E gole yani ena qiqi ni vunau e matanalevu e dua na turaga mai Georgia, me vakarerei koya na tacida e duri tu e yasa ni qiqi. E kailavaka: “O na sega ni vunau eke! Na matanitu qo e kilai ga kina na lotu Orthodox.” E tarogi koya sara vakayalovinaka na tacida ke sa bau wilika oti na noda ivola. E sauma lesu na turaga ya: “Sega, au se bera ni wilika.” E  mani kerea na tacida me wilika mada e liu e dua na noda ivola. Na nona vosa vakayalovinaka na tacida e malumu sara ga kina nona cudru na turaga ya, mani kauta eso na ivola. Ni oti e vica na siga, e lesu tale yani na turaga ya me kere veivosoti ena nona vosa vakaukaua e liu. E kaya ni a lai wilika na ivola vei tinana e mataboko. Erau taleitaka na veika rau wilika, erau vinakata tale eso na ivola vou. Gauna qo, e dau lako wasoma ina qiqi na turaga qori me lai kauta na ilavelave vou ni mekesini.

Ni rau vunau voli e rua na tacida tagane mai Azerbaijan, erau raica ni duri tu ena dua na matanivale e dua na cauravou. Rau mani vunau vua. E kaya o cauravou: “Au sega ni via vakarorogo, au na valavala ca keu vakarorogo.” E ucuna mai na isele qai kaya: “Au se qai lawakitaki ga, au na vakayagataka na isele qo meu sauma kina na ka a caka vei au.”

Erau kidacala na tacida rau qai kaya: “O na valavala ca ga ke o laba.”

E taroga sara o cauravou: “Na cava meu cakava?” Rau wilika na tacida na Roma 12:17-21 rau qai vakamacalataka ni Kalou ga e dodonu me veisausaumi, meda kua ni ‘rawai ena ca o keda, meda rawa tiko ga na ca ena vinaka.’ Rau vakamacalataka tale ga na yaga ni vosa vakayalovinaka, rau tukuna ni na ca nona lewaeloma ke vakamatea e dua. E taleitaka na veika e rogoca, oti e biubiu sara.

Eratou sota tale ni oti e dua na aua, e kaya sara o cauravou: “Au sa lesu mai vua na tagane au via vakamatea. Au  sega ni cakava vua e dua na ka, keirau veivosakitaka ga vakayalovinaka na ituvaki a yaco. Au vakavinavinakataka na nomudrau veivuke.” Erau kaya vei cauravou na tacida ni o Jiova ga a vukei koya.

Sa dede sara nona malumalumu tu vakayalo e dua na tacida yalewa mai Norway. Ia e dau lako sivita na tacida qori na qiqi ni vunau ni lai volivoli.

E sega ni dau vosa vei ira na iVakadinadina era duri tu e yasa ni qiqi. Ia e dau dreta toka na matana na totoka ni itaba ena pousta. Nodra matadredredre kei na kedra rairai totoka na iVakadinadina era duri tu e yasa ni qiqi, e uqeti koya na tacida yalewa qori me lesu vei Jiova kei ira na nona tamata.

E raica tale ga na ivakatakilakila ni noda website na jw.org, mani nanuma me lai rai kina. E kurabui na tacida qori ni raica na rawarawa ni kena vaqarai na Vale ni Soqoni e voleka duadua, kei na gauna ni soqoni. E download eso nona ivola mai na website, ni a sa nanuma tiko me gole ina soqoni. Era marautaki koya na mataveitacini, era veivosakitaka tale ga na qase ni ivavakoso me vuli iVolatabu kei na dua na tacida yalewa. Sega ni dede sa veitokani vinaka sara kei ira na mataveitacini, qai vakabulabulataki tale vakayalo. Sa soqoni wasoma tiko ena gauna qo, qai vakaitavi vakalevu ena cakacaka vakavunau. Dua na ka nona marau ni sa veiwekani voleka tale kei Jiova.

O Ronja e dua na tacida goneyalewa yabaki 15 mai Norway. Dua na siga eratou veitalanoataka sara e loma ni basi kei na tolu na cauravou ratou vuli vata na bula vakaidewadewa.  E sega ni marautaka o Ronja nodratou sega ni doka na ka e vakabauta na nona icaba. Ni sega ni matata sara vua na ka me vakamacalataka, a kerei tinana me vukei koya ena so na ivakadinadina e rawa ni vakayagataka me vakadeitaka kina ni bula dina tiko na Dauveibuli.

Ni ratou vodo basi tale ena siga e tarava, e vakamacalataka sara o Ronja vei ratou na tolu na cauravou na ka sa vakarautaka toka mai. Ia eratou vakalialiai koya ni vakabauti Jiova. E kailavaka e dua vei ratou: “E sega ni dua ena loma ni basi qo e vakabauti Jiova! Laveliga o cei e vakabauta na bula vakaidewadewa? Laveliga tale ga o cei e vakabauti Jiova?” E laveliga e dua na gonetagane lailai qai kaya: “Au vakabauti Jiova!” Dua na ka nona kurabui o Ronja. Rau kaya e rua tale na gone, “Keirau tale ga!” Era duavata ena ivakamacala i Ronja eso na gonevuli era rogoca toka na nodratou veitalanoa!

Erau gole ina valenivolavola ni tabana e Denmark ena dua na yakavi e rua na turaga ni Siria erau vosa vakaArapea. Rau kaya sara vua na tacida yalewa e dau kidavaki ira na vulagi, ni rau vaqarai ira tiko na iVakadinadina i Jiova. Erau kidacala ni tukuna na tacida ni rau sa gole donu yani. Erau kila vakacava na vanua e tiko kina na valenivolavola ni tabana? Erau a gole ina laibri, rau vakaraitaka vua e dua e cakacaka tiko e kea na itaba ena nodrau talevoni. Qori na itaba ni ivola vakaArapea Na Cava Mada e Kaya na iVolatabu? O koya e cakacaka tiko ena laibri a qai vakaraitaka vei rau na valenivolavola ni tabana.

Ni rau sega ni kila vinaka na vosa vakaDenmark, a mani kacivi mai e dua na tacida tagane e kila na vosa vakaArapea. E qai kilai ni via vulica e dua vei rau na turaga qori na iVolatabu. E taura sara na tacida na yacana, na vanua e tiko kina, kei na nona naba qai kaya ni na sikovi koya yani kei na dua tale na tacida tagane e kila tale ga na vosa vakaArapea.

Gauna rau gole kina na tacida ina nona vale na turaga e tataleitaki, rau qai kila ni se sega ni bau sotavi ira na iVakadinadina i Jiova. E kaya vei rau na tacida ni a kunea e dua na ivola vakaArapea ena nona katonimeli, e sega ni kila e vakau yani vei cei ni sega ni dua na yaca e volai tu kina. Ni sega ni kila na wilivola, a kerea e dua na nona itokani me wilika vua na ivola. Oti ga e tolu na siga na kena wiliki na ivola taucoko, sa vakadeitaka sara ga na turaga qori ni sa kunea na ka dina.

Ni vulagi e Denmark, e yawa mai vei ratou nona vuvale qai sega ni rawarawa na bula, e vakacegui koya sara ga na  veika e rogoca ena iVolatabu. Na imatai ni gauna rau gole yani kina na tacida, e tarogi rau: “Na cava drau sega ni gole makawa mai kina? E yaga dina vei au qo.” E tomana tiko ga nona vuli kei rau na tacida, qai dau rai vakanamata ina nona gauna ni vuli.

A manidia tu ni dua na kabani ni tavako e Ukraine o Dmitry. E cakacaka sau vinaka qori, ia e kere vakacegu ena gauna e kila kina na vakarerevaki ni vakatavako. Ni oti toka ga e tolu na vula, rau mate o tinana kei vugona. E kidacala ena nodrau takali e rua na wekana voleka. E nanuma ni na vakacegui koya qai sauma nona lomatarotaro na lotu a lewena tu, ia e sega ni vaka kina. E kaya vua e dua nona itokani ni o koya e lotu Orthodox ena “taubena na kauveilatai, ia e sega ni vakainaki nona bula.” Qori sara ga na ka e vakila voli o Dmitry. E sega ni kila e dua na ka me baleta na Kalou se na iVolatabu. E mani kere veivuke ena masu ena levu ni nona rarawa. E qai vakasamataka ni sa dau rogoca oti eso na ka me baleti ira na iVakadinadina i Jiova. E raica sara ena internet na noda website, qai kurabuitaka na levu ni itukutuku e tu kina me baleta na iVolatabu. E mani vaqara na Vale ni Soqoni e voleka duadua vua. Ni yaco yani ena vanua ni soqoni, e kidavaki koya e dua na tacida tagane qai taroga ke vinakata na veivuke. E kaya o Dmitry: “Au vinakata meu vulica na iVolatabu.” Sa oti qo e ono na vula nona vuli o Dmitry, sa dau tiko ena soqoni qai vakaitavi kina.

Erau taleitaka o Paul kei Faith mai Peritania na nodrau veitalanoa kei na dua na marama o Susan, rau qai  tuvanaka me rau sikovi koya tale. A sega ni tu e vale o Susan ena gauna rau gole yani kina o Paul kei Faith. Rau mani muria na vakatutu ena Noda Cakacaka Vakaitalatala ni Noveba 2014, rau vola e dua na itukutuku lekaleka ni rau na lesuvi koya tale ena siga tarava. Ni rau gole tale yani, erau raica ni sa kabi toka e dua na itukutuku ena matanikatuba i Susan. E vola toka kina o Susan ni se gole tu i volivoli, e vakavakarau tiko ena vakamau i luvena yalewa. Rau vola tale e dua na itukutuku lekaleka o Paul kei Faith, rau kaya toka kina ni rau na lesu tale yani ena macawa tarava. Sa waraki rau toka o Susan ena siga rau lesu yani kina o Paul kei Faith, qai tekivu vulica sara na ivola Kaya na iVolatabu.

E kerea o Susan me cegu toka mada na nodratou vuli ni sa vakarau vakamau o luvena. Ni rau gole tale na veiwatini, erau sega ni sotavi Susan. Rau mani vola na nodrau  naba ni talevoni rau qai vakabira ena katuba. Dua na ka nodrau marau ni vakauitukutuku yani vei rau o Susan ena talevoni. A kere veivosoti ena nodratou sega ni sota ni a veitalanoa tiko kei na marama eratou toka veitikivi ena gauna rau gole yani kina. Ia qo sa sega ni calata o Susan nona vuli, sa tiko tale ga ena soqoni.

Erau dau qacoya o Paul kei Faith na volai ni itukutuku lekaleka ena nodra katuba na itaukeinivale. Erau kaya: “E yaga dina na neirau dau vola na itukutuku lekaleka qai vakabira ena nodra katuba na tataleitaki!”

A curu e valenibula e dua na tacida tagane mai Hungary ena Okosita 2014, ni tauvi koya na mate ni yatevuso. Sega ni dede nona curu, sa mate. Ia qo na ka a talanoataka na wati tacida tagane me baleti Tünde na nasi a qaravi watina:

“Keirau a tiko vakaveitinani ena Soqo ni Veiwasewase ‘Vakatotomuri Jisu!’ ena 2015. Ni keirau lesu tiko vakaveitinani i vale ni oti na ikatolu ni siga ni soqo, au kidacala ni sa duri tu e mataqu e dua na marama. E biuta e ra nona kato, mokoti au qai tagi. Na marama qori o nasi Tünde, a qaravi watiqu voli e valenibula. E kaya o Tünde ni sa dui tu ga na nasi era lesi mera qaravi ira na tauvimate. Sa qai dau masulaka voli o koya me qaravi watiqu. E qai yaco dina na ka e masulaka!

“E kaya o Tünde ni nona ivakaraitaki vinaka o watiqu, nona vakabauta, kei na nona dau vakamacalataka na nona inuinui e uqeti koya me vulica na iVolatabu kei ira na iVakadinadina i Jiova.

“E tomana tiko ga o Tünde ena gauna qo nona vuli  iVolatabu, e rai vakanamata tu ina gauna ena vakaturi kina o watiqu. Ena qai tukuna vua ena gauna qori ni nona ivakaraitaki vinaka, kei na nona vakabauta e uqeti koya me vulica na veika me baleti Jiova kei na veika totoka e yalataka.”

Na vakaduduile kei na sogo gaunisala e vakavuna me yadravi na iyalayala ni vanua o Kirisi kei Bulgaria ra qai dau tarovi na lori era via takoso. Era vakayagataka vinaka na ituvaki qori na lewe ni dua na ivavakoso e Bulgaria e toka volekata na vanua era yatuni tu kina na lori. Era gole na mataveitacini ra qai kauta na ivola ena 12 na vosa. E levu vei ira na draiva ni lori lelevu qori era dau wawale ra qai vuturi ena balavu ni wawa, ia era dau via veitalanoa tale ga. Era tu vakarau na tacida mera vakarogoci ira, uqeti ira qai vakamacalataka vei ira na inuinui. E tarogi ira na tacida e dua na draiva ni lori, “Oni iVakadinadina i Jiova?” Ni vakaio, e kaya tale o draiva, “Au kila sara ga, o ira ga na iVakadinadina i Jiova era dau vunau va qo.” E kaya e dua na draiva ni lori mai Austria: “Keimami sega ni rawa ni dro! Vinaka vakalevu na cakacaka! Yalovinaka ni tomana tiko ga na nomuni dau veivakacegui kei na nomuni vakamacalataka na inuinui.” E kaya e dua tale na draiva: “Au dau sega ni via wilika na nomuni ivola. Ia qo au sa wilika.” E tagi e dua tale na draiva ni lori ni vunau vua e dua na tacida. E kaya ni dua na iVakadinadina, ia sa malumalumu tu vakayalo. E uqeti koya na tacida me kua wale ga ni wilika noda ivola, ia me veitaratara sara ina dua na ivavakoso.