Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iVola Mai na iLawalawa Dauvakatulewa

iVola Mai na iLawalawa Dauvakatulewa

Vei Kemuni na Taci Keitou Lomani:

RAITAYALOYALOTAKA mada ni o lewe ni vuvale e Peceli mai Brooklyn. Ena mataka ni Vakaraubuka, 2 Okotova, 1914, o dabe tiko ena nomu idabedabe ni bera na katalau, o qai waraka tiko nona yaco mai o Brother C. T. Russell. E curu mai o Brother Russell, e kidavaka na vuvale qai kaya: “Ni yadra kece.” Ia ni bera ni lai dabe ena nona idabedabe, e vakasausau qai tukuna: “Sa cava na nodra gauna na Veimatanitu Tani; sa oti na gauna ni veiliutaki ni nodra tui!” Dua na ka na nomu marau ni sa dede sara nomu nanamaki tu ena gauna bibi qo! Era marau tale ga na vo ni vuvale, oni vakasausau ena itukutuku vakasakiti qo.

 Sa oti qo e vica vata na yabaki nona tukuna kina o Brother Russell na itukutuku marautaki qori. Na cava sa rawata na Matanitu ni Kalou ena gauna qori? E levu sara na ka! E vakayagataka na matanitu qori o Jiova me vakasavasavataki ira nona dauveiqaravi qai vakavulici ira na vica na udolu ena 1914 ina sivia ni le vitu veimama na milioni nikua. E yaga vakacava vei keda na veivakavulici qori?

Eda kila ni dina na ka era dau tukuna na tacida, “Sa toso tiko na qiqi vakalomalagi i Jiova!” Ia na kena dina, me tekivu ena 1914, sa qai totolo ga na toso ni qiqi vakalomalagi qo, se isoqosoqo i Jiova. Eda na vakadinadinataka qori nida wilika na ivola qo. Nida saga na dautukutuku ni Matanitu ni Kalou meda vunautaka e vuravura raraba na itukutuku vinaka, eda vakayagataka kina na iwalewale qaseqase, wili kina na niusipepa, na tayabe, iyaloyalo, tikidua ni vunau, qaramavoni, retio, kei na internet.

Ena veivakalougatataki i Jiova, sa rawa meda tabaka na noda ivola totoka vakaivolatabu ena sivia ni 670 na vosa, qai veisoliyaki wale vei ira e levu. Era yalorawarawa na tacida mera bolecakacaka ena tara ni Vale ni Soqoni, Vale ni Soqoni Lelevu, kei na valenivolavola ni tabana ena vanua vutuniyau kei na vanua e se vakatorocaketaki tiko. Ena gauna ni leqa tubukoso, era tu vakarau na tacida mera vukei ira na vakaleqai, ra qai vakaraitaka nira tacidra ena “gauna ni rarawa.”—Vkai. 17:17.

Ena so na gauna, era saga na iliuliu ni lotu kei ira na dauveitusaqati mera ‘vakatubuleqa ena yaca ni lawa,’ ia e vaqaqacotaki noda vakabauta nida raica ni nodra sasaga qori e tini “tete kina na itukutuku vinaka.”—Same 94:20; Fpai. 1:12.

E ka dokai dina ni keitou okati vata kei kemuni meda nona lewenivuvale na Kalou. Mo ni kila ni keitou lomani kemuni dina. E qaqa ni neitou masu ni na vukei kemuni na ivola qo mo ni vakamareqeta dina na nomuni ivotavota vakayalo.—Maciu 24:45.

Salavata yani na vakanuinui vinaka,

Tacimuni,

iLawalawa Dauvakatulewa ni iVakadinadina i Jiova