Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E vakadinadinataki ena soqo vakairogorogo ni 1919 nira sa sereki dina na tamata ni Kalou vei Papiloni na Ka Levu

 KATO NI VEIVAKAVULICI 9B

Yabaki 1919

Yabaki 1919

Na cava eda kaya kina nira sereki na tamata ni Kalou vei Papiloni na Ka Levu ena 1919? Eda kila qori mai na kena dikevi vata na parofisai vakaivolatabu kei na itukutuku dina ni veigauna.

Na parofisai vakaivolatabu kei na itukutuku ni veigauna e vakadinadinataka ni a tekivu veiliutaki mai lomalagi o Jisu ena 1914, e tekivu kina na iotioti ni veisiga kei vuravura qo ena veiliutaki i Setani. Na cava e cakava o Jisu ni sa Tui? Vakacava e sereki ira totolo na nona dauveiqaravi e vuravura era vesuki tu vei Papiloni na Ka Levu? A digitaka na “dauveiqaravi yalodina e vuku” ena 1914 qai tekivu sara ena cakacaka levu ni tatamusuki?​—Maciu 24:45.

E macala ga ni sega. Nanuma tiko ni a uqeti vakalou o Pita me vola ni na ‘tekivu ena vale ni Kalou’ na tau ni lewa. (1 Pita 4:17) E parofisaitaka tale ga na parofita o Malakai na gauna ena lako mai kina o Jiova ina nona vale ni sokalou, ena tomani koya mai na “italai ni veiyalayalati,” na Luve ni Kalou. (Mala. 3:1-5) Qori na gauna ni veivakasavasavataki kei na veivakatovolei. Vakacava e tautauvata na itukutuku ni veigauna kei na ka e parofisaitaki ya?

Io! Era kilai tu e liu na iVakadinadina i Jiova mera Gonevuli ni iVolatabu. E gauna dredre dina vei ira na 1914 ina itekitekivu ni 1919, oya nira vakatovolei ra qai vakasavasavataki kina. E levu na tamata ni Kalou era rarawataka ni a sega ni yaco na icavacava ni veika vakavuravura ena 1914. Sa qai ikuri ga ni nodra rarawa na nona takali o Charles T. Russell ena 1916, ni a liutaki ira vinaka tiko na tamata ni Kalou. O ira na volekati Brother Russell era saqata vakaukaua na sasaga i Joseph F. Rutherford, na isosomi kei Russell. Yaco na veisei, e voleka sara ni tawase kina na isoqosoqo ena 1917. Ia ena 1918, ena nodra veivakauqeti na iliuliu ni lotu, e veilewaitaki kina o Brother Rutherford kei na vitu tale nona ilala, eratou beitaki vakailasu qai bala e valeniveivesu. E mani sogo na itikotiko liu e Brooklyn. E macala kina nira se vesuki tu na tamata ni Kalou vei Papiloni na Ka Levu!

Ia cava e yaco ena 1919? E veisau vakasauri na ituvaki! Ena itekitekivu ni yabaki qori, eratou sereki mai valeniveivesu o Rutherford kei na nona ilala. Eratou sega ni wele, ni ratou tomana tale nodratou cakacaka! E totolo ga na kena tuvanaki e dua na soqo vakairogorogo, e vakarautaki tale ga e dua na mekesini vou na Golden Age, (nikua sa Yadra!). E vakarautaki na mekesini qori me baleta na cakacaka vakaitalatala e matanalevu. E lesi tale ga e dua ena ivavakoso yadua me tuvanaka na cakacaka vakaitalatala, me veivakauqeti tale ga kina. Ena yabaki tiko ga qori e tabaki kina na Bulletin (nikua sa iVola ni Soqoni​—Noda Bula vaKarisito kei na Cakacaka Vakaitalatala) me yaga ena tuvanaki ni cakacaka vakavunau.

E macala mai na ka e yaco qori, ni o Karisito sa sereki ira na nona tamata vei Papiloni na Ka Levu. E sa lesia na nona dauveiqaravi yalodina e vuku. Sa caka tiko na cakacaka ni tatamusuki. Sa qai totolo ga na toso ni cakacaka me tekivu mai na yabaki vakairogorogo ni 1919.