Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

I Nuinui Dei me Baleti Ira na Mate

I Nuinui Dei me Baleti Ira na Mate

A VOLA e dua na goneyalewa yabaki 25: “Ena 1981 a mate na tinaqu vakacabecabe ena kenisa. Sa bau tarai keirau sara ga vakabibi kei na taciqu vakacabecabe na nona mate. Au a sa yabaki 17, ia o taciqu e yabaki 11. Sa dua na ka na levu ni noqu vakananumi tinaqu. Niu a tuberi meu vakabauta ni sa tiko mai lomalagi, au a vinakata sara ga meu vakamatei au me keirau laki veirai tale kina. Keirau sa rui veivolekati sara.”

Sa ca dina me tu tu ga me mate e dua o dau lomana. Ia ni sa mate na wekamu voleka oya, sa dua na ka na kena mosimosi mo vakasamataka ni sa na sega vakadua ni drau na veitalanoa tale, veidredrevaki, se veimokomoko. E sega ni oti na mosi ena kena tukuni ni sa tiko mai lomalagi.

Ia e duatani sara na i nuinui e tukuna tu na i Vola Tabu. Eda sa raica oti ni vakaraitaka na i Vola Tabu ni rawa na veirai tale kei na wekamu voleka sa mate ena dua na gauna sa voleka ga oqo, sega ena dua na vanua yawa mai lomalagi, ia e vuravura ga oqo ni sa yaco na vakacegu kei na tiko vinaka. Ena gauna oya, sa rawa ni vakanamata na tamata ki na bulabula vinaka ni yago e totoka vakaoti, sa na oti vakadua tale ga na mate. Ia era na kaya beka e so, ‘Seti, oqori e divi wale ga!’

O na vakabauta vakacava ni dina na i nuinui oqo? Mo vakadinata e dua na vosa ni yalayala, ena vinakati mada mo vakadeitaka ni o koya e yalayala tiko e sega wale ga ni vinakata dina me cakava na ka e yalayala kina ia e tu tale ga vua na kaukauwa me cakava vaka kina. O cei gona e yalataka tu ni ra na bula tale na mate?

Ena vulaitubutubu ni 31 S.K., a sega ni tu vakasuka ni yalataka o Jisu Karisito: “Me vaka sa vakaturi ira cake na mate ko Tamana, ka vakabula, sa vakakina na Luvena o koya sa vakabulai ira sa vinakata. Dou kakua ni kurabui e na ka oqo: ni sa lako mai na gauna era na rogoca kina na domona [Jisu] ko ira kecega e nai bulubulu, a ra na lako maikina.” (Joni 5:21, 28, 29) Io, a yalataka o Jisu Karisito ni o ira na milioni vakacaca na mate tu, era na sega wale ga ni bula tale mai ena vuravura oqo, ia e rawa tale ga ni ra nuitaka me ra na toka dei kina me tawamudu ena i tuvaki sa na vuki me parataisi qai vakilai kina na vakacegu levu. (Luke 23:43; Joni 3:16; 17:3; vakatauvatana Same 37:29 kei na Maciu 5:5.) Ni a yalayala o Jisu, ena rairai sega kina ni  cala me da kaya ni sa vinakata dina o koya me cakava na ka sa yalataka. Ia e vakacava, e rawa dina vua?

Ni oti ga e rua na yabaki mai na nona yalataka oya, a vakaraitaka o Jisu ena sala e mana ni sega wale ga ni vinakata dina o koya me veivakaturi, ia ni tu tale ga vua na kaukauwa me cakava vaka kina.

“Lasarusa, Lako Mai!”

Sa dua na gauna vakaciriloloma dina oya. E davo bibi koto o Lasarusa. Rau sa talatala o Meri kei Marica, na ganena, me lako mai o Jisu, a tiko mai na tai kadua ni uciwai na Joritani: “Turaga, raica, ko koya ko sa lomana sa tauvi-mate.” (Joni 11:3) Erau kila ni daulomani Lasarusa o Jisu. Me qai sega vakacava ni via mai raici nona i tokani sa tauvimate o Jisu? Ia e sega ga ni macala se cava na vuna a sega ni lako vakadodonu sara kina i Pecani o Jisu, ni a siga rua tale tiko ena vanua a tiko kina.—Joni 11:5, 6.

E mani mate o Lasarusa ni sa vakau oti na i tukutuku ni nona tauvimate. E kila o Jisu na gauna a mate kina o Lasarusa, ia a sa dei oti tale tu ga e lomana ni na cakava kina e dua na ka. Ni qai yaco yani i Pecani o Jisu, sa siga va oti na nona mate na nona i tokani voleka. (Joni 11:17, 39) Ena rawa beka vei Jisu me vakatura e dua sa mate siga vica tu vaka oya?

Ni marama dau yavala o Marica, a cici yani me laki tavaki Jisu ena nona rogoca ni sa lako tiko yani. (Vakatauvatana Luke 10:38-42.) Ni vakila o Jisu na nona rarawa, sa qai kaya vua: “Ena tu cake tale na ganemu.” Ena nona kainaka ni vakabauta na veivakaturi ena yaco ena dua na gauna mai muri, sa qai tukuna vakadodonu vua o Jisu: “Oi au na vu ni tu-cake-tale, kei na vu-ni-bula: ko koya sa vakabauti au, kevaka sa mate, ena bula ga.”—Joni 11:20-25.

Ni sa yaco yani o Jisu ki na i bulubulu, sa tukuna sara me vaqiqici tani na vatu a sogota tu na gusu ni qara. Ni sa masu vakadomoilevu, sa qai vakarota: “Lasarusa, lako mai”!—Joni 11:38-43.

 E coba na matadra kece na tiko e kea ena i bulubulu. Mai na butobuto ni loma ni qara, sa basika e dua. E viviraki tu na yavana kei na ligana ena i sole ni mate, kei na matana tale ga ena dua na i sulu. “Dou sereki koya, ka laiva me lako,” e vakarota o Jisu. Sa sere laivi sara na i otioti ni i vivi ni sole ni mate. Io, sa o Lasarusa dina ga, o koya sa siga va na nona ciba tu!—Joni 11:44.

E Yaco Dina?

E volatukutukutaka tu o Joni ena nona Kosipeli ni a vakaturi dina o Lasarusa. E dredre me nanumi ni i talanoa buli ga oya baleta ni sa rui matailalai na kena i tukutuku. O koya e vakatitiqataka na kena dina, sa vakatitiqataka tale ga na cakamana kece e volai tu ena i Vola Tabu, bau kina na nona vakaturi sara ga o Jisu. Ia, vua e dua me cakitaka ni a vakaturi dina o Jisu, sa macala sara tu ga e kea ni sa cakitaka tale ga o koya na vakabauta Vakarisito.—1 Korinica 15:13-15.

Ke o sa vakabauta rawa tu ni bula na Kalou, ena rawarawa sara mo vakadinata na veivakaturi. Vakasamataka mada oqo: E rawa ni katona e dua ena vidio na i otioti ni nona lewa me baleta na nona i yau kei na ka kece e taukena, ia ni sa mate, era na sega wale ga ni rogoci koya na nona i tokani kei na wekana, era na raici koya tale ga, ena nona vakamacalataka se cava me caka me baleta na nona i yau. Ke yaco tu oqo ena duanadrau na yabaki wale ga sa oti, ena sega sara ga ni dua e vakabauta. Ia vei ira era bula tu ena so na vanua tu vakayawa edaidai, era se bera ni raica vakadua na vidio, ena vaka sara ga e dua na cakamana vei ira na ka oqo. Ke sa rawa vua na tamata me cakacaka ena lewa vuku sa viritura na Daubulibuli, me bulia rawa kina na i yaloyalo ni tamata eda raica da qai rogoca, e sega li ni dodonu me uasivia na kena oqo na ka e rawa ni cakava na Daubulibuli? O koya gona, me na qai dredre vakacava vei koya a solia na bula me solia lesu tale na bula sa yali?

Sa qai levu ga na nona vakabauti o Jisu kei na i nuinui ni veivakaturi ena vuku ni nona vakabulai Lasarusa vakacakamana. (Joni 11:41, 42; 12:9-11, 17-19) E uqeti keda dina na veivakabulai oya, ni vakaraitaka tale ga vei keda na nodrau tu vakarau kei na nodrau gadreva o Jiova kei na Luvena me rau veivakaturi.

‘Ena Vinakata na Kalou’

Na nona i valavala o Jisu ena gauna a rogoca kina ni sa mate o Lasarusa e vakatakila vei keda ni titobu sara na nona dau kauwai na Luve ni Kalou. Na bibi ni lomana ena gauna oqo e vakaraitaka votu na nona vinakata dina me vakaturi ira na mate. Eda wilika: “Ni sa qai yaco ko Meri ki na vanua sa tiko kina ko Jisu, ka raici koya, sa cuva sobu ki na yavana ka kaya vua, Kemuni na Turaga, kevaka ko ni a tiko eke, sa sega ni ciba na ganequ. Ni sa qai raica ko Jisu na nona tagi, kei na nodra tagi na kai Jutia era sa lako vata kaya mai, sa vutugu ko koya e na yalona, a sa rarawa na lomana, ka kaya, Evei na vanua dou a buluti koya kina? Era sa kaya vua, Turaga, ni lako mai mo ni raica. Sa tagi ko Jisu. Era sa qai kaya na kai Jutia, Raica na kena levu ni nona loloma vei koya!”—Joni 11:32-36.

Eda raica na nona loloma bibi o Jisu ena tolu na vosa oqo: “vutugu,” “sa tagi” kei na “rarawa na yalona.” Na vosa a volai taumada kina na i tukutuku vakaciriloloma oqo e vakaraitaka ni a tarai Jisu sara vakabibi na mate i nona i tokani voleka o Lasarusa, kei na nona raici ganei Lasarusa ni sa tagi tu. Ena vuku gona ni ka oya, sa laki tovaki wai ga kina na matana. *

Na ka e kurabuitaki kina ni a sa vakaturi rau oti e le  rua o Jisu. Sa nakita tale ga me na cakava na ka vata oya vei Lasarusa. (Joni 11:11, 23, 25) Ia “sa tagi” ga. E sega ni mai vaka wale tu ga e dua na cakacaka vei Jisu na nona vakaturi ira na mate. Na nona yalololoma levu e ke e vakaraitaka votu na nona vinakata dina me walia na leqa e vakavuna na mate.

Na nona yalololoma o Jisu ena nona vakaturi Lasarusa, e vakaraitaka votu na nona vinakata dina me walia na leqa e vakavuna na mate

Ni ‘i yaloyalo sara ga ni Kalou o Jiova’ o Jisu, sa macala tu ga ni da na raica vei Jiova na i tovo vata ga a mai vakaraitaka o Jisu. (Iperiu 1:3) A kaya oqo na tamata yalodina o Jope me baleta na nona tu vakarau sara ga o Jiova me veivakaturi: “Kevaka sa ciba na tamata, ena bula tale ko koya? . . . Ko ni na kaci mai, ka’u na rogo yani vei kemuni: Ko ni na vinakata na cakacaka ni ligamuni.” (Jope 14:14, 15, neitou na vosa kala.) Na vosa taumada e vakadewataki mai kina na vosa “ko ni na vinakata,” e vakavotui kina na yalogu levu e tu vua na Kalou. (Vakatekivu 31:30; Same 84:2) Sa na wacava na nona nanamaki tu oqo o Jiova me yaco totolo mada ga mai na veivakaturi.

E vakacava, e rawa ni da vakabauta dina na vosa ni yalayala me baleta na veivakaturi? Io, ni sa macala vinaka tu ni sega wale ga ni rau vinakata o Jiova kei na Luvena me rau vakayacora oqori, ia e tu tale ga vei rau na kaukauwa me rau cakava vaka kina. Na cava gona e rawa ni o rai vakanamata kina? Ni o na raici ira tale na wekamu voleka era sa mate ena vuravura sara ga oqo, ia e sa na duidui sara kina na i tuvaki ni veika!

Sa yalataka na Kalou o Jiova me veisautaka tale na vuravura oqo me Parataisi ni o koya ga a biuta na i matai ni tamata ena dua na were totoka. Ena yaco na veisau oqo ni sa na veiliutaki na nona Matanitu vakalomalagi, e kena tui sa veiliutaki tiko ena gauna oqo o Jisu Karisito. (Vakatekivu 2:7-9; Maciu 6:10; Luke 23:42, 43) Ena Parataisi oya, sa rawa ni vakanamata na kawatamata me marautaka na bula ena sega ni mudu, kei na bula e sa na sega ni veitauvi tale kina na mate ca. (Vakatakila 21:1-4; vakatauvatana Jope 33:25; Aisea 35:5-7.) Sa na sega tale ga na veicati, veivakaduiduitaki vakamatatamata, veivala vakaduikaikai, kei na dredre ni bula vakailavo. Ena vuravura uasivi gona oya, ena vakaturi ira kina na mate o Jiova ena liga i Jisu Karisito.

Era na reki na tamata kece ena vuku ni veivakaturi, e yavutaki ena i soro ni i voli i Karisito Jisu

Sa vakanuinui tu ena ka oqo na marama lotu Vakarisito a cavuti ena i tekitekivu ni wase oqo. Ni sa yabaki vica na mate nei tinana, era sa qai vukei koya na i Vakadinadina i Jiova me vulica na i Vola Tabu. E kaya: “Au a tagi niu sa mai kila na i nuinui ni veivakaturi. Sa dua na ka na noqu marau niu sa qai kila ni rawa niu raici tinaqu tale.”

Ke tagi tale tu ga na lomamu ena nomu via raici koya tale na wekamu voleka, era na marau sara na i Vakadinadina i Jiova me ra vukei iko mo rawa ni vakanuinuitaka tale ga kina na i nuinui dei oqo.

^ para. 20 Na vosa Vakirisi e vakadewataki me “vutugu” e lako mai na vosa cakacaka na (em·bri·maʹo·mai) e vakaraitaka na yalokauwai e vu dina mai loma, e mosimosi na kena vakilai. E kaya e dua na kenadau ena i Vola Tabu: “E laurai ga e ke ni a sega sara ga ni lewa rawa o Jisu na vutugu ni yalona baleta ni sa curuoso na lomana.” Na vosa e vakadewataki me “rarawa” e lako mai na vosa Vakirisi na (ta·rasʹso) e vakaraitaka na vusolo ni yalo. E kaya e dua na daunivolavosa ni kena i balebale oqo, “me yavala vakalevu na lomana e dua, . . . ni luluvu sara vakalevu na lomana.” Na vosa “sa tagi,” e lako mai na vosa cakacaka Vakirisi na (da·kryʹo) e kena i balebale “tovaki wai na mata, tagi lo ga.”