Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 11

Na Cava Keimami Dau Tiko Kina ena Soqo Lelevu?

Na Cava Keimami Dau Tiko Kina ena Soqo Lelevu?

Mexico

Jamani

Botswana

Nicaragua

Itali

Na cava era matamamarau kina o ira qo? Baleta nira tiko ena dua na neimami soqo. O ira na dauveiqaravi ni Kalou ena gauna makawa era dau vakaroti mera soqo vata vakatolu e veiyabaki, keimami dau cakava tale ga qori. (Vakarua 16:16) E veiyabaki e dau caka e tolu na neimami soqo: e rua na soqo ni tabacakacaka e yadua na siga, kei na soqo ni veiwasewase e tolu na siga. E yaga vakacava vei keimami na soqo qo?

E vakaduavatataki keimami. Me vaka ga nodra dau marautaka na Isireli mera vakacaucautaki Jiova “ena isoqosoqo,” keimami dau marau tale ga ni sokaloutaki koya ena neimami soqo lavotaki. (Same 26:12, ivakamacala e ra; 111:1) Qori e gauna vinaka me keimami sota qai veimaliwai kei ira na iVakadinadina i Jiova mai na so tale na ivavakoso se dua tale na vanua. Keimami na dau vakasigalevu ga ena vanua ni soqo me rawa ni keimami veimaliwai kina. (Cakacaka 2:42) Keimami vakila sara ga kina na veilomani e vakaduavatataki keimami na “mataveitacini kece” e vuravura raraba.​—1 Pita 2:17.

E vukea neimami toso vakayalo. E yaga vei ira na Isireli na nodra “kila na ibalebale ni vosa” ena iVolatabu e vakavulici vei ira. (Niemaia 8:8, 12) Keimami vakamareqeta tale ga na ivakasala vakaivolatabu e dau rogoci ena soqo lelevu qo. E dau yavutaki na porokaramu ni soqo ena dua na usutu vakaivolatabu. Na ivunau, vosa veitaravi kei na vakatasuasua e veidusimaki ena sala me keimami cakava kina na loma ni Kalou. E uqeti keimami na nodra irogo na taci keimami era sotava na ituvaki dredre, ia era yalodina tiko ga. E dau caka ena soqo ni veiwasewase na drama vakaivolatabu, e vakaibalebale kina vei keimami na itukutuku ena iVolatabu qai yaga na kena ivakavuvuli. Era dau papitaiso ena soqo lelevu va qori o ira era via vakaraitaka nira sa yalataki ira vua na Kalou.

  • Na cava e marautaki kina na neimami soqo lelevu?

  • Ena yaga vakacava na nomu tiko ena neimami soqo lelevu?