Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 17

Era Vukei Keimami Vakacava na iVakatawa ni Tabacakacaka?

Era Vukei Keimami Vakacava na iVakatawa ni Tabacakacaka?

Malawi

iWasewase lalai ni cakacaka vakavunau

Cakacaka vakaitalatala

Bose ni qase ni ivavakoso

E dau cavuti rau vakalevu na yapositolo o Paula kei Panapasa na iVolatabu vaKirisi vaKarisito. O rau na tagane qo erau ivakatawa dauveilakoyaki, erau dau sikova na ivavakoso taumada. Na cava na vuna? Erau kauaitaka dina na kedra ituvaki vakayalo na mataveitacini. E kaya o Paula ni vinakata me ‘lesu me lai sikovi ira na mataveitacini’ me rawa ni kila na kedra ituvaki. A bolea me lakova e vica vata na kilomita me lai vakaukauataki ira na mataveitacini. (Cakacaka 15:36) Qori sara ga na ka era cakava tiko o ira na neimami ivakatawa dauveilakoyaki nikua.

Era dauveivakauqeti. Era na sikova na ivakatawa ni tabacakacaka e 20 na ivavakoso se sivia. Ena rauta ni dua na macawa nona tiko ena dua na ivavakoso, ena caka vakarua na veisiko qori e veiyabaki. Keimami vuli vakalevu ena nodra ivakaraitaki vinaka, kei na nodra ivakaraitaki tale ga na watidra, ke ra vakawati. Era dau saga mera kilai ira vinaka na gone kei na qase, era vinakata tale ga mera tomani keimami ena cakacaka vakaitalatala kei na neimami vuli iVolatabu. O ira na ivakatawa dauveilakoyaki era dau tomani ira na qase ni ivavakoso ena nodra vakatawani na qelenisipi. E dau veivakayaloqaqataki tale ga na nodra itavi ena soqoni kei na soqo lelevu tale eso me keimami vakaukauataki kina.​—Cakacaka 15:35.

Era dauveikauaitaki. O ira na ivakatawa ni tabacakacaka era kauaitaka na ituvaki vakayalo ni ivavakoso. Era dau bose vata kei ira na qase kei na dauveiqaravi ni ivavakoso, mera veivosakitaka na toso ni ivavakoso qai vakatututaka na sala mera qarava vinaka kina na nodra itavi. Era vukei ira na painia me vuavuaivinaka na nodra cakacaka vakaitalatala, ra qai marau ni sotavi ira na ka vou ena ivavakoso, era marautaka tale ga na rogoca na nodra toso vakayalo. O ira kece na mataveitacini tagane qo era ‘cakacaka vata ena neimami qaravi.’ (2 Korinica 8:23) E dodonu me keimami vakatotomuria na nodra vakabauta kei na nodra qarava na Kalou.​—Iperiu 13:7.

  • Na cava na inaki ni nodra sikova na ivavakoso na ivakatawa ni tabacakacaka?

  • Ena yaga vakacava vei iko na nodra veisiko?