Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 22

Na Cava e Dau Caka ena Valenivolavola ni Tabana?

Na Cava e Dau Caka ena Valenivolavola ni Tabana?

Yatu Solomoni

Kenada

Sauca Aferika

E duidui na tabana era veiqaravi kina na lewe ni vuvale e Peceli mera tokona kina na cakacaka vakavunau ena dua se vica na matanitu. Era na rairai veiqaravi eso ena timi ni vakadewa, tabaki ni mekesini, vakarautaki ni ivola kei na kena vakau, vakarautaki ni vidio kei na ka e rogoci, se so tale na ka e vauca na yalava.

Qarava na cakacaka na Komiti ni Tabana. E tataunaka na iLawalawa Dauvakatulewa na cicivaki ni valenivolavola ni tabana ina Komiti ni Tabana, eratou lewena e tolu se sivia na qase eratou rawata na kena ivakatagedegede. Eratou na dau vakaraitaka ina iLawalawa Dauvakatulewa na ripote ni toso ni cakacaka ena vanua eratou veiqaravi kina kei na leqa e sotavi tiko. Qori ena vukei ratou na iLawalawa Dauvakatulewa me ratou raica se usutu cava me na vakarautaki ena ivola, soqoni, kei na soqo lelevu tale eso. Na iLawalawa Dauvakatulewa e dau lesia eso mera ivakatawa ni dua na iwase kei vuravura. O ira qori era lai sikova na veivalenivolavola ni tabana, mera dusimaki ira tale ga na Komiti ni Tabana ena itavi era qarava. (Vosa Vakaibalebale 11:14) E dau vakarautaki e dua na porokaramu lavotaki e okati kina na nona ivunau na mata mai na valenivolavola liu, me uqeti ira ena vanua qori.

Era tokoni na ivavakoso. Era tiko ena valenivolavola ni tabana na tagane matua era lesi mera vakadonuya na tauyavu ni ivavakoso vou. Era dusimaka tale ga nodra cakacaka na painia, daukaulotu, kei na ivakatawa ni tabacakacaka era veiqaravi ena yalava e qarava na valenivolavola ni tabana. Era tuvanaka tale ga na soqo ni tabacakacaka, soqo ni veiwasewase, tara ni Vale ni Soqoni vou kei na kena vakau na ivola ina veivavakoso. Na itavi kece e qaravi ena valenivolavola ni tabana e vukea me tuvanaki vinaka kina na cakacaka vakavunau.​—1 Korinica 14:33, 40.

  • Era tokoni ira vakacava na iLawalawa Dauvakatulewa na Komiti ni Tabana?

  • Na cakacaka cava e qaravi ena valenivolavola ni tabana?