DUA veimama na yabaki nodra ogaoga voli na mataveitacini e Kyrgyzstan, kei ira mai vanuatani ena kena vakavinakataki kei na kena vakalevutaki na valenivolavola ni tabana e Bishkek, na koroturaga kei Kyrgyzstan. Oti e dua na vula na kena vakacavari na cakacaka, a vakatabui sara na valenivolavola ena ika24 ni Okotova, 2015. E 18 na Vale ni Soqoni kei na 5 tale na vanua era sema ina vanua e vakayacori tiko kina na soqo ra qai marautaka na porokaramu e sivia na le 3,000. A vunau ena vakatabui ni valenivolavola o Stephen Lett e lewe ni iLawalawa Dauvakatulewa, qai vosa ena ulutaga veiuqeti “Qaravi Jiova ena Lomamu Taucoko.” Dua tale na porokaramu totoka a vakarautaki ena siga tarava me baleti ira na mataveitacini e Kyrgyzstan.

 Dua na gauna marautaki vei ira na mataveitacini e Armenia na Vakarauwai na ika14 ni Me, 2016. A vakatabui kina na valenivolavola ni tabana e tawana toka e 6 na tabavale ena dua na vale totoka e taba 18. A vakatabui tale ga e dua na Vale ni Soqoni Lelevu, kei na vanua me dau vakayacori kina na Koronivuli ni iTalatala ni Matanitu. Era tiko ena soqo qori e le 6,435. A vakamacalataki ena ivunau na veika a rawati ni se qai tauyavu na cakacaka e Armenia. Era tauyavutaka na cakacaka ena itekitekivu ni ika20 ni senitiuri eso na lewenivanua mai Armenia era vakaitikotiko e Merika. A qai tekivu na cakacaka e Armenia ena veiyabaki ni 1970 ni se qali tu ena veiliutaki ni matanitu makawa na Soviet. Dua na gauna lekaleka ga sa oti, a soli na veivakadonui me vakalawataki na cakacaka e Armenia. Na veivakadonui qori sa rawa ni dua kina na valenivolavola ni tabana e Armenia. Era sega ni bau tadra e levu era tiko ena soqo na veika totoka sa rawati ena nodra vanua. O ira kece na tiko ena soqo era duavata kei David Splane e lewe ni iLawalawa Dauvakatulewa, me vakatabui me nei Jiova na valenivolavola ni tabana, Vale ni Soqoni Lelevu, kei na vanua ni vuli.