Raica sara na lewena

Raica na lewenivola

 KATO NI VEIVAKAVULICI 1A

iBalebale ni Sokalou

iBalebale ni Sokalou

Na sokalou e rawa ni kena ibalebale “na ivakarau ni nomu doka se lomana e dua na kalou.” Na vosa taumada ni “sokalou” ena iVolatabu, e rawa ni kena ibalebale nona veidokai vakalevu e dua, se vakamalumalumu vua na veika buli. (Maciu 28:9) Na vosa qori e rawa ni dusia tale ga na ivakarau ni lotu vua na Kalou se kalou tani. (Joni 4:23, 24) Ena kilai na ibalebale ni vosa ena veitikina wavolita se na ivakamacala ena parakaravu.

E ganiti Jiova duadua ga me qaravi ni Dauveibuli qai Turaga Cecere Duadua. (Vkta. 4:10, 11) Eda sokaloutaki Jiova nida doka nona veiliutaki cecere, nida rokova tale ga na yacana. (Same 86:9; Maciu 6:9, 10) Qori sara ga na rua na usutu​—na veiliutaki cecere i Jiova kei na yacana​—e vakabibitaki vakalevu ena ivola na Isikeli. E rauta ni volai vaka212 ena ivola ga ni Isikeli na matavosa “Turaga Cecere Duadua o Jiova,” qai vaka55 na matavosa “kila ni o yau o Jiova.”​—Isik. 2:4; 6:7.

E sega ni okati ga ena sokalou na ivakarau ni lomada, ia e bibi tale ga me cakacakataki. (Jeme. 2:26) Nida yalataki keda vei Jiova, eda sa bubuluitaka ena noda ivakarau ni bula nida na talairawarawa vua me noda iLiuliu, eda na doka tale ga vakalevu na yacana. Nanuma tiko na ka e tukuna o Jisu ena ikatolu ni gauna e temaki kina, a vakaibalebaletaka na sokalou ina “veiqaravi tabu.” (Maciu 4:10) Nida dausokalou i Jiova, eda na gumatua na qaravi koya. * (Vkru. 10:12) Eda veiqaravi tabu vua na Kalou nida vakaitavi ena cakacaka e sema ina noda sokalou, e vinakati kina meda vakuai keda. Na cakacaka cava qori?

E duidui na tabana ni veiqaravi tabu, ia era talei kece vei Jiova. Eda veiqaravi tabu nida vunau, vakaitavi ena soqoni, kei na noda maroroya qai tara na noda vale ni sokalou. Okati tale ga kina na noda vakaitavi ena sokalou vakavuvale, tokoni ni cakacaka ni vakacoko me baleti ira na tacida ra gadreva na veivuke, bolecakacaka ena noda soqo, se veiqaravi e Peceli. (Iper. 13:16; Jeme. 1:27) Nida vakaliuca ena noda vakasama kei na lomada na sokalou savasava eda vakaraitaka kina nida “veiqaravi tabu ena siga kei na bogi.” Eda na marautaka meda sokaloutaka na noda Kalou o Jiova!​—Vkta. 7:15.

^ para. 5 Dua na vosa vakaIperiu e rawa ni vakaibalebaletaka tale ga na sokalou oya na “qarava.” Koya gona, noda sokalou e okati kina na veiqaravi.​—Lako 3:12, vmr.