Raica sara na lewena

Raica na lewenivola

 KATO NI VEIVAKAVULICI 14A

Ka e Vulici ena Raivotu i Isikeli me Baleta na Valenisoro

Ka e Vulici ena Raivotu i Isikeli me Baleta na Valenisoro

Vakacerecerei Qai Taqomaki na Sokalou Savasava

E vakacerecerei na valenisoro e raivotutaki ena “dua na ulunivanua cecere” (1). Vakacava eda sa tokona tiko na sokalou savasava, me bibi duadua ena noda bula?

Na bai wavoki (2), e wavokita taucoko na lomanibai, e tiko e lomadonu na valenisoro (3), e vakadreti keda meda kua ni vakalaiva e dua na ka me vakaleqa noda sokalou vei Jiova. Ke vinakati mada ga me yawaka na sokalou savasava na ka e “sega ni tabu,” sa qai wacava na kena vinakati vua e dua e sokaloutaki Jiova nikua me kua ni vakaitovotaka na ka dukadukali!​—Isik. 42:20.

Vakalougatataki Tawamudu

E drodro tiko mai na vanua tabu ni valenisoro e dua na uciwai, e lai yaco sara ina dua na savu, e vakabulabulataka na vanua (4). Ena veivosakitaki ena Wase 19 ni ivola qo na veivakalougatataki qori.

Tautauvata na iVakatagedegede Vei Keda Kece

Na matamata cere e tuba (5) kei na matamata cere e loma (9) e vakadreti keda ni tiko na ivakatagedegede cecere e vinakata o Jiova vei ira kece na sokalou savasava. E tautauvata na levu ni matamata e tuba kei na matamata e loma kei na kedrau ivakarau. E veiganiti qori, ni tautauvata ga na ivakatagedegede dodonu e vinakata o Jiova vei ira kece na nona dauveiqaravi, se mani itavi cava era qarava, se na dede ni gauna era veiqaravi voli kina.

Magiti ena Teveli i Jiova

Na rumunikana (8) eda lai vakadreti kina ni o ira ena gauna makawa era rawa ni kania eso na isoro era kauta ena valenisoro, me vaka ga era lai kana vata kei Jiova. E duidui qori ena valenisoro vakayalo era sokalou kina nikua na lotu vaKarisito, ni sa cabori oti vakadua e “dua ga na isoro.” (Iper. 10:12) Ia eda na cabora ga na noda isoro ni veivakacaucautaki.​—Iper. 13:15.

iVakadei vaKalou

O na rairai qoroya na matailalai ni ivakarau e taurivaki ena raivotu. Ia eda vulica kina e dua na tikina bibi: E vakadeitaka ni na vakalesuya dina mai o Jiova na sokalou savasava me vaka e nona inaki, e matata qai sega ni veisau me vaka ga na ivakarau e tauri. E sega ni tukuna o Isikeli ni raica e dua na tamata ena raivotu, ia e volaitukutukutaka na nona vunauci ira vakaukaua na bete o Jiova, vaka kina o ira na turaga kei ira na tamata. Mera tokona kece na dauveiqaravi ni Kalou na nona ivakatagedegede dodonu.