Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 TARO 6

Au na Vorata Vakacava na Veimurimuri?

Au na Vorata Vakacava na Veimurimuri?

VUNA MO VAQAQA KINA

Ke o kila na ka e dodonu mo cakava, o na rawa ni vakatulewa vakataki iko ra qai sega ni lewai iko eso tale.

CAVA O NA CAKAVA?

Vakasamataka mada na ituvaki qo: E taqaya o Brian ni rau sa volekati koya yani e rua na nona icaba mai koronivuli. Qo na ikatolu ni gauna rau via solia kina vei Brian na tavako.

E kaya e dua vei rau na gonetagane:

“Isa, se baci tiko taudua! Vakacava me sa nomu itokani ga o koya qo.”

Na itokani e vakaibalebaletaka tiko na gonetagane ya na tavako. E taura mai na nona taga, solia sara vei Brian.

Sa qai tagaya ga o Brian ni raica na tavako.

“Vosota,” e kaya o Brian, “Au sa tukuna oti niu sega. . . ”

E vosa sara na ikarua ni gonetagane: “Kua ni dau lamulamu!”

“Au sega ni lamu!” E kaya ena doudou o Brian.

E toso volekati Brian na ikarua ni gonetagane, qai kaya vakamalua vua: “Taura mada ga.”

E taura cake i matai Brian na imatai ni gonetagane na tavako, qai kaya: “Sega ni dua tale ena kila. Tou na kila tiko ga o kedatou.”

Na cava o na cakava ke o sotava na ituvaki ya?

 VAKASAMA QAI VAKATULEWA!

Kena irairai ni rau sega ni bau vakasamataka na nona icaba o Brian na ka erau cakava. Erau sega tale ga ni vakatulewa vakataki rau. Ni rau vinakata me rau taleitaki, erau sa vakamalumalumu tu ga ina veika era tukuna eso tale me rau cakava.

O na vorata vakacava na veimurimuri?

  1. VAKAVAKARAU RAWA

    E kaya na iVolatabu: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”—Vosa Vakaibalebale 22:3.

    Ni o raica ga eso na ituvaki, o kila sara ni rawa ni yaco kina na leqa. Kena ivakaraitaki, era vakatavako toka eso na nomu icaba ena gaunisala o muria tiko yani. Ke o vakarautaki iko rawa ina ituvaki va qori, o na kila na ka mo cakava.

  2. VAKASAMA

    E kaya na iVolatabu: “Me vinaka tiko ga na nomuni lewaeloma.”—1 Pita 3:16.

    Vakasamataka na taro va qo, ‘Na cava ena yaco keu veimurimuri?’ De dua era na sega ni taleitaki iko na nomu icaba ni o sega ni veimurimuri. Ia ena lekaleka ga qori ni vakatauvatani kei na veika o na sotava ke o veimurimuri. Vakacava o na biuta vakatikitiki na ka o vakabauta mo vakamarautaki ira kina na nomu icaba?—Lako Yani 23:2.

  3. VAKATULEWA

    E tukuna na iVolatabu: “O koya e vuku e qaqarauni.”—Vosa Vakaibalebale 14:16.

    Eda na vakatulewa kece ena dua na gauna, eda na sotava tale ga na vinaka se ca ni noda vakatulewa. Era cavuti ena iVolatabu eso e donu nodra vakatulewa me vakataki Josefa, Jope, kei Jisu. Era cavuti tale ga kina eso e cala nodra vakatulewa me vakataki Keni, Iso, kei Jutasa. Vakacava o iko, o na vakatulewa vakacava?

E kaya na iVolatabu: “Cakacaka ena yalodina.” (Same 37:3) E bibi mo vakasamataka rawa na leqa ena yaco ena dua na ituvaki, me matata tale ga vei iko na ka mo cakava. Qori ena vakarawarawataka nomu vakatulewa, o na vakatulewa tale ga vakavinaka.

Sega ni gadrevi mo vunauci ira na nomu icaba. O rawa ni tukuna ga vakadodonu na SEGA. Ia ke o via kuria vakalailai ya me kilai kina ni o dei ena nomu vakatulewa, o rawa ni kaya:

  • “Au na sega ni cakava qori!”

  • “Au sega ni dau cakava na ka va qori!”

  • “Raica, o kila vinaka niu sega ni dau cakava qori!”

Ke o yavala totolo qai dei ena nomu vakatulewa, era na rairai sega ni via vakasagai iko na nomu icaba!

 KA MO CAKAVA KE O VAKALIALIAI

Ke ra rawai iko na nomu icaba ena veimurimuri, o sa vaka na robot e lewai na ka me cakava

Vakacava ke ra vakalialiai iko na nomu icaba nira kaya: “E cava, o lamu?” Na inaki ni veivakalialiai va qori mo rawai ena veimurimuri. E rua na ka o rawa ni cakava ena ituvaki va qori.

  • Ciqoma na veivakalialiai. O rawa ni kaya: “Io, au rere!” Oti vakamacalataka vakalekaleka na vuna.

  • Vosa vakadodonu. Vakamacalataka na vuna o vakasega kina, qai tukuna e dua na ka ena vakasama kina o nomu icaba. Kena ivakaraitaki, o rawa ni kaya: “Au nanuma ga ni o vuku, o na sega ni vakatavako!”

Ke ra vakalialiai iko tiko ga na nomu icaba, e vinaka mo gole tani! Na dede ga ni nomu tiko, na kena rawarawa tale ga mo vakamalumalumu vei ira. Na nomu biubiu ena vakaraitaka nira na sega ni lewa eso tale na ka o cakava.

O na sega ni drovaka rawa na veitemaki mo veimurimuri. Ia o rawa ni vakatulewataka na ka mo cakava, vakamacalataka na vuna o sega ni cakava kina e dua na ka, qai vakatulewa ga vakataki iko. Na ka o na cakava ni o temaki mo veimurimuri e vakatau sara ga vei iko!—Josua 24:15.