Raica sara na lewena

Raica na lewenivola

iVola Mai na iLawalawa Dauvakatulewa

iVola Mai na iLawalawa Dauvakatulewa

Kemuni na Dau Lomani Jiova:

Era marau o ira na tiko ena Soqo ni Veiwasewase ni yabaki 1971 e kena usutu “Divine Name” ni sevutaki kina e levu na ivola. E “sega ni vakamacalataki rawa” na totoka ni ivola qori. E tukuna e dua na tacida me baleta na ivola: “Qo e dua na ivakaraitaki lailai ga ni veika ena yaco mai!” Na cava e vakamacalataka tiko? Qori na ivola “The Nations Shall Know That I Am Jehovah”—How? (Era na Kila Vakacava na Veimatanitu ni o Yau o Jiova?) Na cava e duatani kina na ivola qo? Ni tu kina na ivakamacala e vakamatatataki kina na parofisai ena ivola i Isikeli, na parofisai qo ena tarai keda kece na kawatamata.

Me tekivu mai na yabaki e sevutaki kina na ivola ‘Know Jehovah,’ dua na ka na tubu ni keda iwiliwili na tamata ni Kalou, mai na rauta na 1.5 na milioni ina 8 vakacaca na milioni. (Aisea 60:22) Era vosataka na milioni vakacaca qo e sivia na 900 na vosa. (Saka. 8:23) Levu era se sega ni bau vulica na ivola e vakamacalataki kina vakamatailalai na parofisai vakaivolatabu e vola na parofita o Isikeli.

Kena ikuri me tekivu mai na 1971, sa qai matata tiko ga mai na noda kila na ka dina ena iVolatabu ni sa qai serau cake tiko ga na rarama. (Vkai. 4:18) Ena 1985, sa qai matata vei keda na sala era okati kina mera yalododonu na ‘so tale na sipi’ nira itokani ni Kalou. (Joni 10:16; Roma 5:18; Jeme. 2:23) Ena 1995, eda sa qai kila nira na lewai “na sipi” kei “na me” ena gauna ni “veivakararawataki levu.” (Maciu 24:21; 25:31, 32) Na veisau kece qo e vukei keda meda kila na ivola i Isikeli.

“O iko na luve ni tamata, mo raica vinaka, mo vakatudaliga, mo nanuma matua na ka kece au vakaraitaka vei iko, ni qori na vuna o kau mai kina eke.”​—ISIKELI 40:4

Ena vica na yabaki sa oti sa qai serau cake tiko ga na rarama. Dikeva na ka eda vulica ena vosa vakatautauvata i Jisu. Sa qai matata tiko ga e levu na vosa vakatautauvata qori. E vica na vosa vakatautauvata qori e vakaibalebaletaki ina ka ena vakarau yaco ena veivakararawataki levu. E va tale ga qori na kena vakamatatataki eso na parofisai ena ivola i Isikeli. E okati kina na parofisai me baleti Koki mai Mekoki (wase 38 kei na 39), na nona itavi na tagane e taura tiko na ileu ni iqi nei vunivola (wase 9), na buca ni sui mamaca kei na nodrau sema vata vakaivakatakarakara e rua na kau (wase 37). Na tikina era vakamatatataki qo e vakavoutaki kina na veika e tabaki ena ivola ‘Know Jehovah’ ena vica na yabaki sa oti.

Sa rauta mera vakataroga e levu na tamata i Jiova, “Gauna cava ena tabaki kina e dua na ivola me vakamacalataka na parofisai i Isikeli?” Qori sara ga na ivola Vakalesui Mai na Sokalou Savasava i Jiova. Ni o wilika kece na 22 na wase ni vola qo kei na vosa vakatautauvata e kune kina, o na kurabuitaka na levu ni vakekeli e vauci ena kena vakarautaki. Keitou masulaka qai vakasamataka vakatitobu na vuna e vakarautaka kina o Jiova na ivola totoka i Isikeli. E vakasamataki vakavinaka kina eso na taro me vaka: Na cava e vakarautaki ena ivola i Isikeli era vulica o ira na bula ena nona gauna kei na gauna qo? Na parofisai cava e dusia na veigauna se bera mai? Vakacava e dodonu meda veidutaitaka kei na noda gauna qo na parofisai ena Isikeli? Na isau kece ni taro qori e vakamatatataka na noda kila qai marautaka na ivola vakaivolatabu qo.

Ni o tekivu wilika na ivola i Isikeli me yacova na  kena itinitini, o na qoroya sara ga na isoqosoqo vakalomalagi i Jiova. O na qoroya tale ga na cecere ni nona ivakatagedegede me baleti ira na tiko mai lomalagi kei ira e vuravura me vakadonui kina na nodra sokalou. Ena vukei iko na ivola Sokalou Savasava mo vakavinavinakataki Jiova vakalevu ena ka e sa cakava oti ena vukudra na nona tamata kei na ka ena cakava ena gauna se bera mai. O na dikeva ni vakabibitaki ena ivola qo e rua na usutu. Kena imatai, me rawa nida vakamarautaki Jiova, meda kila qai dokai koya ni Turaga Cecere ni Lomalagi kei na Vuravura. Kena ikarua, meda qaravi Jiova ena sala e vakadonuya, me salavata noda ivakarau ni bula kei na nona ivakatagedegede cecere.

Keitou nuitaka ni na vukei kemuni na ivola qo moni vaqaqacotaka nomuni sokaloutaki Jiova ena sala e dokai kina na yacana cecere qai savasava. Me uqeti kemuni tale ga moni vakanamata ena gauna era na kila kina na veimatanitu se o cei dina o Jiova.—Isik. 36:23; 38:23.

Me vakalougatataka mada ga na Tamada dauloloma o Jiova na nomuni sasaga moni kila na ivola e uqeti vakalou kina na parofita o Isikeli me vola.

Tacimuni,

iLawalawa Dauvakatulewa ni iVakadinadina i Jiova