Raica sara na lewena

Raica na lewenivola

Mexico: Rau vulica vata na Braille

 VUNAU KEI NA VEIVAKAVULICI E VEIYASA I VURAVURA

Yasayasa vakaMerika

Yasayasa vakaMerika
  • VANUA 57

  • LEWENIVANUA 998,254,087

  • DAUTUKUTUKU 4,154,608

  • VULI IVOLATABU 4,353,152

“Daru na Vuli Vata”

A vinakata o Ismael mai Mexico me wilika na iVolatabu taucoko. Sa wilika oti vakarua na iVolatabu ena loma ga ni dua na yabaki, ia ni toso na gauna sa sega ni rai rawa. Oti e vica na yabaki, rau sota o Ismael kei Ángel e dua na iVakadinadina i Jiova qai wasea vua o Ángel na yalayala ni Kalou. E via vulica e levu tale na ka o Ismael, ia  e kaya ni na sega ni wilika rawa na iVolatabu baleta ni mataboko.

E kaya vua o Ángel, “Kua ni leqa, au na vakavulici iko ena Braille.”

E tarogi koya sara o Ismael, “O kila na Braille?”

E sauma o Ángel, “Sega, daru na vulica vata.” E kidroa o Ismael ena ka e tukuna qori o Ángel. E gole i vale o Ángel, lai vakadidike ena veika me baleta na Braille qai biuta vata ena papa eso na digo era vakatakarakarataka na matanivola. Oti sa qai vakavulici Ismael ena wiliki ni Braille. E totolo sara nona kila o Ismael na Braille, a tekivu gole ena soqoni, sa dau wilika tale ga na ivola vakaivolatabu me baleti ira na mataboko. Ena gauna qo, sa vuli iVolatabu tiko kei ratou e le va na mataboko o Ángel. Eratou dau veitalanoataka ena marau na le va qori na gauna ratou sa na rai tale kina ena Parataisi.

Au sa Sega ni Kilai Koya Tale

E vola o Viannei dua na tacida yalewa yabaki 14 mai Merika: “E dau veivosakitaka o neimami qasenivuli na veika me baleta na lotu ena lesoni na social studies. E tukuna me keimami cavuta eso na yaca ni lotu, au mani cavuta na iVakadinadina i Jiova. Era dredre na lewe ni noqu kalasi. Era kaya nida vakalusi gauna, sa sega tale ni dua na ka vinaka cake meda cakava, ra qai dau viritaka noda ivola. E vosavakacacataki keda tale ga o qasenivuli.

 “Au mani masuti Jiova me vakaukauataki au meu vunau. Au mani tukuna vei ira na lewe ni noqu kalasi ni noda dau gole e veivale e sega ni vakalusi gauna, o Jiova sara ga e talai keda meda lai wasea na ivakasala yaga ena iVolatabu. Au kerea mera kua ni viritaka na ivola ni rawa ni veisautaka nodra bula, ra qai vakabulai kina. A kere veivosoti vei au o qasenivuli, a yalataka ni na dolava nona katuba vei ira na iVakadinadina, ena vakarorogo qai wilika noda ivola.  Au sega ni vakabauta ni a qai yaco dina na ka e tukuna.

“Keirau sota tale kei na noqu qasenivuli ni oti e va na vula, dua na ka noqu kurabui niu rogoca ni sa vuli iVolatabu tiko. Oti e ono na vula a vaqarai au e koronivuli me vakavinavinakataka noqu a vunau vua. Au sa sega ni kilai koya tale ni sa kotiva na uluna, sa toro tale ga na kumina. Sa dua tiko na dautukutuku bera ni papitaiso ena gauna qo.”

 Vunau ena Amazon

Dua na ka e kauaitaki vakalevu ena yabaki sa oti me baleta na yasayasa vakaitamera na Amazon mai Brazil. E levu ena yasayasa qori era se bera vakadua ni rogoca na itukutuku vinaka. E mani vakadonuya na iLawalawa Dauvakatulewa me vakayacori e dua na cakacaka lavotaki ena yasayasa na Amazon. Ena vakayacori tiko e keri na vunau me dua na yabaki, me rawa nira rogoca na itukutuku vinaka e vica vata na udolu era tiko ena veivanua tu yawa ena yasayasa na Amazon.

Brazil: Vunau ena yasayasa na Amazon

Sa qai digia na valenivolavola ni tabana e 53 na tauni era toka ena bati ni uciwai na Amazon, mera veivakaicilitaki vei ira na lai vunau. Ena loma ga ni va na vula, era bole e sivia na 6,500 na dautukutuku mera veitokoni ena vunau.

E tini na tacida tagane kei na yalewa eratou lai tiko me 11 na siga ena tauni tu yawa o Anamã, e sega ni dua na dautukutuku ena tauni qori. Ratou solia rawa e sivia na 12,500 na ivola qai tauyavutaki e rauta ni 200 na vuli iVolatabu. Ena gauna qo era sa vuli iVolatabu tiko ena talevoni. E vakayacori tale ga na soqoni ena nodratou tiko voli ena tauni ya na mataveitacini. Ena iotioti ni soqoni ni bera ni ratou biubiu mai Anamã, dua na ka nodratou marau na tacida nira tiko kina e le 90. Sa vo meda na qai raica na ripote taucoko ni cakacaka lavotaki a vakayacori ena yasayasa na Amazon.

Vakatututaka na jw.org

Sa ono na yabaki nodrau kalasi vata o Jehizel kei Mariana mai Venezuela. E dau vakalialiai Jehizel o Mariana ni dua na iVakadinadina i Jiova. E nanuma o Mariana ni sega ni marautaka tu na bula o Jehizel. Dua na siga ni baci vakalialiai  Jehizel o Mariana, sa qai vakasamataka o Jehizel me kaya: “Mariana rai mada ena neimami website na jw.org. Gole ina ‘Find Videos,’ qai tabaka na kato ‘Teenagers.’”

E qiriti Jehizel o Mariana ena yakavi tiko ga ya, e kaya: “Au sa qai kila na vuna o duatani kina.”

Ni sega ni kila na ka e vakaibalebaletaka, e taroga sara o Jehizel, “O baci veivakalialiai tiko mai qori?”

E kaya o Mariana: “Sega, au sa na sega ni vakalialiai iko tale. O vakaraitaka vei au ni ka au nanuma tu ni na marautaki kina na bula e vakavuna sara tiko ga vei au e levu na leqa.” A vulica na iVolatabu o Mariana, sa tiko tale ga ena soqoni ena gauna qo.

 Tarogi na iTalatala

A vunivola tu ni nodratou lotu e Haiti e dua na marama o Gérole. Dua na ka nona kurabui nira sauma kece nona taro na iVakadinadina mai na iVolatabu. Rau mani vakadonuya kei luvena yalewa me rau vulica na iVolatabu. Na levu ni nodrau taleitaka na ka rau vulica, rau kerea sara me rau vuli vakarua ena dua na macawa.

Oti e tolu na vula nodrau vuli, a golevi nodratou italatala o Gérole qai tarogi koya ena va na taro: “Na yabaki cava a veiliutaki kina vakatui o Jisu? Nira mate na tamata vinaka, era na gole i vei? Vakacava o ira na tamata ca, era na gole i vei nira mate? A mate ena cava o Jisu, na kau se kauveilatai?” A kaya na italatala ni na sauma ga na ikarua kei na ikatolu ni taro, e kaya sara: “O ira na iVakadinadina i Jiova era vakabauta nira na lako i lomalagi e le 144,000. Ia au vakabauta nira na lako i lomalagi o ira kece era cakava na inaki ni Kalou. O ira na tamata ca era na vakamai tawamudu i eli.” A tarogi koya sara o Gérole se tikinivolatabu cava e tokona nona ivakamacala. E rarawa o Gérole ni sega ni sauma rawa o italatala. Sa qai uqeti koya ga qori me vulica tiko ga na iVolatabu. A kere vakacegu mai na lotu a lewena tu o Gérole. E kaya ni levu sara na ka e vulica ena tolu mada ga na vula e vuli iVolatabu kina kei ira na iVakadinadina i Jiova, ni vakatauvatani kei na 30 vakacaca na yabaki a gole tu kina ina nona lotu makawa. Rau sa papitaiso o Gérole kei na luvena yalewa, qai 23 nodrau vuli iVolatabu.

Haiti: Levu nodrau vuli iVolatabu o Gérole kei luvena yalewa