Ni se qai murivuli ga o Olivia mai Ositerelia, sa tekivu sureti nona qasenivuli tiko ina iVakananumi. E cakava voli qori me walu na yabaki. Ena 2016, a qiriti Olivia o nona qasenivuli qai kaya ni vinakata me tiko ena iVakananumi. E kaya tale ga vua ni dau marautaka dina nona veisureti voli mai e veiyabaki. A qai gole kei na watina o qasenivuli  ina iVakananumi. E nanuma lesu o wati qasenivuli na nona se cakacaka tu ena matabose ni tauni donuya na tara ni Vale ni Soqoni e kea. E kaya vei ira na mataveitacini ni totoka qai maqosa na itaratara ni Vale ni Soqoni. Na levu ni nodrau marautaka na veiwatini na iVakananumi, erau dua kina vei ira na iotioti ni biubiu mai ena yakavi ya.

E lotu Katolika kaukaua o Jacintu kei na watina erau tiko e Timor-Leste. Erau kidacala ni sa dua na iVakadinadina i Jiova na luvei tuakai Jacintu ratou tiko vata, sa sega ni lotu vata kei rau. Ni via vakacalai luvei tuakana o Jacintu, a wilika kina na ivola Na Cava Mada e Kaya na iVolatabu? A nanuma ni na raica kina na ivakavuvuli lasu. Ia e kaya vei watina: “Au sa wilika na ivola. E totoka na ka au wilika kina.”

E kaya o watina: “Vaka vei au o sega ni wilika vinaka na ivola, wilika tale, gauna qo mo wilika vakamalua.”

E wilika tale o Jacintu, qai kaya vei watina: “E dina taucoko na ka e tu kina. Era yavutaki kece ena iVolatabu. E tukuni tale ga kina na nodra sokaloutaki na mate.”

E kaya tale o watina: “Wilika tale mada, ia qo mo toqarukutaka na parakaravu yadua qai vulica vinaka. O na raica kina eso na cala.”

E wilika qai vulica vinaka o Jacintu na ivola, e toqarukutaka tale ga na parakaravu kece. Na ikatolu ni gauna e dikeva kina na ivola o Jacintu, e kaya sara: “E dina  taucoko! E dina o luvei tuakaqu.” Sa vulica tiko na iVolatabu kei ira na iVakadinadina i Jiova ena gauna qo o Jacintu.

E sikova e dua na marama ni Pohnpeia e dua na tacida yalewa e painia mai Guam, qai vakaraitaka vua na vidio Vuna mo Vulica Kina na iVolatabu. E kaya na tacida ni na lesuvi koya tale. Ni lesu tiko vakavica na tacida, e sega ni sotava na marama ya. Dua tale na gauna ni gole yani na tacida, e yali tale na marama, e tiko ga o luvena yalewa. E nanuma sara na tacida me vakaraitaka vei goneyalewa na vidio Mo iTokani i Jiova, e taleitaka o goneyalewa na ka e sarava. Ni gole na tacida ena dua tale na gauna, rau sa qai sota kei tinai goneyalewa. E taleitaka tale ga na nodrau veitalanoa ena iVolatabu. E tukuna sara o goneyalewa vei tinana me rau lai lotu ena nona valenilotu na marama a  vakaraitaka vua na vidio. E taleitaka sara ga o tinana na ka e rogoca qori. A vakaraitaki vua na icakacaka ni vuli iVolatabu, qai tekivu sara na vuli.

O Terence e dua na ivakatawa dauveilakoyaki mai Papua Niu Kini. Erau gole kei na watina o Stella ina vanua e sega ni lesi ina dua na ivavakoso. E tukuna o Terence: “Ni keirau se moce toka ena imatai ni siga, keirau sa rogoca na tukituki e katuba. Era sa wawa tu e tuba na lewenivanua, keirau mani vunau vei ira mai na ono na kaloko ena mataka ina sigalevu. Keirau cegu vakalailai me keirau sili, ia keirau raica ni levu tale era sa wawa tu.  Keirau vunau tale mai na rua na kaloko ena yakavi me yacova na bogilevu.” Ena siga tarava, rau nanuma na veiwatini me rau biubiu vakamataka me rau lai vunau ena dua tale na vanua. Nira lai raici rau yani na lewenivanua ena nodrau icili, rau sa yali. E kaya o Terence: “Nira rogoca na vanua keirau gole kina, era muri keirau yani. Keirau mani vunau tale me yacova na sigalevu. Ni keirau lesu i vale, era sa waraki keirau tu eso tale na ilala. E yaco tiko qori ena siga kece keirau toka kina e kea. Era ‘vaka na sipi e sega na kena ivakatawa.’”—Maciu 9:36.

A mosi na ligai Agnès e dua na painia mai New Caledonia, mani gole vua e dua na dauveibobo. E kaya sara na dauveibobo vei Agnès ni kauai vakalevu ena veika rarawa era sotava tu na tamata, e lomatarotarotaka kina ni dauloloma na Kalou. E vakavinavinakataki Jiova lo o Agnès ni dolava vua e dua na sala me vunautaka kina na ka dina me baleti koya. E vakaraitaka vua na dauveibobo na tikidua Ena Oti Ninaica na Rarawa? qai wilika vua na Vakatakila 21:3, 4.

E kaya sara na dauveibobo: “Au sega ni kila ena tiko na tikinivolatabu qori ena noqu iVolatabu se sega, na noqu iVolatabu e tu ga kina na Kosipeli.” Ni kila ni iVakadinadina i Jiova o Agnès, e kaya na dauveibobo ni sa sotavi ira oti na iVakadinadina ena nona vanua mai Chile.

E nanuma sara o Agnès e dua na itukutuku mai na valenivolavola ni tabana e Chile a vakaraitaki ena JW Broadcasting. Ena nona veisiko tarava, e vakaraitaka ena nona tablet vua na dauveibobo na itukutuku mai Chile. E qoroqoro na dauveibobo ni raica na Peceli kei na Vale ni  Soqo Lelevu mai Chile e vakaraitaki toka ena vidio. E kaya tale o Agnès: “Qo e dua tale na ka au kauta mai me nomu, e dua na iVolatabu taucoko mo rawa ni wilika kina na Vakatakila 21:3, 4, na tikinivolatabu au wilika vei iko ena macawa sa oti!” Ena levu ni nona marau na dauveibobo, e tucake mai na nona idabedabe, mokoti Agnès qai kaya: “Vinaka vakalevu na rua na iloloma totoka qo!”

Ena nona veisiko tarava o Agnès, sa kauta tiko na ivola Na Cava Mada e Kaya na iVolatabu? qai vakamacalataka vua na veika e vakavuna tiko na rarawa e vuravura. E kaya na dauveibobo ni vakarau gade i Chile, ena kauta tiko na ivola me lai wilika.