Raica sara na lewena

Raica na lewenivola

 WASE 3

“E Savasava, e Savasava, e Savasava o Jiova”

“E Savasava, e Savasava, e Savasava o Jiova”

1, 2. Na raivotu cava a vakatakilai vei Aisea? Na cava eda vulica kina me baleti Jiova?

DUA na ka na qoroqoro nei Aisea, lako vata kei na nona rere, ena raivotu e vakatakila vua na Kalou. Vaka e yaco dina sara tiko ga na ka e raica! E muri, sa qai vola o Aisea ni “raica na Turaga” o Jiova ena nona itikotiko vakaturaga cecere. Qai robota na valenisoro vakaitamera na nona itiniyara.​—Aisea 6:1, 2.

2 E curumi Aisea tale ga na rere ena ka e rogoca​—na vadugu ni sere e lai sakure kina na valenisoro, yavala sara mada ga na kena yavu. Oqo na domo ni nodra sere na serafimi, o ira na ka buli vakayalo cecere sara. E kamica na domo ni nodra sere, ra qai lagata na sere ni veivakalagilagi oqo: “E savasava, e savasava, e savasava o Jiova ni lewe vuqa. E ramaci vuravura taucoko na kena iserau.” (Aisea 6:3, 4NW) E lagati vakatolu na “savasava” me vakaraitaka ni rui bibi sara ga, ia sa rauta, baleta ni savasava i Jiova e uasivi duadua. (Vakatakila 4:8, VV) E vakabibitaki ena iVolatabu taucoko na savasava i Jiova. Vica vata na drau na tikinivolatabu era cavuta vata na yacana kei na “savasava.”

3. Na cava era cakava e levu ena vuku ni nodra rai cala me baleta na savasava ni Kalou?

3 O koya gona, e matata vinaka i ke ni dua tale ga na ka e vinakata o Jiova meda kila me baleti koya oya ni o koya e Kalou savasava. Ia, e levu era raica vakatani na tikina oqo. So era nanuma ni o koya e tukuna ni savasava e vakadonui koya ga vakataki koya se viavia yalododonu. O ira tale ga era dau beci ira era na raica na savasava i Jiova me vaka e dua na ilati, ena sega ni uqeta na lomadra mera toro voleka vua. Era na leqataka nira sa na sega tu ga ni rawa ni toro voleka vua na Kalou savasava oqo. O koya gona, e levu era vakanadakuya na Kalou ena vuku ni nona savasava. E ka rarawataki dina oqo, ni savasava ni Kalou e dodonu me vakauqeti keda sara ga meda toro  voleka vua. Ena vuku ni cava? Ni bera nida sauma na taro oya, meda raica mada na ibalebale dina ni savasava.

iBalebale ni Savasava

4, 5. (a) Cava na ibalebale ni savasava? Na cava e sega ni kena ibalebale? (b) Cava e rua na sala e “wasei tani” kina o Jiova?

4 Nona savasava na Kalou e sega ni kena ibalebale ni sa na yalodredre, viavialevu, se veibeci. E kena veibasai sara ga baleta e cata o koya na ivalavala vaka oya. (Vosa Vakaibalebale 16:5; Jemesa 4:6) O koya gona, na cava na ibalebale dina ni vosa “savasava”? Ena vosa vakaiperiu e taurivaki ena iVolatabu, na vosa oqo e vu mai na dua na vosa e kena ibalebale na “wasei tani.” Ena ka e vauca na sokalou, na ka e “wasei tani” e vakaibalebaletaki ena ka e lewai me kua ni vakayagataki ena dua tale na inaki, me vakatabui. Na savasava e veivolekati tale ga kei na vosa, tawacala, se sekavula. Ia, ni vakayagataki vei Jiova na vosa oqo, na cava na kena ibalebale? Kena ibalebale beka ni “wasei tani” o koya mai vei keda na tamata ivalavala ca, e vakayawaki koya vei keda?

5 Sega sara ga. E dina ni “Yalosavasava ni Isireli” o Jiova, ia e tukuni ni tiko ena ‘kedra maliwa’ na nona tamata ivalavala ca. (Aisea 12:6; Osea 11:9) Na nona savasava gona e sega ni sa lai vakayawaki koya kina vei keda. Ia, ena sala cava e “wasei tani” kina? E rua na kena ibalebale levu. Kena imatai, e wasei tani vei keda na kabula kece ni o koya ga e Kalou e Cecere Duadua. E dodonu vakaoti o koya, e savasava vakaoti. (Same 40:5; 83:18) Kena ikarua, e wasei tani ni sega ni takavi koya e dua na ivalavala ca. Oqo e veivakacegui dina. Ena vuku ni cava?

6. E vakacegui keda vakacava na noda kila ni o Jiova e sega ni takavi koya vakalailai na ivalavala ca?

6 Eda bula ena vuravura e sa kunekunei dredre kina na savasava. Na vuna baleta ni sa tara tu na veibasoga ni bula kece na ivalavala ca. Na yagoda sara mada ga e dau malele ina ivalavala ca. Ena vinakati kina meda kua ni vakawelewele, ia meda vala tiko ga ena veigauna kece me kua kina ni vakaleqai keda na noda bula ivalavala ca. (Roma 7:15-25; 1 Korinica  10:12) Ia, e duatani o Jiova. E sega ni dua na nona ivalavala ca, e tabucala, ena sega kina ni yacovi koya na leqa ena rawa ni yacovi keda. Oqo e vakadeitaka tale vei keda ni o Jiova ga e tama vinaka duadua, e rawa nida vakanuinui vakatabakidua vua. O Jiova e sega ni vakataki ira e levu na tama ivalavala ca e dau torosobu nodra ivalavala, ra vakayacora na ivalavala vakasisila, se ra dau vakalolomataki ira nodra lewe ni vuvale. E tabu ni mena wai na ivalavala vaka oqori, ni o koya e Kalou savasava, e yalododonu. Rawa ni cavuta sara mada ga kina o Jiova nona yalosavasava se yalododonu me ivakadei ni nona vakayacora na ka e bubuluitaka. (Emosi 4:2) E veivakacegui dina oya, se vakaevei?

7. Na cava eda kaya kina ni savasava e tiki sara ga ni bula i Jiova?

7 Na savasava e sega ni itovo i Jiova, e nona bula sara ga. Cava na kena ibalebale oqo? Meda vakatauvatana mada: Vakasamataka mada na vosa “tamata” kei na “ivalavala ca.” E sega ni rawa ni o vakamacalataka na tamata mo qai sega ni okata na noda ivalavala ca. Baleta ni ivalavala ca e sa tiki ga ni noda bula, qai laurai tale ga oqori ena ka kece eda cakava. Ia, vakasamataka mada e rua tale na vosa oqo​—“Jiova” kei na “savasava.” Na savasava e tiki sara ga ni bula i Jiova. Na ka kece baleti koya e uasivi, dodonu, qai sega ni vakamelei rawa. Sega ni rawa nida kilai Jiova ke da sega ni kila na vosa oqo​—“savasava.”

“Sa Vu ni Savasava o Jiova”

8, 9. Na cava e vakaraitaka ni o Jiova e rawa ni vukei keda na tamata ivalavala ca meda okati meda savasava?

8 Na savasava e tiki ni bula i Jiova, o koya sara ga na kena ivurevure. Ia, e sega ni dau burogotaka o koya, e dau vota. Ena gauna mada ga e vosa kina vei Mosese na Kalou mai na dua na vunikau kama ena nona vakayagataka e dua na agilosi, a qai okati na qele erau butuka tu me qele tabu, se me savasava mai na rai i Jiova!​—Lako Yani 3:5.

9 Ke sa rawa ni okata o Jiova me savasava na qele, vakacava o keda na tamata ivalavala ca? Rawa beka nida bau okati meda savasava? Io, e rawa ena veivukei i Jiova. Na Kalou a vakarautaki ira nona tamata na Isireli mera dua na “matanitu savasava.”  (Vakarua 14:2) E vakalougatataka na matanitu oqo ena nona vakarautaka e dua na ivakarau ni sokalou e savasava, e sega ni vakamelei rawa, qai vinaka vakaoti. Sa rauta me vakabibitaki ena Lawa e soli vei Mosese na savasava. Na bete levu sara mada ga e dau kabi toka ena ivauniuluna e dua na tiki ni koula raraba e dau tatibi, ra qai raica kece ga na ka e ceuti toka kina: “Sa vu ni savasava o Jiova.” (Lako Yani 28:36NW) O koya gona, na nodra ivakarau ni bula, kei na nodra veiqaravi, e kilai tani ena ivakatagedegede cecere ni kena savasava kei na kena kilikili. A kaya vei ira o Jiova: “Mo dou savasava; ni’u sa savasava koi au ko Jiova na nomudou Kalou.” (Vunau ni Soro 19:2) E rawa ga nira okati mera savasava na Isireli kevaka era muria tiko ga na ivakaro i Jiova ena kena vinaka duadua e rawata na tamata ivalavala ca.

10. Me baleta na savasava, era duidui vakacava na Isireli mai vei ira na veimatanitu voleka?

10 Na vakabibitaki ni savasava e dua na ka levu e duidui kina o Isireli vei ira na veimatanitu voleka. O ira na veimatanitu voleka era qarava na kalou e lasutaki na kedra itukutuku, ra qai dokadokataka nodra kaya ni o ira na nodra kalou oqo era ivalavala kaukaua, ra kocokoco, ra qai ivalavala vakasisila. E sega ni dua na ka savasava e laurai vei ira na kalou lasutaki oqo. Na nodra qaravi e sa qai kuria ga nodra dukaveluvelu na lewenivanua. Mani vakaroti ira kina nona tamata o Jiova mera tawasei ira mai vei ira na lotu butobuto, kei na nodra ivalavala vakalotu dukadukali.​—Vunau ni Soro 18:24-28; 1 Tui 11:1, 2.

11. E laurai vakacava na savasava ni isoqosoqo vakalomalagi i Jiova vei (a) ira na agilosi? (b) ira na serafimi? (c) Jisu?

11 Ni vinaka vakaoti mada ga na matanitu digitaki i Jiova, o Isireli, e se vakatakarakarataka ga e dua na tiki lailai sara ni savasava ni isoqosoqo vakalomalagi ni Kalou. O ira na vica vata na milioni na ka buli vakayalo era qarava voli na Kalou ena yalodina era vakatokai mera “le oba era sa savasava.” (Vakarua 33:2) E taucoko nodra vakaraitaka na ramase, lagilagi, kei na savasava ni Kalou. Nanumi ira tale ga na serafimi a raivotutaka o Aisea. Eda siqema mai na qaqa ni nodra sere ni o ira na  kabula vakayalo cecere oqo era vakaitavi sara tiko ga ena vakatakilai yani ni savasava i Jiova ina veilomalagi kei na vuravura. Ia, e tiko e dua na kabula vakayalo e cecere vei ira kece na kabula oqo​—o koya na Luve ni Kalou duabau. E sega tale ni dua erau lewerua kei Jisu ena nona ucuya vakavoleka duadua na savasava i Jiova. Sa rauta me tukuni ni o koya na “Le Dua Yalosavasava ni Kalou.”​—Joni 6:68, 69, VV.

Yacana Savasava, Yalona Savasava

12, 13. (a) Na cava e tukuni kina ni savasava na yaca ni Kalou? (b) Na cava me vakarokorokotaki tale kina na yaca ni Kalou?

12 Vakacava na yaca ni Kalou? Me vaka eda sa raica mai ena Wase 1, na yaca oya e sega ni icavuti se ivakatakilakila wale ga. E tukuni Jiova sara tiko ga, nona itovo, kei na veika e kilai kina. Oya na vuna e kaya kina na iVolatabu ni “sa ka savasava . . . na yacana.” (Same 111:9) Ena Lawa a soli vei Mosese, e totogi mate o koya e vosavakacacataka na yaca ni Kalou. (Vunau ni Soro 24:16) Qai vakasamataka na ka e vinakata o Jisu meda vakaliuca ena noda masu: “Tama i keimami mai lomalagi, Me vakarokorokotaki na yacamuni.” (Maciu 6:9) Nida vakarokorokotaka e dua na ka, eda na tawasea tani meda vakatabuya, eda na saga me savasava. Ia, na cava me sagai tale kina me savasava na ka e sa savasava oti tu ena kena ivakatagedegede e cake sara?

13 Sa mai beci na yaca ni Kalou, vakarogorogocataki tale ga ena vosa gaga kei na lasu. Mai Iteni, a tauca o Setani e so na lasu lelevu me baleti Jiova, qai vaka me via vakaraitaka tiko ni o Jiova na Turaga Sau e sega ni Kalou lewadodonu. (Vakatekivu 3:1-5) Me yacova tiko mai nikua, se saga tiko ga o Setani na turaga ni vuravura oqo me vakatetea na veimataqali lasu me baleti koya na Kalou. (Joni 8:44; 12:31; Vakatakila 12:9) Era vakavuvulitaka na veilotu ni voravora na itovo ni Kalou, e yawaki keda, qai dau veivakalolomataki. Era kaya ni tokoni ira na Kalou nira vakadavedra ena ivalu. Sa qai dau tukuni ni veika vakatubuqoroqoro era tu oqo era sega ni ibulibuli ni Kalou, era tubu ga mai vakataki ira. Io, sa bau vakadukai sara ga na yaca ni Kalou. Ia, e dodonu me vakasavasavataki; me vakalesui mai na kena lagilagi.  Eda vinakata sara ga me vakarokorokotaki tale na yacana, me vakadinadinataki tale ga na dodonu ni nona veiliutaki, da qai tu vakarau meda vakaitavi ena inaki lagilagi oqo.

14. Na cava e vakatokai kina na yalo tabu ni Kalou me yalona savasava? Na cava meda qarauna kina meda kua ni vosavakacacataka na yalo tabu ni Kalou?

14 Na yalo i Jiova, se nona igu tawarairai, e dau vakatokai tale ga me yalona savasava. (Vakatekivu 1:2) E dau vakayagataka o Jiova na nona igu kaukaua oqo me vakayacora kina nona inaki. Na ka kece e cakava o Jiova e cakava vakadodonu, vakavinaka, vakasavasava, e veiganiti kina me vakatokai na yalona tabu me yalona savasava. (Luke 11:13; Roma 1:4) O koya e vosavakacacataka na yalo tabu​—e okati kina nona saqata na inaki i Jiova​—ena sega ni bokoci nona ivalavala ca.​—Marika 3:29.

Vuna e Dreti Keda Kina na Savasava i Jiova

15. E savasava vakaoti o Jiova, ia na cava e veiganiti ga kina meda rerevaki koya? Na rere vakacava oqo?

15 E vakaraitaka vakamatata tu na iVolatabu na nodrau lako vata na savasava ni Kalou kei na noda rerevaki koya dina. Me kena ivakaraitaki, e kaya na 2 Korinica 7:1: “Sa i koya oqo me da vakasavasavataki keda kina mai na dukadukali kece ni yago kei na yalo ka bula e na bula savasava sara e na noda rerevaka na Kalou.” Ia, na rere oqo e duatani na mataqali rere. Na rere e yavutaki ena veidokai, na veidokai ena kena ivakatagedegede cecere duadua. Ia, e sa rauta, ni savasava ni Kalou e sa rui uasivi. E dodonu qai lagilagi. Ia, e sega ni dodonu meda tu suka ena vuku ni tikina oqo. Kena veibasai ga, baleta na savasava ni Kalou e dodonu me vakavolekati keda vua. Ena vuku ni cava?

16. (a) E dau cavuti vata vakacava na savasava kei na ka e rairai totoka? Tukuna e dua na kena ivakaraitaki. (b) E vakabibitaki vakacava ena raivotu kei Jiova na nona savasava, nona lagilagi, kei na kena iserau?

16 Dua na vuna oya ni iVolatabu e dau cavuta vata na savasava kei na ka e rairai totoka. E tukuni ena Aisea 63:15 (NW) ni itikotiko vakalomalagi ni Kalou e “itikotiko ni yalosavasava qai rairai totoka.” Eda dau taleitaka na ka e rairai totoka. Me kena ivakaraitaki, raica mada na iyaloyalo ena tabana e 33. Sega ni vakabekataki  ni o taleitaka dina na iyaloyalo oqori. Na cava o taleitaka kina? E makare na wai. Sega ni vakabekataki ni na mudre vinaka tu e kea na cagi bulabula. Ia, kaya mada ke qai veisau na irairai ni iyaloyalo oqo​—me sa benu wale ga na yasa ni uciwai, ra tatalaki na kau ra qai volavolai na vatu, qai robota na vanua na iboi ni benu​—sega sara ga ni dua ena via volekata yani; eda na sega ni taleitaka. Sa macala tu ga ni ka e rairai totoka e dau savasava, makare, qai serau. Ia, o ira sara ga na vosa oqo e rawa nira vakamacalataka na savasava i Jiova. Sa rauta meda qoroya na nona dau vakamacalataki o Jiova ena raivotu! E serau ena rarama, e makuwaliliva me vaka na vatutalei, e waqa me vaka na buka se kaukamea dina ni tavuni​—e vaka sara ga oqori na totoka ni noda Kalou savasava.​—Isikeli 1:25-28; Vakatakila 4:2, 3.

17, 18. (a) E tarai Aisea vakacava na raivotu a raica? (b) E vakayagataka vakacava e dua na serafimi o Jiova me vakacegui Aisea? Na cava na ibalebale ni ka e cakava na serafimi?

17 Ia, ena vuku ni lagilagi ni Kalou kei na nona savasava, kena ibalebale beka oqo nida sa na bau lolovira sara ga o keda? E kena isau dodonu na io. Eda lolovira dina ga o keda me vakatauvatani kei Jiova​—io, eda lolovira sara ga! Ia, meda yawaki Jiova beka ena vuku ni tikina oqo? Dikeva mada na ka a qai kaya o Aisea ni rogoci ira na serafimi nira kacivaka voli na savasava i Jiova. “Au a qai kaya: ‘Isa koi au! ni’u sa ca; ni’u sa tamata tebenigusu qeleqelewa, au sa tiko talega kei ira na tamata tebenigusu qeleqelewa: ni sa raica na Tui ko Jiova ni lewe vuqa na mataqu.” (Aisea 6:5) Io, ni raica o Aisea na lagilagi i Jiova kei na nona savasava, sa qai liaca na nona dukadukali kei na nona tamata ivalavala ca. Tarai koya sara ga na turaga yalodina oqo na ka e raica, e rarawa qai yalolailai kina. Ia, e sega ni vakalaivi koya tu o Jiova ena ituvaki oya.

18 E qai vakacegui koya na parofita oqo e dua na serafimi. Ena sala cava? E vuka ina icabocabonisoro na kabula vakayalo kaukaua oqo, kauta mai e dua na qilaiso, qai mai tara kina na tebenigusu i Aisea. O na kaya beka ni oqo e sega sara ga ni veivakacegui, ena mosi ga. Ia, nanuma tiko ni ka e raivotutaka oqo  o koya, e tiko na kena ibalebale. E kila vinaka o Aisea e dua na Jiu yalodina, ni dau cabo e veisiga na isoro ena icabocabonisoro me kerei kina na veivosoti ni ivalavala ca. E dina ni ivalavala ca na parofita oqo, e “tebenigusu qeleqelewa,” ia e qai vakadeitaka tale vua na serafimi ni se rawa ga ni vakadonui koya na Kalou. * Kena ibalebale oqo ni o Jiova e se rawa ga ni okata na tamata ivalavala ca me savasava.​—Aisea 6:6, 7.

19. Eda tamata ivalavala ca, ia e rawa vakacava meda bau savasava toka?

19 Oqo e dina tale ga nikua. Na isoro taucoko e dau cabori ena icabocabonisoro e Jerusalemi era iyaloyalo ni dua na ka e uasivi cake​—na isoro uasivi duadua ga e cabora o Jisu Karisito ena 33 S.K. (Iperiu 9:11-14) Ke da veivutunitaka dina noda ivalavala ca, vakadodonutaka na noda ilakolako, da qai vakabauta na isoro oya, eda sa na qai vosoti. (1 Joni 2:2) E rawa tale ga ni vakadonui keda na Kalou. Oya na vuna e vakadreti keda kina na yapositolo o Pita: “Ni sa volai, Dou yalosavasava; ni’u sa yalosavasava koi au.” (1 Pita 1:16) E sega ni tukuna tiko e ke o Jiova me tautauvata noda savasava kei na nona savasava. E sega vakadua  ni kerea vei keda o koya na ka eda na sega ni rawata. (Same 103:13, 14) E tukuna ga vei keda o Jiova meda savasava, baleta ni savasava o koya. Nida nona “gone ni toko,” eda na saga meda vakatotomuri koya ena kena levu duadua eda rawata. (Efeso 5:1) Ena sega gona ni dua na itinitini ni noda saga meda savasava, oqo e dua na ka eda na saga tiko ga. Nida tubu cake vakayalo, eda na saga tiko ga e veisiga meda “bula ena bula savasava sara.”​—2 Korinica 7:1, VV.

20. (a) Na cava e bibi kina meda kila ni rawa nida savasava ena mata ni noda Kalou savasava? (b) Cava e yacovi Aisea ena gauna e kila kina ni sa vosoti na nona ivalavala ca?

20 E vinakata o Jiova na ka e dodonu, e savasava. E cata na ivalavala ca. (Apakuki 1:13) Ia, e sega ni cati keda. E rawa ni vosota noda ivalavala ca, kevaka wale ga eda raica na ivalavala ca me vaka nona raica o koya na ivalavala ca​—meda cata na ka ca, meda vinakata na ka vinaka​—da qai saga meda vakatotomuria na we ni yava i Jisu Karisito, na tamata uasivi. (Emosi 5:15; 1 Pita 2:21) Rawa ni veisautaka sara ga noda rai ke da kila ni Kalou savasava e rawa ni okati keda meda savasava. Nanuma ni savasava kei na lagilagi ni Kalou e lai maduataki koya kina o Aisea ena nona dukadukali. E tagicaka kina: “Isa Koi au!” Ia, ena gauna e kila kina ni sa vosoti nona ivalavala ca, e veisau sara ga na nona rai. Ni taro o Jiova se o cei me tala ena dua na ilesilesi, sega ni bera o Aisea ena nona kailavaka yani: “Koi au oqo; mo ni talai au,” e dina ni se sega mada ga ni kila na ka e vauci ena ilesilesi oya.​—Aisea 6:5-8.

21. Na yavu cava e rawa nida nuitaka kina ni rawa nida bau saga toka meda savasava?

21 Eda buli meda ucuya na Kalou savasava, e tugani e lomada na ivalavala uasivi e so, meda dau taleitaka tale ga na veika vakayalo. (Vakatekivu 1:26) E rawa gona nida bau savasava toka ke da sasagataka. Ia, ena tu vakarau o Jiova me vukei keda ena tikina oqo. Oqo ena vakavolekati keda tale ga vua noda Kalou savasava. Nida sa na dikeva na veika e so e dau kilai tani kina o Jiova ena ivola oqo, sa da na qai raica ni levu sara na vuna meda saga kina meda toro voleka vua!

^ para. 18 Na vosa “tebenigusu qeleqelewa” e veiganiti sara ga, ni dau vakayagataki ena iVolatabu na tebenigusu me vakaibalebaletaka na vosa. Vei keda na tamata, e levu ga na noda ivalavala ca e vu tiko mai na vosa eda cavuta.​—Vosa Vakaibalebale 10:19; Jemesa 3:2, 6.