Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 TARO 4

Na Cava Meu Cakava Keu Cala?

Na Cava Meu Cakava Keu Cala?

VUNA MO VAQAQA KINA

O na dokai qai nuitaki ke o vakaraitaka vakadodonu na cala o cakava.

CAVA O NA CAKAVA?

Vakasamataka mada na ituvaki qo: E qito tiko kei ira na nona itokani o Tim. E viritaka yani na polo, qai kavoro kina na katubaleka ni dua na vale voleka.

Na cava o na cakava ke o tu ena ituvaki ya?

VAKASAMA QAI VAKATULEWA!

TOLU NA KA O RAWA NI CAKAVA:

  1. Dro.

  2. Beitaka tale e dua.

  3. Tukuna vei taukeinivale na ka e yaco, tukuna tale ga ni o na sauma na ka e vakacacani.

E rawarawa sara mo digia na imatai ni vakatutu. Ia se mani o vakavorotaka na katubaleka se dua tale na cala o cakava, e vinaka ga mo vakaraitaka vakadodonu.

 TOLU NA VUNA MO VAKARAITAKA KINA VAKADODONU NOMU CALA

  1. E dodonu ga mo cakava qori.

    E kaya na iVolatabu: “Keitou vinakata me keitou dina ena ka kece.”—Iperiu 13:18.

  2. E dau rawarawa na nodra vosoti o ira era dau tukutuku vakadodonu.

    E kaya na iVolatabu: “O koya e ubia na nona cala ena sega ni rawaka, ia o koya e vakatusa qai biuta ena lomani.”—Vosa Vakaibalebale 28:13.

  3. Na vuna bibi duadua, oya ni vakamarautaka na Kalou.

    E tukuna na iVolatabu: “Ni sevaka o Jiova na tamata lawakica, ia e veitokani voleka kei ira na yalododonu.”—Vosa Vakaibalebale 3:32.

A sega ni tukuna vei tamana o Karina, e yabaki 20, ni a totogitaki ena dua na gauna ena ivakarau ni nona draiva. Ia a qai kilai na ka e yaco. E kaya o Karina: “Oti e dua na yabaki, a raica o noqu Ta na risiti e vakaraitaki tu kina niu a totogitaki. Sa qai leqa levu sara ya!”

Cava e vulica o Karina ena ituvaki ya? E kaya: “Ena vakalevutaka ga na leqa na nomu via vunitaka na nomu cala. Ena qai kilai ga ena dua na gauna na ka o cakava!”

VULI MAI NA NOMU CALA

E kaya na iVolatabu: “Eda dau tarabe kece.” (Jemesa 3:2) Nomu tukutuku vakadodonu ena gauna ga o cala kina, e vakaraitaka ni o yalomalumalumu qai yalomatua.

Ni o cala, saga mo vuli mai na ka o cakava. E kaya e dua na goneyalewa o Vera: “Gauna kece au cala kina, au dau vakasamataka na veika meu vakavinakataka, kei na ka meu cakava me kua ni yaco tale kina na leqa ya.” Raica mada se o rawa ni cakava tale ga vakacava ya.

O vakacacana na motopai nei nomu Ta. Cava o na cakava?

  • Vagaluya tu ga, de dua ena sega ni kidava o nomu Ta ni sa ca nona motopai.

  • Tukuna vei nomu Ta na ka e yaco.

  • Tukuna na ka e yaco, ia beitaka tale e dua.

O sega ni rawata na nomu veitarogi ni o sega ni vuli lesoni. Cava o na cakava?

  • Tukuna ni sa rui dredre na pepa ni veitarogi.

  • Tukuna ni bale ga vei iko na nomu sega ni rawata na nomu veitarogi.

  • Beitaki qasenivuli ni sega ni dau taleitaki iko.

Nomu dau vakasamataka na nomu cala ena veigauna sa oti e vaka ga ni o draiva o qai rai tiko i muri

 Vakasamataka tale na ituvaki sa cavuti oti mai, qai biuti iko ena kedrau ituvaki o nomu Ta kei na nomu qasenivuli. Na cava rau na kaya o nomu Ta kei nomu qasenivuli ke o dau vakaraitaka vakadodonu na cala o cakava? Na cava rau na kaya ke o sega ni dau vakaraitaka vakadodonu na cala o cakava?

Vakasamataka e dua na cala o cakava ena yabaki sa oti, qai sauma na taro qo.

Na cala cava o cakava? O qai walia vakacava na leqa qori?

  • Au vagaluya tu ga.

  • Au beitaka tale e dua.

  • Au vakaraitaka vakadodonu.

Na cava o vakila ni o vagaluya tu ga na nomu cala?

  • Marau, ni sega ni kilai na ka au cakava!

  • Ora na lomaqu, keu se tukutuku ga vakadodonu.

Na cava o na via vakavinakataka ena ituvaki o sotava ya?

Na cava o vulica ena cala o cakava?

CAVA O NANUMA?

Na cava e dau dredre kina vei ira eso mera vakaraitaka vakadodonu na cala era cakava?

Na cava era na kaya eso tale ke o sega ni dau vakaraitaka na cala o cakava?

Na cava era na kaya eso tale ke o dau vakaraitaka vakadodonu na cala o cakava?—Luke 16:10.