Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 21

Vakarusai na Meca ni Matanitu ni Kalou

Vakarusai na Meca ni Matanitu ni Kalou

USUTU BIBI ENA WASE QO

Na veika e yaco ni bera na Amaketoni

1, 2. (a) Eda vakadinadinataka vakacava ni sa veiliutaki tiko na noda Tui me tekivu ena 1914? (b) Na cava eda na dikeva ena wase qo?

E VAQAQACOTAKI noda vakabauta nida raica lesu na ka sa cakava na Matanitu ni Kalou ena kedra maliwa na meca. (Same 110:2) E tuvanaka na noda Tui e dua na ilawalawa era yalorawarawa ni vunau. E veivakasavasavataki vakayago, vakayalo tale ga. Era saga vagumatua na meca ni Matanitu ni Kalou mera tawasei keda, ia eda duavata nikua ena veiyasa i vuravura. E vakadinadinataki kina ena veika kece sa cakava na Matanitu ni Kalou, ni sa tekivu veiliutaki ena 1914 ena kedra maliwa na meca.

2 Ena veigauna se bera mai, ena vakayacora na Matanitu ni Kalou e levu tale na ka vakatubuqoroqoro. Ena “yaco mai” me ‘vurumemeataka qai vakawabokotaki ira’ na meca. (Maciu 6:10; Tani. 2:44) Ni bera qori, ena yaco mada eso na ka vakasakiti. Na cava ya? E sauma na taro qori e vica na parofisai vakaivolatabu. Meda dikeva mada eso na parofisai qori me laurai kina na veika ena yaco ena veigauna se bera mai.

Bera ni Yaco ‘Vakidacala na Rusa’

3. Na cava na imatai ni ka ena yaco?

3 Na vakacegu. Ni volavola o Paula i Cesalonaika, e vakamacalataka na imatai ni ka ena yaco. (Wilika 1 Cesalonaika 5:2, 3.) E tukuna e keri o Paula ni na tekivu na “siga i Jiova” ena vakarusai nei “Papiloni na Ka Levu.” (Vkta. 17:5) Ia ni bera qori, era na tukuna na veimatanitu, “Na vakacegu kei na sautu!” Qori ena rairai tukuni ga vakadua se tukuni ena vica vata na gauna. Vakacava era na vakaitavi kina na iliuliu ni lotu? Nira okati tu e vuravura, era na tomani ira na veimatanitu nira tukuna, “Na vakacegu!” (Jere. 6:14; 23:16, 17; Vkta. 17:1, 2) Ni cavuti na vosa qori, e dusia ni sa vakarau tekivu na siga i Jiova. Era na “sega ni dro rawa” na meca ni Matanitu ni Kalou.

4. E yaga vakacava noda kila na ibalebale ni parofisai i Paula me baleta na vakacegu kei na sautu?

 4 E yaga vakacava noda kila na ibalebale ni parofisai qo? E tukuna o Paula: “Oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako.” (1 Ces. 5:3, 4) Eda sega ni vakataki ira na kena vo, nida kila na vanua sa mua tiko kina na veika e yaco e vuravura. Ena vakayacori vakacava na parofisai qo me baleta na vakacegu kei na sautu? Meda wawa ga da qai raica se na vakayacori vakacava. E bibi gona “meda yadra tiko da qai yalomatua.”—1 Ces. 5:6; Sefa. 3:8.

Tekivu na Veivakararawataki Levu

5. Na cava na itekitekivu ni “veivakararawataki levu”?

5 Ravuti o lotu. Nanuma lesu nona tukuna o Paula: “Ena gauna era kaya tiko kina, ‘Na vakacegu kei na sautu!’ ena qai yaco vakidacala vei ira na rusa.” Me vaka na kena muria na tibi ni liva na lidi ni yaseyase, ena tautauvata tale ga na kena tukuni “Na vakacegu kei na sautu” qai muria yani na kena ‘yaco vakidacala na rusa.’ Na cava ena vakarusai? Ena rusa taumada o “Papiloni na Ka Levu,” na isoqosoqo kece ni lotu lasu e vuravura, e kilai tale ga me “saqamua.” (Vkta. 17:5, 6, 15) Ni vakarusai o Lotu ni Veivanua Vakarisito kei na veilotu lasu, qori sa itekitekivu ni “veivakararawataki levu.” (Maciu 24:21; 2 Ces. 2:8) Era na kurabuitaka e levu na veivakarusai qori. Na vuna? Me yacova na gauna ya, a nanuma tu na saqamua ni vaka na ‘ranadi,’ ena “sega vakadua ni raica na lolosi.” Ena qai kila ni cala na nona nuidei. Ena vakarusai totolo me vaka e “dua ga na siga.”—Vkta. 18:7, 8.

6. O cei se na cava ena vakarusai “Papiloni na Ka Levu”?

6 O cei se na cava ena vakarusai “Papiloni na Ka Levu”? E dua na “manumanu kila” e “tini na kena ileu.” E vakamacalataka na ivola na iVakatakila ni manumanu kila qo e vakatayaloyalotaka na Matabose kei Vuravura (UN). Na tini na ileu e dusia na veiliutaki vakapolitiki e tokona tiko na “manumanu kila kulakula.” (Vkta. 17:3, 5, 11, 12) Ena vakacava na nona vakacaca? Era na yauta na veimatanitu ena Matabose kei Vuravura na nona iyau na saqamua, vakarusai koya, qai “vakamai koya vakadua.”—Wilika Vakatakila 17:16. *

7. E vakayacori vakacava ena imatai ni senitiuri G.V. na vosa i Jisu ena Maciu 24:21, 22? Ena vakayacori vakacava ena veigauna se bera mai?

7 Vakalekalekataki na gauna. E vakatakila na Tui na ka ena yaco ena veivakararawataki levu. E tukuna: “Ena vakalekalekataki na gauna ya ena vukudra na digitaki.” (Wilika Maciu 24:21, 22.) E vakayacori vakalailai na vosa qori ena 66 G.V. ni “vakalekalekataka” o Jiova na nona ravuti Jerusalemi na mataivalu ni Roma. (Mari. 13:20) A rawa nira bula kina na lotu vaKarisito e Jerusalemi kei Jutia. Na  cava gona ena yaco ena veiyasa i vuravura ena veivakararawataki levu sa roro tiko mai qo? Ena vakayagataki Jisu o Jiova me “vakalekalekataka” na nona ravuti lotu na Matabose kei Vuravura, me kua ni rusa na lotu dina ni sa vakarusai o lotu lasu. Era na vakarusai kece na isoqosoqo lotu lasu, ia ena tiko ga na lotu dina. (Same 96:5) Meda raica qo na veika ena yaco ni sa oti qori.

Veika e Yaco ni Bera na Amaketoni

8, 9. (a) Na ka vakatubuqoroqoro cava e rairai tukuna tiko o Jisu? (b) Na cava era na cakava na tamata ena veika era raica?

8 Ena parofisai i Jisu me baleta na iotioti ni veisiga, e vakaraitaki kina eso na veiveisau vakasakiti ena yaco ni bera na Amaketoni. E vakamacalataki ena Kosipeli i Maciu, Marika kei Luke na imatai ni rua na ituvaki.—Wilika Maciu 24:29-31; Mari. 13:23-27; Luke 21:25-28.

9 Veika vakatubuqoroqoro mai lomalagi. E parofisaitaka o Jisu: “Ena vakabutobutotaki na matanisiga, ena sega ni cila na vula, era na lutu mai lomalagi na kalokalo.” Era na sega ni nuitaki na iliuliu ni lotu mera veivakararamataki se veidusimaki. E rairai tukuna tale tiko ga o Jisu na kena laurai mai lomalagi e dua na ka vakatubuqoroqoro. (Aisea 13:9-11; Joeli 2:1, 30, 31) Na cava era na cakava na tamata nira raica qori? Era na “yaluma” nira “sega ni kila mera dro vakacava.” (Luke 21:25; Sefa. 1:17) Io, era na vaqara bula o ira na meca ni Matanitu ni Kalou, tekivu vei ira na “tui” yaco sara vei ira na “bobula,” era na ‘cibati ira ena nodra rere nira namaka na veika ena vakarau yaco.’ Ena sega ni dua na vanua mera lai vakaruru kina mera drovaka na cudru ni Tui.—Luke 21:26; 23:30; Vkta. 6:15-17.

10. (a) Na veilewai cava ena mai cakava o Jisu? (b) Na cava era na cakava na dau tokona na Matanitu ni Kalou kei ira na dau saqata?

10 Tawasei ni sipi kei na me. Era na raica na meca ni Matanitu ni Kalou e dua na ka ena vakalevutaka nodra yaluma. E tukuna o Jisu: “Era na qai raica na Luve ni tamata ni lako mai ena o ena lewa cecere kei na lagilagi.” (Mari. 13:26) Na ka vakatubuqoroqoro qo e vakaraitaka ni sa mai vakataulewa o Jisu. E vakamatatataka tale o Jisu na veilewai qori ena nona parofisai me baleta na iotioti ni veisiga. Eda na raica qori ena ivakatautauvata ni sipi kei na me. (Wilika Maciu 25:31-33, 46.) Era na tawasei mera “sipi” o ira na dau tokona ena yalodina na Matanitu ni Kalou ra qai “tacake” nira kila nira sa “vakarau vakabulai.” (Luke 21:28) Ena yasana adua, era na tawasei mera “me” o ira na dau saqata na Matanitu ni Kalou ra qai “tavimabu ena vakaisaisa” nira kila nira na “muduki vakadua.”—Maciu 24:30; Vkta. 1:7.

11. Na cava meda nanuma tiko me baleta na rua na ituvaki sa vakarau yaco?

 11 Ni vakataulewa oti o Jisu ina “veimatanitu kece,” ena tiko tale eso na ka vakasakiti me yaco ni bera na ivalu na Amaketoni. (Maciu 25:32) Eda na dikeva mada e rua na ituvaki ya: Nona ravuravu o Koki, kei na nodra kumuni na lumuti. Nida dikeva na rua na ituvaki qo, meda nanuma tiko ni sega ni tukuna na Vosa ni Kalou na gauna ena vakayacori kina. Ena rawa ni tekivu vakayacori na ikarua ni parofisai ni se bera ni oti na kena imatai.

12. Na cava ena qai cakava o Setani ni ravuta na Matanitu ni Kalou?

12 Ravuravu. Ena ravuti ira na ivovo ni lumuti kei na nodra itokani so tale na sipi o Koki mai Mekoki. (Wilika Isikeli 38:2, 11.) Ni kolotaki ga mai lomalagi, sa dau ravuti ira voli na ivovo ni lumuti o Setani. Ia nona via ravuta qo na Matanitu sa vakadeitaki oti, sa iotioti sara ga ni nona vala. (Vkta. 12:7-9, 17) Me tekivu mai na gauna era kumuni kina na lumuti ina ivavakoso vaKarisito, sa saga voli o Setani me vakarusa nodra duavata e vuravura raraba, ia e guce na nona sasaga. (Maciu 13:30) Nira rusa kece na lotu lasu e vuravura qai vo ga o ira na dauveiqaravi ni Kalou, ena vaka ga era “sega ni taqomaki ena bai, ena ilati ni matamata, se na matamata.” Qori sara ga na gauna ena uqeti ira kina na veiliutaki vakatamata o Setani mera ravuti keda na dau tokona na Matanitu ni Kalou.

13. Ena takoso vakacava o Jiova ena vukudra na nona dauveiqaravi?

13 E vakamacalataka o Isikeli na ka ena yaco. E tukuna na parofisai me baleti Koki: “O na biuta na nomu yasana mai na vanua yawa ena vualiku, o iko kei na levu na lewe ni veivanua era tokoni iko, era vodo ose kece, na isoqosoqo kaukaua, na mataivalu levu. O na ravuti ira na noqu tamata . . . me vaka na o e ubia na vanua.” (Isik. 38:15, 16) Na cava ena cakava o Jiova ina ravuravu vakarerevaki qo? E kaya o Jiova: “Ena waqa sara ga na noqu cudru levu. . . . Au na kaciva na iseleiwau.” (Isik. 38:18, 21; wilika Sakaraia 2:8.) Ena qai takoso o Jiova ena vukudra na nona dauveiqaravi e vuravura. Qori sara ga na ivalu na Amaketoni.

14, 15. Na cava na ikarua ni ka ena yaco ni bera ni ravuravu o Setani?

14 Ni bera nida raica se na taqomaki keda vakacava o Jiova ena Amaketoni, meda vakasamataka mada vakalekaleka e dua tale na ituvaki vakasakiti. Ena yaco qori ena gauna e tekivu kina nona ravuravu o Setani kei na nona takoso o Jiova ena Amaketoni. Eda raica mai na parakaravu 11 ni ikarua ni ituvaki oya na nodra kumuni na ivovo ni lumuti.

15 Nodra kumuni na lumuti. Erau volatukutukutaka o Maciu kei Marika na ka e tukuna o Jisu me baleti ira na “digitaki,” se lotu vaKarisito lumuti, era okati ena veika ena yaco ni bera ni cabolo na Amaketoni. (Raica na  parakaravu e 7.) Ni vakamacalataki nona sa na Tui, e parofisaitaka o Jisu: “Ena qai talai ira na agilosi, ena kumuni ira vata na nona digitaki mai na matanicagi vava, mai na iyalayala kei vuravura ina iyalayala kei lomalagi.” (Mari. 13:27; Maciu 24:31) Na cava e vakaibalebaletaka tiko o Jisu? E sega ni tukuna tiko na iotioti ni nodra dregati na lotu vaKarisito lumuti, ni yaco qori ni bera ni tekivu na veivakararawataki levu. (Vkta. 7:1-3) E vakamacalataka tiko e dua na ka ena yaco donuya na veivakararawataki levu. Koya gona, era na rairai kumuni i lomalagi na ivovo ni lumuti ena gauna sa tekivu ravuti ira na dauveiqaravi ni Kalou o Setani.

16. Na cava e nodra itavi na lumuti ena Amaketoni?

16 E veisemati vakacava na nodra kumuni na lumuti kei na Amaketoni? Nida raica na gauna e caka kina na kumukumuni, eda kila nira na tiko kece mai lomalagi na lumuti ni bera ni tekivu na Amaketoni. Ena soli kina vei ira na lewa mera tomani Jisu mera vakayagataka na “ititoko kaukamea” mera vakawabokotaki na meca kece ni Matanitu ni Kalou. (Vkta. 2:26, 27) Era na muri Karisito, na Tui Dauvala, o ira na agilosi kaukaua kei ira na lumuti era sa vakaturi, mera ravuti ira na “mataivalu levu” era via vakawabokotaki keda na dauveiqaravi i Jiova. (Isik. 38:15) Na veiraravui qori sa na tekivu kina na ivalu na Amaketoni!—Vkta. 16:16.

Na iTinitini ni Veivakararawataki Levu

Tekivu na ivalu na Amaketoni!

17. Na cava ena yacovi ira na “me” ena Amaketoni?

17 Vakataulewa. Na Amaketoni e icavacava ni veivakararawataki levu. Ena gauna qori, ena qarava o Jisu e dua tale na itavi. Ena sega wale ga ni Turaganilewa ni “veimatanitu kece,” ia ena nodra Dauveivakamatei na veimatanitu, se o ira kece era lewai mera “me.” (Maciu 25:32, 33) Ena ‘ravuta na veimatanitu’ ena “iseleiwau balavu gata.” O ira kece na vaka na me, tekivu vei ira na “tui” yaco sara vei ira na “bobula,” era na “muduki vakadua.”—Vkta. 19:15, 18; Maciu 25:46.

18. (a) Sa na veisau vakacava na ituvaki vei ira na “sipi”? (b) Ena vakacavara vakacava o Jisu na nona ravuravu?

18 Sa na veisau na ka era sotava o ira e lewa o Jisu mera “sipi”! Ena voleka ni veibuturaki sobu na mataivalu levu ni “me” i Setani, ia ena “bula sivia na veivakararawataki levu” e dua na “isoqosoqo levu” ni “sipi” e nanumi nira na sega ni taqomaki tu. (Vkta. 7:9, 14) Ni vakarusa oti o Jisu na meca vakatamata ni Matanitu ni Kalou, sa na qai kolotaki Setani kei na nona timoni ena qara sega ni vakabotona. Era na tu ena dua na ituvaki e vaka na mate, me duanaudolu na yabaki.—Wilika Vakatakila 6:2; 20:1-3.

 Eda na Vakarautaki Vakacava?

19, 20. Eda na muria vakacava na ivakasala ena Aisea 26:20 kei na 30:21?

19 Eda na vakarautaki keda vakacava ena veika vakatubuqoroqoro sa vakarau yaco? E tukuna ena vica na yabaki sa oti na Vale ni Vakatawa: “Na bula e vakatau ena talairawarawa.” Na cava e bibi kina qori? E tiko na kena isau ena ivakasala i Jiova vei ira na Jiu e Papiloni makawa. A parofisaitaka o Jiova ni na vakarusai o Papiloni, ia na cava mera cakava na dauveiqaravi ni Kalou mera vakarautaki ira kina? E tukuna o Jiova: “Ni lako na noqu tamata, moni curu ina nomuni rumu e loma, ni sogota na nomuni katuba. Moni vunitaki kemuni vakalekaleka me oti mada na veicudruvi.” (Aisea 26:20) Raica mada na vu e vakayagataki: “lako,” “curu,” “sogota,” “vunitaki,” era ivakaro kece. O ira na Jiu era muria na ivakaro ya, era na tiko ga ena nodra vale, mera yawaka na gaunisala era ravuravu kina na sotia. E vakatau gona na nodra bula ena nodra talairawarawa ina ivakasala i Jiova. *

20 Na cava eda vulica kina? Me vakataki ira na dauveiqaravi ni Kalou ena veigauna sa oti, na noda bula sivia na veika sa vakarau yaco qo e vakatau ena noda talairawarawa ena ivakasala i Jiova. (Aisea 30:21) Na ivakasala qori e vakarautaki ena ivavakoso. Koya gona, me vu dina mai lomada noda talairawarawa ena veidusimaki e vakarautaki tiko mai. (1 Joni 5:3) Ke da cakava qori, ena rawarawa sara noda talairawarawa ena veigauna se bera mai, da qai vakila kina na veitaqomaki ni Tamada o Jiova kei na noda Tui o Jisu. (Sefa. 2:3) Ena veitaqomaki vakalou qori, eda na sarava kina nodra vakarusai vakadua na meca ni Matanitu ni Kalou. Sa na bau guiguilecavi dredre dina!

^ para. 6 E kena irairai ni nona vakarusai o “Papiloni na Ka Levu” e dusia ga na vakarusai ni isoqosoqo vakalotu, sega ni nodra vakamatei na tamata lotu kece. Koya gona, o ira na tamata lotu era bula sivia na veivakarusai qori, era na rairai vakayawaki ira mai na lotu, me vaka e tukuna na Sakaraia 13:4-6.

^ para. 19 Raica eso tale na ivakamacala ena ivola Parofisai i Aisea—Me Vakararamataka na Kawatamata I, tabana e 282-283.