Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iVola Mai na iLawalawa Dauvakatulewa

iVola Mai na iLawalawa Dauvakatulewa

Raveitacini:

Dua na ka vakatubuqoroqoro a raivotutaka na parofita o Isikeli ena ikavitu ni senitiuri B.G.V. A raica e dua na qiqi vakalomalagi, qai lewa tu na Turaga Cecere Duadua na vanua e gole kina. E veivakurabuitaki na toso ni qiqi qori. E vaka na tibi ni liva na kena totolo, e rawa tale ga ni veisau kosi vakasauri!Isik. 1:4, 9, 12, 14, 16-27.

Na raivotu qori e vakadeitaka ni toso tiko ga na isoqosoqo vakalomalagi i Jiova. Vakacava na nona isoqosoqo e vuravura? E laurai ena yabaki ni cakacaka ni isoqosoqo sa oti, ni toso totolo tale tiko ga na isoqosoqo i Jiova e vuravura!

E toso tiko ga na isoqosoqo vakalomalagi i Jiova

Kena ivakaraitaki, era maqusa sara toka na lewe i Peceli e Merika na tokitoki. Eso era toki ina itikotiko liu e Warwick, Niu Yoka, se so tale na vanua ni veiqaravi e vakarurugi e Peceli, se ra lesi ina yalava. Era ogaoga tale tiko ga na valenivolavola ni tabana e veiyasa i vuravura. Eso e caka tiko kina na tarataravaki se vakavinakataki tiko eso na ka. Eso na valenivolavola era sa cokoti vata ra qai vakarurugi ina dua ga na valenivolavola ni tabana, eso era toki ina dua tale na vanua. De dua o sega ni vakaitavi ena so na taba ni veiqaravi qori, ia eso tale na sala o na rairai ogaoga toka kina ena gauna qo.

 Keitou marau vakalevu na iLawalawa Dauvakatulewa, qai vakayaloqaqataki keitou na nomuni ogaoga voli na tamata ni Kalou e veiyasa i vuravura kei na nomuni toso vata kei na isoqosoqo i Jiova. Levu era toki ina veivanua e vinakati kina vakalevu na veivuke. Eso era tovolea na taba ni veiqaravi vou me vaka na vunau ena yalava e duatani na kena vosa. E levu era saga mera vakamatauni ira ina iwalewale vou ni vunau se ra vakarabailevutaka nodra cakacaka vakaitalatala ena so tale na sala. O kemuni kece, wili kina o ira na itabaqase kei ira na tauvimate, oni yalodina tiko ena veitaucici ni bula. Oni vakalasui Setani ena nomuni ogaoga tiko ga ena nomuni qaravi Jiova!1 Kor. 9:24.

E sega ni guilecava o Jiova na nomuni cakacaka. (Iper.  6:10) Oni vakatotomuria sara tiko ga nodrau yalorawarawa o Eparama kei Sera. Sa yabaki 70 toka vakacaca o Eparama ena gauna e biubiu kina mai Uri ratou qai gole vakavuvale i Kenani. A lai bula voli ena valelaca ena vanua qori ena vo ni nona bula. Erau ivakaraitaki vinaka dina vakaveiwatini ena nodrau dau yalorawarawa!Vkte. 11:31; Caka. 7:2, 3.

Vakacava o dau yalorawarawa tale ga? E laurai ena nomuni vosota kei na nomuni yalodina ena gauna dredre qo ni oni cakava tiko na ka e tukuna vei keda o Jisu. A kaya: “O koya gona, ni lako moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu.”Maciu 28:19.

Nona cavuta o Jisu na vosa “lako” e vakaraitaka ni dodonu meda toso, meda kua ni tu vakadua. E marautaki dina na veika era rawata na imuri gugumatua i Karisito ena yabaki ni cakacaka ni isoqosoqo sa oti! Qori e vakadinadinataka ni vakalougatataka tiko o Jiova na vunautaki ni itukutuku vinaka ni Matanitu ni Kalou e veivanua.Mari. 13:10.

Levu era sa ciqoma tiko na itukutuku vinaka. E 8,340,847 na iwiliwili ni dautukutuku ena yabaki ni cakacaka ni isoqosoqo sa oti, na vuli iVolatabu e veivula e 10,115,264. Kena ibalebale oni toso vata tiko kei na qiqi vakalomalagi! Ni gugumatua tiko mada ga ena gauna lekaleka sa vo qo, me yacova ni kaya o Jiova me sa rauta na cakacaka ni veivakabulai.

E veiganiti me noda tikinivolatabu ni yabaki 2017: “Nuitaki Jiova qai cakava na ka vinaka”! (Same 37:3)  Ni oni cakava na ka vinaka ena nomuni veiqaravi tabu vei Jiova, oni sa vakaraitaka tiko ni oni nuitaki koya. Oni sega ni cakacaka duadua ni se dina tiko ga o Jisu ena nona kaya: “Raica, au tiko vata kei kemuni ena veisiga kece me yacova na ivakataotioti ni veika vakavuravura.”Maciu 28:20.

TIKINIVOLATABU NI YABAKI 2017:

“Nuitaki Jiova qai cakava na ka vinaka”

Moni nuidei ni na vakalougatataka tiko ga o Jiova na nomuni veiqaravi ena yalodina. Se mani lailai se levu na ka oni cakava, e vinakata ga o Jiova moni solia nomuni vinaka taucoko, me donu tale ga na inaki ni nomuni veiqaravi. E taleitaka qai vakadonuya o Jiova na yalo ni soli ka va qori. (2 Kor. 9:6, 7) Saga moni toro voleka tiko ga vua na Tamamuni vakalomalagi ni oni masu wasoma, vulica na Vosa ni Kalou, tiko ena soqoni, qai gugumatua ena cakacaka vakaitalatala.

Ni sa “lekaleka nona gauna,” sa na qai soli isele ga na Tevoro ena nona sasaga meda tawayalodina vei Jiova. (Vkta. 12:12) Ke oni kabiti Jiova tiko ga, ena guce na sasaga ni Tevoro. (Same 16:8) Keitou vinakata moni kila ni keitou lomani kemuni vakalevu. Keitou vakavinavinakataka tale ga na nomuni veivuke ena cakacaka ni Matanitu ni Kalou ena iotioti ni veisiga qo.

Tacimuni,

iLawalawa Dauvakatulewa ni iVakadinadina i Jiova