Raica sara na lewena

Raica na lewenivola

 KATO NI VEIVAKAVULICI 15A

O Rau na Veitacini Saqamua

O Rau na Veitacini Saqamua

Eda na raica ena Isikeli wase 23, na nodra vosataki e matanalevu na tamata ni Kalou nira tawayalodina. Levu na sala e tautauvata kina na wase qori kei na wase 16. Me vaka ga na itukutuku e volai taumada, e vakayagataki ena wase 23 na ivakatautauvata ni saqamua. E tukuni ni qase o Samaria, gone o Jerusalemi. Na wase ruarua qori e vakaraitaka nona muri tuakana ena ivalavala vakasaqamua o koya e gone, ia e torosobu sara o gone ena ca kei na itovo vakasisila. Ena wase 23, e vakayacani rau o Jiova me: Aola o koya e qase me dusi Samaria, na koroturaga ni yavusa e tini ena matanitu o Isireli; o Aolipa e gone, e dusi Jerusalemi, na koroturaga kei Juta. *​—Isik. 23:1-4.

Eso tale na ka erau tautauvata kina na wase ruarua. Vakabibi na tikina qo: Ni se qai tekivu, rau a vaka na wati Jiova na saqamua ruarua qo, oti rau qai liumuritaki koya. E yalataki tale ga kina na inuinui. E sega ni vakamacalataki sara vakamatailalai ena wase 23 na inuinui ni veisereki, ia e tautauvata kei na wase 16 ni kaya o Jiova: “Au na muduka na nomu ivalavala torosobu kei na nomu itovo vakasaqamua.”​—Isik. 16:16, 20, 21, 37, 38, 41, 42; 23:4, 11, 22, 23, 27, 37.

Erau Vakatayaloyalotaki Lotu ni Veivanua vaKarisito?

E dau vakamacalataki e liu ena noda ivola ni o rau na veitacini, o Aolipa kei Aola erau vakaibalebaletaki lotu ni Veivanua vaKarisito kei na nodra tawase na lotu Katolika kei na vakabauta ni lotu Tawase. Ia ni vakasamataki vakatitobu, salavata na masu kei na vakadidike e basika kina eso na taro. Sa bau dua na gauna me wati Jiova kina o lotu ni Veivanua vaKarisito? Sa bau veiyalayalati oti kei koya? Macala ga ni sega. A se sega ni dua na lotu ni Veivanua vaKarisito ena gauna e veisorovaki kina o Jisu ena “veiyalayalati vou” kei ira na Isireli vakayalo; e sega tale ga ni bau tiki ni matanitu vakayalo qori era lewena na lotu vaKarisito lumuti. (Jere. 31:31; Luke 22:20) A sega tu na lotu ni Veivanua vaKarisito me yacova na gauna ratou sa mate kina na yapositolo. E qai kilai ena ikava ni senitiuri G.V. me isoqosoqo ca qai vukitani era lewena “na co ca” qo o ira na lotu vaKarisito lasu e parofisaitaka o Jisu me baleta na witi kei na co ca.​—Maciu 13:24-30.

Qo e dua tale na ka e duidui kina o rau na veitacini kei lotu ni Veivanua vaKarisito: E vakarautaka o Jiova na inuinui ni rau na rawa ni vakabulai tale o Jerusalemi kei Samaria tawayalodina. (Isik. 16:41, 42, 53-55) Vakacava, e bau tukuna na iVolatabu e dua na inuinui va qori vei lotu ni Veivanua vaKarisito? Sega! E sega ni dua na nona inuinui me vakataki Papiloni na Ka Levu ga.

O koya gona, erau sega ni vosa vakaparofisai ni lotu ni Veivanua vaKarisito o Aola kei Aolipa. Na nodrau cavuti o rau qo e vukei keda ga meda kila na ivakarau ni rai i Jiova, me baleti ira na vakarogorogocataka na yacana tabu kei na nona ivakatagedegede ni sokalou savasava. E beitaki vakalevu o lotu ni Veivanua vaKarisito ni levu na nona matalotu era kaya nira matataka na Kalou e nona na iVolatabu. Koya e bibi sara nira kaya ni nodra iliuliu o Jisu Karisito, na luvena duabau ga o Jiova. Ia e sega ni laurai vei ira na vakabauta qori nira tukuna tale, ni o Jisu e letoluvakalou ra qai talaidredre ena nona ivakaro matata mera “sega ni vakavuravura.” (Joni 15:19) Nona dau vakaitavi vakalevu ena qaravi matakau kei na veika vakapolitiki, e vakadinadinataka kina o lotu ni Veivanua vaKarisito ni tiki kei “na saqamua levu.” (Vkta. 17:1) Macala gona ni na wili tale ga ena ka ena yaco vua na isoqosoqo ni lotu lasu kece e vuravura!

^ para. 3 E vakaibalebale na yaca ruarua qo. O Aola e kena ibalebale “Nona Valelaca [ni Sokalou],” oya na nodra vakaduria ga vakataki ira na vanua ni sokalou, era sega ni vakayagataka na valenisoro i Jiova e Jerusalemi. Ia o Aolipa e kena ibalebale “Noqu Valelaca [ni Sokalou] e Tiko [Vua].” E tiko e Jerusalemi na vale ni sokalou i Jiova.