Ni waraki vuniwai tiko o Jonathan ena Yatu Filipaini, e kauai sara o Laila na marama e dau veikidavaki e valenibula ena savasava ni kena irairai kei na totoka ni nona isulusulu o Jonathan. A mani taroga o Laila ke dua na vakailesilesi ni inisua o Jonathan. E kaya o Jonathan ni dua na iVakadinadina i Jiova, e lai raica yani e  dua na turaga iVakadinadina e tauvimate qai vinakata na veivuke. E kurabui o Laila qai tukuna vei Jonathan ni se qai mate ga o tamana, qai dau taleitaka na wilika na Vale ni Vakatawa. E vakamacalataka o Jonathan na Joni 5:28, 29, qai solia na tikidua Na Cava e Nodra iNuinui na Wekada Lomani Era sa Mate?

E dau kauta o Jonathan eso tale na ivola nei Laila ena gauna e gole kina i valenibula. A veivosakitaka tale ga me  vuli iVolatabu kei Laila e dua na tacida yalewa. Toso na gauna sa vuli iVolatabu tale ga o watina, tacina, kei tinana.

A tarogi Laila ena dua na siga o Rose erau tiko veitikivi se cava sa rui levu kina nona vulagi. E vakamacalataka o Laila ni vuli iVolatabu tiko kei ira na iVakadinadina i Jiova. A makutu tale ga o Rose me vulica na iVolatabu. Dua na gauna ni gade i nakoro o Rose, a talanoataka vei Abigail na tacina na veika sa vulica. E taleitaka na ka e rogoca o Abigail, mani kerea me vulica na iVolatabu. A vuli iVolatabu tale ga o nodrau na.

A papitaiso o Laila ena dua na soqo ni veiwasewase, sa papitaiso tale ga o tinana. Rau papitaiso ena yabaki sa oti o Rose kei tacina. Gauna qo sa dau tiko wasoma ena soqoni o tinai Rose. Eso tale na wekai Laila era sa vulica tiko na iVolatabu. Io, a wasei na ka dina vua e dua, ia e levu tale era qai tataleitaki!

E vuavuaivinaka tiko na yalava ni vosa vagalu e Sri Lanka. A sega ni yacova mada ga na 80 na levu ni didivara era kila na iVakadinadina i Jiova ena 2015, qai volai tu ga ena pepa na yacadra kei na nodra itikotiko. Ia sega ni dede sa tauyavu na imatai ni ivavakoso vagalu e Sri Lanka. Sa maroroi tale ga ena kompiuta na kedra itukutuku e rauta ni 420 na didivara, kei na idusidusi ni gaunisala ena veivuke ena nodra sikovi ni vakayagataki na idusidusi ni veitosoyaki e vakatokai na GPS. E rauta ni 80 na pasede na didivara era sa veitalanoa kei ira na tacida nira sikovi sara ga ena nodra vale, se ra veivosaki ena iyaya vakalivaliva kei na talevoni. E kaya e dua na veiwatini daukaulotu: “E liu era dau sikova ga na tacida na didivara era sa veikilai  rawa tu, ia qo sa dua sara ga na nodra yalava ni vunau.”

Ke mani lutu mada ga ina 30 na dikiri na celsius na batabata e Mongolia, era gumatua ga na tacida na vunau e matanalevu ena siti. A taura na ivola mai na qiqi e dua na turaga e vakailesilesi ni matanitu, qai vola e dua na ivola ni vakavinavinaka. Qo na lewe ni ivola: “Au lotu Buda. Au dau vakadikevi ira na veilotu tale eso niu vakabauta ni dodonu meda vaqara eso tale na gaunisala, meda kua ni muria tu ga e dua na gaunisala. Niu wilika oti eso na ivola oni vakarautaka, au nanuma meu vola e dua na ivola meu vakaraitaka kina noqu rai. Dua na ka nomuni sasaga kei na gauna oni vakayagataka me vakarautaki kina na ivakasala yaga. Au vulica ena nomuni ivola ni dodonu me wiliki na iVolatabu ni tiko kina na ka dina, kei na idusidusi ena yaga ena noda bula. Au via vakavinavinakataka na cakacaka levu era cakava o ira kece era veivuke ena vakadewataki ni ivola vakaMongolia. Au vakavinavinakataki ira tale ga era dau veisoliyaka na ivola mera vukei kina na lewenivanua, se mani katakata se batabata sara na draki.”

O Brett e dua na tacida tagane e painia tiko e Hong Kong. A solia vua e dua na cauravou yabaki 20 vakacaca na tikidua Ena Marau Vakacava na Vuvale? E tagi sara ga o cauravou qai kaya ni a susu ena dina, ia a dro mai vale ena gauna e yabaki 16 kina. E nona vale tu ga na gaunisala me lima na yabaki, qai bobula ina wainimate gaga me yacova ni ratou vukei koya e dua na isoqosoqo ni veivuke.

Ni bera ni sotavi Brett ena mataka ni siga ya, a masu o cauravou qai kaya, “Ke dina na lotu au susugi kina niu se  gone, yalovinaka vakaraitaka vei au nikua e dua na ivakatakilakila.” E kaya o cauravou ni sa saumi nona masu. Rau gole kei Brett ina dua na vanua ni gunu kofi rau qai veivosakitaka na brochure Mo Lesu Vei Jiova. A solia vei Brett o cauravou na nona naba ni talevoni ni bera ni lesu i Varanise ena yakavi ya, a solia tale ga o Brett nona naba. Dua na gauna e muri, sa qai vola na cauravou qo vei Brett: “Taciqu, e sauma dina o Jiova noqu masu. Au sa na gole ina soqoni ena Sigatabu qo.” A veitaratara sara o cauravou kei ira na iVakadinadina e Varanise, tekivu vulica na iVolatabu qai tiko ena soqoni.