Raica sara na lewena

Raica na lewenivola

 LESONI 18

Keimami Vukei Ira Vakacava na Taci Keimami ena Gauna ni Leqa?

Keimami Vukei Ira Vakacava na Taci Keimami ena Gauna ni Leqa?

Dominican Republic

Japani

Haiti

Ni yaco na leqa tubukoso, dau totolo sara neimami veivuke na iVakadinadina i Jiova mera vakacegui kina na taci keimami ena veivanua e vakaleqai. E laurai votu kina na neimami veilomani dina. (Joni 13:34, 35; 1 Joni 3:17, 18) Sala cava soti keimami veivuke kina?

Keimami cau vakailavo. Ni yaco na dausiga levu e Jutia, era vakarautaka na veivuke vakailavo na lotu vaKarisito mai Anitioki me baleti ira na tacidra vakayalo. (Cakacaka 11:27-30) Nikua tale ga, keimami dau vakauta na neimami cau vakaivavakoso mera vukei kina na taci keimami era sotava eso na ituvaki dredre ena veiyasa i vuravura.​—2 Korinica 8:13-15.

Keimami vakarautaka na veivuke e gadrevi. Eratou na vakadeitaka na qase ena vanua e tara na leqa tubukoso nira tiko taucoko ra qai bula vinaka na lewe ni ivavakoso. Ena gauna ni leqa tubukoso ena qarava na komiti ni vakacoko na wasei ni kakana, wainigunu, isulu, vanua ni vakaruru kei na veiqaravi vakavuniwai. E levu vei ira na iVakadinadina e tu vei ira na kila e gadrevi, era sauma ga nodra ivodovodo mera lai veivuke ena cakacaka ni vakacoko se vakavinakataki ni Vale ni Soqoni kei na nodra vale na taci keimami. Na neimami duavata kei na kila keimami rawata ena neimami dau cakacaka vata, e totolo kina na neimami veivukei ena gauna qori. Keimami dodoliga ‘vei ira keimami vakabauta vata,’ ia keimami dau vukei ira tale ga e duatani nodra lotu ke rawa.​—Kalatia 6:10.

Keimami dau veivakayaloqaqataki qai veivakacegui vakayalo. Era dau vinakata vakalevu na taci keimami era vakaleqai ena leqa tubukoso mera vakacegui. Ni yaco na leqa, e dau vakaukauataki keimami o Jiova “na Kalou e dau vakacegui keda ena ka kece.” (2 Korinica 1:3, 4) Keimami marau ni tukuna na yalayala ni Kalou ena iVolatabu vei ira era lomabibi, ena neimami vakayaloqaqataki ira ni sa voleka ni vakaotia vakadua na Matanitu ni Kalou na leqa e vakavuna na mosi kei na rarawa.​—Vakatakila 21:4.

  • Na cava era dau totolo kina ni veivukei na iVakadinadina i Jiova ni yaco na leqa tubukoso?

  • Na itukutuku veivakacegui cava keimami dau tukuna vei ira era sotava na leqa tubukoso?