ra qai bula kina na veimataqali manumanu totoka. Sega tale ni dua na ka me sega ni vakarautaki vei Atama kei Ivi me rau marautaka kina nodrau bula, qai mai tu yani na cakacaka marautaki me rau qarava kei na nodrau veimaliwai vinaka. E liu o Jiova ena nona vakarautaka vei rau na loloma, e sega ni dua na vuna me rau sega ni via dolea lesu kina na loloma levu oqo. Ia, erau vakawaletaka  na loloma oya. Erau sega ni qai lomana na Tamadrau vakalomalagi, erau saqati koya ga ena levu ni nodrau kocokoco.—Vakatekivu, wase 2.

22. E dina ni rau saqati Jiova o Atama kei Ivi, ia e vakaraitaka vakacava na Kalou ni dei na nona loloma?

22 Sa na vakamosia mada ga na loma i Jiova! Ia, e sa vakaotia beka vakadua na nona loloma? Sega! “Sa sega ni mudu na nona loloma.” (Same 136:1) Totolo ga nona vakarautaka tale e dua na isolisoli loloma me vakabulai kina na kawa i Atama kei Ivi e lomana me cakava na ka e dodonu. Me vaka eda sa raica mai, na isolisoli oqo e okati kina nona solia nona bula o koya na Luvena lomani. E sega ni ka rawarawa tale ga oqo vua na Tamana.—1 Joni 4:10.

23. Na cava e dua na vuna e tukuni kina ni o Jiova e “Kalou mamarau,” ia na taro bibi cava ena qai tasereki ena wase e tarava?

23 Io, ena ivakatekivu, a liu o Jiova ena nona vakaraitaka nona loloma vua na kawatamata. E levu dina na gauna a vakaraitaka kina o Jiova ni “sa taumada nona loloma vei keda.” Na loloma e dau vakatubura na duavata kei na marau, sa rauta me vakatokai o Jiova me “Kalou mamarau.” (1 Timoci 1:11NW) Ia, oqo e dua na taro bibi. Vakacava o Jiova, e lomani keda yadua? Ena tasereki oqo ena ulutaga e tarava.

^ para. 11 E dau vakayagataki tale ga ena iVolatabu Vakirisi Vakarisito na vu se verb na phi·leʹo, e kena ibalebale “na loloma ni veiyaloni, veivakamenemenei, se veidredreti (me vaka beka nodrau veivolekati e rua na veitokani dredre se veitacini).” Na vosa na stor·geʹ, se loloma vakaveiwekani, a vakayagataki ena 2 Timoci 3:3 me vakaraitaka ni na kunekunei dredre na loloma vaka oqo ena gauna ni ivakataotioti. E sega ni vakayagataki ena iVolatabu Vakirisi Vakarisito na eʹros, se loloma ni dodomo e dau vakaraitaka e dua na tagane vua e dua na yalewa, e dina ni cavuti na loloma oqo ena iVolatabu.—Vosa Vakaibalebale 5:15-20.

^ para. 15 E so na tikinivolatabu e vaka tale ga oqo na kedra ibiubiu. Me kena ivakaraitaki, “Sa rarama na Kalou” kei na “sa buka waqa caucaudre na noda Kalou.” (1 Joni 1:5; Iperiu 12:29) Ia, me nanumi tiko ni oqo erau ivosavosa ga, erau vakatautauvatani Jiova tiko kei na veika e rairai. O Jiova e vaka na rarama, baleta ni savasava qai dodonu na nona ivalavala. E sega ni taleitaka o koya na ivalavala “butobuto” se veika tawasavasava. Na kaukaua tale ga e tu vua e rawa ni vakatauvatani kei na bukawaqa ni sa yavala me veivakarusai.