Raica sara na lewena

Raica na lewenivola

 WASE 14

Meda Daudina ena Ka Kece

Meda Daudina ena Ka Kece

“Keitou vinakata me keitou dina ena ka kece.”​—IPERIU 13:18.

1, 2. Cava e marau kina o Jiova nida saga meda daudina? Vakatauvatana.

NI RAU biubiu mai na sitoa e dua na veitinani, e tu vakadua o gone ni kidacalataka e dua na ka. E toka e ligana e dua na iyaya lailai ni vakatatalo a kauta mai na sitoa. A guilecava me biuta lesu ena vata se kerei tinana me volia. E rarawataka na ka e cakava qai kerei tinana me vukei koya. E vakatavitavi luvena, kauti koya me vakasuka tale ina sitoa na iyaya ni vakatatalo, me kere veivosoti tale ga. Na tina oya e marautaka qai sakitaka na ka e cakava o luvena. Cava na vuna?

2 Era dau marau na itubutubu nira saga na luvedra mera daudina. E marau tale ga na Tamada vakalomalagi “na Kalou daudina.” (Same 31:5) E marautaka noda saga meda daudina nida toso tiko meda matua vakayalo. Nida via vakamarautaki koya da qai tiko ga ena nona loloma, e bibi me tiko tale ga vei keda na nona rai na yapositolo o Paula: “Keitou vinakata me keitou dina ena ka kece.” (Iperiu 13:18) Meda veivosakitaka mada e va na basoga ni noda bula ena rairai vakatovolei kina noda daudina. Eda na qai veivosakitaka tale ga na veivakalougatataki e salavata mai.

MEDA KUA NI DAU VAKAISINI KEDA

3-5. E vakasalataki keda vakacava na Vosa ni Kalou me baleta na ca ni noda vakaisini keda ga? (b) Cava e ivukevuke meda kua ni vakaisini keda kina?

3 Na imatai ni ka meda vulica meda kua ni dau vakaisini keda. Ia ena sega ni rawarawa nida tamata ivalavala ca ga. A yaco qori vei ira mai Leotisea ni tukuna o Jisu era vakaisini ira ga ena nodra nanuma nira vutuniyau, ia era ‘dravudravua, era mataboko, ra qai luvawale’ vakayalo—e vakaloloma dina. (Vakatakila 3:17) Sa qai vakaleqa sara na ituvaki era tu kina na nodra vakaisini ira ga.

4 De o se nanuma tiko na ivakasala i Jemesa: “Ke dua e nanuma ni sa qarava tiko na Kalou ena iqaraqaravi e vakadonuya o koya ia e sega ni lewa vinaka na yamena, e vakaisina tiko ga na lomana, e tawayaga tale ga nona lotu.” (Jemesa 1:26) Eda vakaisini keda ga ke da sega ni lewa vinaka na yameda da qai nanuma ni na vakadonuya tiko ga o Jiova noda sokalou. E tawayaga noda qaravi Jiova ke da sega ni qarauna na vosa eda tauca. Cava meda cakava me kua ni yaco qori?

5 Eso na tikina ena wase ni nona ivola e cavuti mai cake, e vakatauvatana o Jemesa na ka dina ena iVolatabu ina iloilo. Eda vakasalataki kina meda ilovi keda ena lawa uasivi ni Kalou da qai cakava na veiveisau e gadrevi. (Wilika Jemesa 1:23-25.) Na iVolatabu e ivukevuke meda kua ni vakaisini keda, meda kila tale ga na ka e vinakati meda vakavinakataka. (Lele i Jeremaia 3:40; Akeai 1:5) E bibi tale ga meda kerei Jiova me vakalewa na keda ituvaki qai vakaraitaka vei keda na noda malumalumu meda vakavinakataka. (Same 139:23, 24) Na lasu e dau veicoriti, e bibi gona me tiko vei keda na rai i Jiova. E kaya na Vosa Vakaibalebale 3:32: “[E] sevaka o Jiova na tamata lawakica, ia e veitokani voleka kei ira na yalododonu.” Ena vukei keda o Jiova meda vakatotomuria na ivakarau ni nona raica na ka kei na nona rai me baleti keda. Meda nanuma tale ga na vosa i Paula: “Keitou vinakata me keitou dina.” Eda se ivalavala ca tiko ga, ia eda na saga vagumatua meda daudina ke vu dina mai lomada.

 VUVALE

Ke da daudina, eda na sega ni cakava na ka ca da qai vunitaka

6. Cava mera daudina kina vei watidra o ira na vakawati? Na leqa cava era na sega ni sotava kina?

6 E dodonu me ivakatakilakila ni vuvale lotu vaKarisito na daudina. E bibi me rau dau veivosaki vakadodonu na veiwatini. Me rau cata tale ga na ivalavala dukadukali e rawa ni veivakararawataki me vaka na veiwedevi kei na dua e sega ni kedrau isa ena Internet se na saravi ni iyaloyalo vakasisila se wiliki ni kena ivola. So na lotu vaKarisito era cakava vuni qori ra qai sega ni tukuna vei watidra. Qori e wili me lasu. Nanuma na ka e tukuna na Tui yalodina o Tevita: “Au sega ni vakailala kei ira na dau veidabui, au yawaki ira tale ga na vunitaka na kedra roka dina.” (Same 26:4) Ke o vakawati, kua ni vunitaka vei watimu na cala o cakava!

7, 8. Na ivakaraitaki vakaivolatabu cava era na vulica kina na gone mera daudina??

7 E ka vakayalomatua mera vakayagataka na itubutubu na ivakaraitaki vakaivolatabu nira vakavulici luvedra mera daudina. Rawa ni tukuni vei ira na nona ivakaraitaki ca o Ekani ena nona via vunitaka nona butako; nona lasu o Kiesai me rawaka kina; kei na nona butako o Jutasa qai lasu me bukiveretaki kina o Jisu.—Josua 6:17-19; 7:11-25; 2 Tui 5:14-16, 20-27; Maciu 26:14, 15; Joni 12:6.

 8 Ia era tu tale ga eso era ivakaraitaki vinaka. O Jekope a uqeti ratou na luvena tagane me ratou vakasuka tale na ilavo a tu ena nodratou taga ni nanuma ni a biu cala kina; vakayacora na bubului i Jefica o luvena yalewa, dina ga ni na vakuai koya mai na levu na ka; a sega ni tu suka o Jisu me soli koya vei ira na ilala dau veibuturaki me vakayacori kina na parofisai, ra taqomaki tale ga kina nona itokani. (Vakatekivu 43:12; Dauveilewai 11:30-40; Joni 18:3-11) Qori na ivakaraitaki vakaivolatabu e rawa nira vakavulici luvedra kina na itubutubu mera daudina.

9. Cava mera kua ni cakava na itubutubu ke ra vinakata mera daudina na luvedra? Cava e bibi kina nodra ivakaraitaki?

9 E dodonu mera raica vakabibi na itubutubu nodra itavi ni veivakavulici. A taroga na yapositolo o Paula: “Ia o iko o vakavulica tiko e dua tale, o sa bau vakavulici iko mada? O iko, o vunautaka tiko ‘Kua ni butako,’ o butako tiko?” (Roma 2:21) So na itubutubu era veivakaisini nira vakavulici luvedra mera daudina, ia era sega ni daudina o ira. Era na rairai vakaiulubaletaka nodra butakoca eso na ka e lailai ga na kena isau se ra ubia nodra lasu ena nodra kaya, “Sa kilai tu ni na butakoci na veika qo” se “Sega ni cala noqu lasu.” Se mani vakacava na lailai ni isau ni ka e butakoci sa wili ga me butako, se mani cava o lasutaka se o nanuma ni dua ga na ka lailai o lasu kina, o sa lasu ga. * (Wilika Luke 16:10.) E dau rawarawa sara mera kidava na gone na veivakaisini qai rawa ni vakaleqai ira. (Efeso 6:4) Se mani vakacava na kena takalevu tu nikua na lasu, era na tubu cake na gone mera vakalagilagi Jiova ena nodra daudina ke ra daudina na itubutubu.—Vosa Vakaibalebale 22:6.

 IVAVAKOSO

10. Cava meda qarauna nida veivosaki vakadodonu kei ira na tacida vakayalo?

10 E gauna vinaka ni noda vulica na daudina na noda veimaliwai kei ira na tacida lotu vaKarisito. Eda sa veivosakitaka mai na Wase 12, ni dodonu meda qarauna na vosa eda tauca, vakauasivi vei ira na tacida vakayalo. Na veitalanoa sega na betena e rawa ni tini ena kakase kei na vakaucaca! Ke da sega ni vakadeitaka e dua na italanoa, e vinaka meda lewa vinaka na tebenigusuda de da qai lasu. (Vosa Vakaibalebale 10:19) Ena yasana adua, noda kila mada ga ni dina e dua na italanoa e sega ni kena ibalebale ni yaga me talanoataki. De dua e sega ni dua kina noda bisinisi, e sega tale ga ni ka vakayalololoma meda talanoataka. (1 Cesalonaika 4:11) So era vakaulubaletaka nodra veibeci ena nodra tukuna nira vosa ga vakadodonu, ia e dodonu meda vosa vakayalovinaka e veigauna.—Wilika Kolosa 4:6.

11, 12. (a) (a) Cava e dau ikuri ni leqa vei ira eso era cala bibi? (b) Na lasu cava e vakavurea o Setani me baleta na cala bibi, eda na vorata vakacava? (c) Eda na dina vakacava ina isoqosoqo i Jiova?

11 E bibi meda daudina vei ira na veivakatawani ena ivavakoso. So era cala bibi ra qai vunitaka se ra lasu vei ira na qase nira tarogi, sa qai ikuri ga ni nodra leqa. Sa dau lai rua sara nodra ivakarau ni bula, era kaya nira qaravi Jiova ia ra tomana tiko ga nodra caka ca. Ena sega ni vakabauti na ka era tukuna se cakava. (Same 12:2) So tale era tukuna ga vei ira na qase ni ivavakoso eso na ka, ia era vunitaka na ka bibi e dodonu me kilai. (Cakacaka 5:1-11) Na nodra lasu e vu mai na nodra dau vakabauta na lasu e vakavurea o Setani me baleta na cala bibi.—Raica na kato “ Lasu i Setani Me Baleta na Cala Bibi.”

12 E bibi meda daudina ina isoqosoqo i Jiova ena noda vola vakadodonu na isaunitaro e tarogi me baleti keda. Nida vakalewena na ripote ni noda cakacaka vakaitalatala, meda kua ni lasutaka na ka eda vola. E vaka tale ga kina noda vakalewena na fomu ni so na taba ni veiqaravi tabu. Meda dau vola vakadodonu na keda ituvaki se so tale na ka e vinakati me kilai baleti keda.—Wilika Vosa Vakaibalebale 6:16-19.

13. Eda na dina vakacava ena noda veidinadinati vakabisinisi kei ira na tacida vaKarisito?

13 Na noda daudina vei ira na tacida vaKarisito e vauci tale ga kina na ka vakabisinisi. So na gauna era dau cakava na lotu vaKarisito na veidinadinati vakabisinisi kei ira na tacidra tale eso. Mera qarauna me kua ni veivosakitaki qori ena Vale ni Soqoni se gauna ni cakacaka vakaitalatala. Kaya mada ke lotu vaKarisito o boso ni cakacaka qai vakacakacakataki ira eso na tacina vakayalo. E dodonu me saumi ira ena kena gauna donu, solia na isau e yalataka vei ira kei na veika tale eso e vauci ena veidinadinati se lavaki vakalawa. (1 Timoci 5:18; Jemesa 5:1-4) Ke da cakacaka tiko vua e dua na tacida, e dodonu me veiraurau vinaka na levu ni ka eda cakava kei na keda isau. (2 Cesalonaika 3:10) Meda kua tale ga ni namaka me duidui na ka e caka vei keda baleta ni  boso na tacida vakayalo, meda nanuma ni dodonu meda cegu ena gauna ga eda vinakata se soli vei keda eso na ka e sega ni soli vei ira na kena vo.—Efeso 6:5-8.

14. Cava mera qarauna na lotu vaKarisito era vakailavotaka e dua na sasaga vakabisinisi, cava na vuna?

14 Vakacava ke da kerei meda vakailavotaka eso na sasaga vakabisinisi, meda solia se dinautaka e dua na uma ilavo? E veivakasalataki na iVolatabu ena dua na ivakavuvuli bibi: Me vakaivolataki na ka kece e caka! Qori sara ga na ka e cakava o Jeremaia, a biuta vakaivola na tikiniqele a volia, cakava na kena veidinadinati e matanalevu qai maroroya vinaka me ivakadinadina ke mani tarogi e muri na dodonu ni ka e caka. (Jeremaia 32:9-12; raica tale ga na Vakatekivu 23:16-20.) Noda vakaivolataka na veidinadinati vakabisinisi kei ira na tacida qai tiko na kena ivakadinadina, e sega ni kena ibalebale nida sega ni nuitaki ira. Ia ena sega ni basika kina na nanuma cala, na rarawa se veiba e rawa ni tini ena veisei. Mera nanuma na lotu vaKarisito era veidinadinati vakabisinisi kei ira na tacidra vakayalo ni na tawayaga nodra caka bisinisi vata ke vakaleqai kina na duavata kei na veiyaloni ena ivavakoso. *1 Korinica 6:1-8.

VANUA NI CAKACAKA

15. Cava na rai i Jiova me baleta na lasu ena bisinisi? Cava nodra rai na lotu vaKarisito me baleta na kena sa takalevu tu qori nikua?

15 E sega ni vinakati ga meda daudina ena ivavakoso. E kaya o Paula: “Keitou vinakata me keitou dina ena ka kece.” (Iperiu 13:18) E kauai vakalevu na Dauveibuli ena noda daudina tale ga ena ka vakabisinisi e vanua ni cakacaka. E cavuti vakavica vata ena Vosa Vakaibalebale na ivakarau bibi e veidabui. (Vosa Vakaibalebale 11:1; 20:10, 23) Ena gauna makawa e vakayagataki na  ivakarau ena ka ni bisinisi me vakarautaki kina na bibi ni veika e voli kei na ilavo e saumi kina. Era dau lawaki eso na dauveivoli ena nodra vakayagataka e rua na ivakarau, dua e ivakarau lasu mera vakaisini se lawakitaki kina na volivoli. * Na ivalavala qori e cata o Jiova! Meda cata gona na ivalavala kece e okati me lasu ke da via tiko ga ena loloma ni Kalou.

16, 17. Cava eso na ituvaki e takalevu kina nikua na lasu, cava era nakita dei na lotu vaKarisito mera cakava?

16 E sega nida kurabuitaka na takalevu ni lasu nikua baleta ni iliuliu ni vuravura qo o Setani. Eda temaki e veisiga meda lawaki. Ni vakaleweni na ivola kerekere ni cakacaka, levu era dau vakuria se bulia eso na ka era vola mera lasutaka kina nodra kila vakacakacaka kei na nodra vakaivola ena dua na taba ni cakacaka. Mera rawata na ka era vinakata, eso era sega ni dau sauma vakadodonu na taro nira vakalewena na fomu ni curuvanua, ivakacavacava, inisua, kei na so tale. Ena gauna ni veitarogi se ni vinakati mera vakamacala ena dua na ulutaga, levu na gonevuli era dau lawaki ena nodra kopitaka na nodra cakacaka eso tale mai na Internet me nanumi ga nira cakava. Eso tale era dau vaqumi ira na vakailesilesi mera rawata kina na ka era vinakata. Sega ni kurabuitaki na laurai ni itovo va qori nikua ni levu era “dau lomani ira ga . . . era na lomana na ilavo, . . . era na sega ni vinakata na ka e dodonu.”—2 Timoci 3:1-5.

17 Era vakadeitaka na lotu vaKarisito mera kua ni vakaitavi ena veika va ya. E sega ni rawarawa ena so na gauna meda daudina ni levu era rawaka ena nodra dau lasu. (Same 73:1-8) Ia e rawa nida vakaleqai vakailavo na lotu vaKarisito nida vinakata meda daudina “ena ka kece.” E yaga beka noda vakuai keda mai na so na ka me rawa ga nida daudina? Io! Cava na vuna? Na ka ni veivakalougatataki cava e salavata mai na daudina?

VEIVAKALOUGATATAKI NI DAUDINA

18. Cava e talei kina na daudina?

18 E sega ni levu sara na ka e tautauvata kei na nona kilai e dua me daudina qai nuitaki. (Raica na kato “ Au Daudina e Veigauna?”) E rawa ni vinaka kece na keda irogorogo! Ia e sega ni vakatau qori ena taledi e tu vei keda, iyau, keda irairai, ivakatagedegede ni bula, se so tale na ka o sega ni lewa rawa. E levu era sasagataka me vinaka na kedra irogorogo ia e tu tu yadua mera rawata. (Maika 7:2) So era na vakalialiai iko, ia eso tale era na taleitaki iko ni o daudina, era na nuitaki iko qai dokai iko tale ga. Era vakadinadinataka e levu na iVakadinadina i Jiova ni vinaka nodra bula vakailavo ena nodra daudina. Nira sake eso era lawaki, era vakacakacakataki tiko ga na iVakadinadina se ra kunea vakatotolo na cakacaka ni vinakati e dua e daudina.

19. Ena yaga vakacava ena noda lewaeloma kei na noda veiwekani kei Jiova na daudina?

19 Ke o mani vakalougatataki se sega ena cakacaka, e levu tale na ka ni veivakalougatataki e salavata mai na daudina. Ena vinaka kina nomu lewaeloma. E kaya o Paula: “Keitou nuitaka ni vinaka na neitou lewaeloma.” (Iperiu 13:18) Sega ni guilecava na Tamada vakalomalagi na keda irogorogo ni dau taleitaki ira na daudina. (Wilika Same 15:1, 2; Vosa Vakaibalebale 22:1.) Eda na tiko ga ena loloma ni Kalou ke da daudina, qori na icovi cecere duadua meda na rawata. Meda veivosakitaka mada e dua tale na basoga ni daudina: Na rai i Jiova me baleta na cakacaka.

^ para. 9 Ke dau lasu e dua ena ivavakoso me vakavu ca kina, ena rairai vinakati me vakatulewa na komiti ni veilewai.

^ para. 14 Raica na iKuri “Wali na Veileti Vakabisinisi,” me baleta na ka me caka ke lusi na bisinisi.

^ para. 15 Era dau vakayagataka na dauveivoli e dua na ivakarau ni bibi me baleta na volivoli kei na dua tale ena volivolitaki, ia era rawa tubu ruarua kina. Era na rairai vakayagataka tale ga na ivakarau ni bibi e balavu se bibi toka e dua na ligana mera lawakitaki kina na volivoli.