Vakasamataka mada na ituvaki qo: Erau se qai veitau voli ga me rua na vula o Heather kei Mike. Ia vaka ga erau sa veikilai tu ena nodrau bula taucoko. Erau dau vakauitukutuku qai veitalanoa tu me vica vata na aua ena talevoni. E totoka na nodrau dau veitalanoa! Ia qo sa sega ni via veitalanoa ga o Mike.

Erau dau veitauriliga tu ga e liu o Mike kei Heather, rau regu tale ga vakalailai. E vinakata o Heather me yala toka ga e kea. Ena yasana adua, e leqataka ke biuti koya o Mike o cei sa na qai vakamenemenei koya? Dua tale na ka e vakasamataka o Heather, ‘Keirau veivinakati kei Mike. . . ’

Ke o sa rawa ni veibuku o qai sotava e dua na ituvaki va ya, cava o na cakava?

Ke o lade mai na dua na vunikau o qai via vuka me vaka na manumanuvuka, o na sotava ga na leqa. Ena va tale ga qori ke o beca na lawa e vauca na itovo savasava. Kena ivakaraitaki: “Vakatabui kemuni mai na veiyacovi tawadodonu.”—1 Cesalonaika 4:3.

Na cava ena yaco ke o talaidredre ina ivakaro qori? E kaya na iVolatabu: “O koya e veiyacovi tawadodonu sa valavala ca sara tiko ga e yagona.” (1 Korinica 6:18) E dina vakacava qori?

 Era raica na dauvakadidike ni levu na itabagone era veiyacovi ni se bera na vakamau era sotava e vica na leqa qo.

• NUIQAWAQAWA. Era kaya e levu na itabagone era veiyacovi ni bera na vakamau, nira veivutunitaka na ka era cakava.

• SEGA NA VEINUITAKI. Oti ga na nodrau veiyacovi e dua na cauravou kei na goneyalewa, rau sa na tekivu veinanuyaka, ‘O cei tale sa veiyacovi kei na noqu itau?’

• RARAWA. Era vinakata e levu na goneyalewa mera taqomaki, sega ni vakayagataki ga. Levu na gauna, sa oti ga na kamica kei goneyalewa ena gauna erau veiyacovi oti kina kei na dua na cauravou.

• Nanuma tiko: Ke o veiyacovi ni bera na vakamau, o sa vakalolovirataki iko ni o solia e dua na ka vakamareqeti. (Roma 1:24) E ka vakamareqeti na yagomu, kua gona ni solia vakaveitalia!

Vakadeitaka mo ‘vakatabui iko mai na veiyacovi tawadodonu.’ (1 Cesalonaika 4:3) Ke o vakawati ena dua na gauna, o rawa ni qai veiyacovi. O na marautaka sara vakalevu ena gauna qori, ni sega ni dua na ka mo leqataka se veivutunitaka. O na sega tale ga ni nuiqawaqawa me vaka era dau vakila o ira na veiyacovi ni bera na vakamau.—Vosa Vakaibalebale 7:22, 23; 1 Korinica 7:3.

• Vakacava ena vinakata o koya e lomani iko dina mo rarawa se sotava na leqa?

• Ena temaki iko beka o koya e kauaitaki iko dina mo cakava na ka ena vakaleqa nomu veiwekani kei na Kalou?—Iperiu 13:4.