Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IKURI

Vakarokorokotaki ni Kuila, Veidigidigi, kei na Veiqaravi Raraba

Vakarokorokotaki ni Kuila, Veidigidigi, kei na Veiqaravi Raraba

Vakarokorokotaki ni kuila. Na vakarokorokotaki ni kuila kei na kena salututaki e dau salavata kei na sere ni matanitu ena so na gauna, era vakabauta na iVakadinadina i Jiova ni sa vaka sara ga na sokalou e vagolei kina na vakanuinui ni veivakabulai vua na matanitu kei ira na iliuliu, sega ni Kalou. (Aisea 43:11; 1 Korinica 10:14; 1 Joni 5:​21) E dua na iliuliu va qori o Tui Nepukanesa e Papiloni makawa. Mera qoroya na tamata nona lagilagi kei na nona dau guta na lotu, e vakaduria kina e dua na matakau vakaitamera qai vakarota mera cuva kina na tamata kece ni tekivu na ivakatagi e vaka na sere ni matanitu. Ia e tolu na Iperiu—Setareki, Mesaki, kei Apetiniko eratou bese ni cuva ina ivakatakarakara, dina ni ratou na totogimate.—Taniela, wase 3.

Ena noda itabagauna, “na boletaki vanua e kena ivakadei kei na kena usutu levu na kuila,” e kaya na daunitukutuku makawa o Carlton Hayes. “Era luvata nodra isala na tagane ni kau siviti ira na kuila; e volai na serekali e vakalagilagi kina ra qai lagata tale ga na gone na kena sere.” E tomana, na yalo ni boletaki vanua e tiko na kena “olodei” me vaka na vakananumi ni tugalala e Mereke e vakatokai na Fourth of July, vaka kina nodra vakalagilagi na tamata rogo mera vaka na “sanito” qai tiko tale ga na kena “vale” e vaka na vanua ni sokalou. Ena dua na soqo a vakayacori e Brazil, a kaya kina na minisita jenerali ni mataivalu: “Na kuila e rokovi qai sokaloutaki . . . me vaka ga  na kena sokaloutaki na Vanua.” Io, “na kuila e vaka ga na kauveilatai, e ka tabu,” a tukuna na ivola na Encyclopedia Americana.

E kaya na ivola vata ya ena dua na gauna wale ga qo, ni sere ni matanitu “e dau vakavotuya na yalo ni boletaki vanua, qai kerei kina na veidusimaki kei na veitaqomaki vakalou, mera taqomaki tale ga na lewenivanua se na nodra iliuliu.” Sega gona ni ka vakalialia nodra okata na tamata i Jiova me vaka ga na sokalou na soqo ni vakarokorokotaki ni kuila kei na sere ni matanitu. Ena ivakamacala me baleta na nodra bese ni vakarokorokotaka na kuila se vosa ni bubului ni matanitu na gone iVakadinadina i Jiova ena koronivuli e Mereke, e kaya kina na ivola na American Character: “Ena vica na kisi sa rogoci oti e vakadeitaka kina na Mataveilewai Levu ni sa okati me sokalou na vakarokorokotaki ni kuila.”

Era rokova na tamata i Jiova na nodra dodonu eso tale, dina nira sega ni vakaitavi ena soqo e sega ni vakaivolatabu. Ra rokova na kuila ni ivakatakilakila ni matanitu, era vaka tale ga na ‘italai ni Kalou’ na “iliuliu cecere.” (Roma 13:​1-4) Era muria kina na iVakadinadina i Jiova na vosa veiuqeti mera masulaki ira “na tui kei ira kece na vakaitutu.” Nida vinakata meda “bula galala tiko ga, meda vakacegu nida qarava mai vu ni lomada na Kalou, da qai yalodina kina.”—1 Timoci 2:2.

Veidigidigi vakapolitiki. Era rokova na lotu vaKarisito nodra vakatulewa eso mera veidigidigi. Era sega ni saqata na veidigidigi, ra qai doka na matanitu e veiliutaki. Ia era tawaveitovaki ena veika vakapolitiki ni matanitu. (Maciu 22:21; 1 Pita 3:​16) Na cava ena cakava na lotu vaKarisito ena vanua e lavaki kina vakamatanitu mera veidigidigi kece na lewenivanua, ra qai cati na sega ni lako ina vanua ni veidigidigi? Eratou lako sara ina buca o Tura o Setareki, Mesaki, kei Apetiniko, de dua ena vakatulewataka tale ga na lotu vaKarisito me lako ina vanua ni veidigidigi ke sega ni vakaleqa na nona lewaeloma. Ia ena qarauna se mani cava e cakava, me tawaveitovaki tiko ga. Ena vinaka gona me vakasamataka e ono na ivakavuvuli qo:

  1. Era “sega ni vakavuravura” na imuri i Jisu.​—Joni 15:19.

  2. Era matataki Karisito kei na nona Matanitu na lotu vaKarisito.—Joni 18:36; 2 Korinica 5:20.

  3. E duavata ena vakabauta na ivavakoso vaKarisito, ra qai vauci vata na lewena ena loloma vaKarisito.—1 Korinica 1:​10; Kolosa 3:14.

  4. Ke o digia e dua na vakailesilesi, o na saumitaro tale ga ena ka e vakayacora.—Vakasamataka na ivakavuvuli ena 1 Samuela 8:​5, 10-​18 kei na 1 Timoci 5:22.

  5. E raica o Jiova nira besetaki koya na Isireli nira vinakata me dua na nodra tui.​—1 Samuela 8:7.

  6. Me doudou na lotu vaKarisito ni vakamacalataka na Matanitu ni Kalou vei ira kece na tokona na veika vakapolitiki.—Maciu 24:14; 28:​19, 20; Iperiu 10:35.

Veiqaravi raraba. Ena so na vanua, e dau vinakata na matanitu mera vakaitavi ena loma ni dua na gauna ena so na cakacaka me baleta na bula raraba o ira na sega ni via curu ena mataivalu. Nida vakatulewa ena tikina qo, dodonu meda masulaka, veivosakitaka kei na dua na lotu vaKarisito matua vakayalo, da qai vakayagataka noda lewaeloma e vakavulici meda vakatulewa kina.—Vosa Vakaibalebale 2:​1-5; Filipai 4:5.

E kaya na Vosa ni Kalou meda “talairawarawa ina matanitu kei ira na veiliutaki, me[da] dau tu vakarau ni vakaitavi ena cakacaka vinaka kece ga, . . . me[da] yalorawarawa.” (Taito 3:​1, 2) Nida vakasamataka tiko ya, de vinaka meda taroga: ‘Niu ciqoma na cakacaka ni veiqaravi raraba, au se rawa ni tawaveitovaki tiko ga seu na rawa ni cakava kina na ka e okati ena lotu lasu?’ (Maika 4:​3, 5; 2 Korinica 6:​16, 17) ‘Ena vakadredretaka beka noqu vakayacora seu na sega sara ga ni cakava kina noqu itavi vaKarisito?’ (Maciu 28:​19, 20; Efeso 6:4; Iperiu 10:​24, 25) ‘Ena yasana adua, e okati beka ena cakacaka ya e dua na ituvatuva au na rawa kina ni vakaitavi vakalevu ena cakacaka vaKarisito, de dua na cakacaka vakaitalatala vakatabakidua?’—Iperiu 6:11, 12.

Ke vakatulewataka e dua na lotu vaKarisito me vakaitavi ena so na cakacaka me baleta na bula raraba mai na nona curu e valeniveivesu, dodonu mera rokova nona vakatulewa na nona itokani ena vakabauta. (Roma 14:10) Ia ke nanuma ni sega ni rawa ni vakaitavi kina, mera rokova tale ga na nona vakatulewa.—1 Korinica 10:29; 2 Korinica 1:24.