Raica sara na lewena

Raica na lewenivola

 ITUKUTUKU NI VUNAU ENA YABAKI SA OTI

“O Kemuni ga na iTokani Vinaka Duadua”

“O Kemuni ga na iTokani Vinaka Duadua”

DUA na ka nodra nanamaki e dua na ilala ena valenivolavola liu e 25 Columbia Heights, Brooklyn, Niu Yoka, ena ika7 kei na ika8 ni Me, 2016. E sega ni dau caka ena muanimacawa e Peceli na sarasara. Ia ena rua na siga qori era sureti na tiko voleka mera lai sarasara i Peceli, mera raica tale ga na vanua e maroroi tu kina na iVolatabu makawa.

Era qoroya na tiko voleka na ka era raica, e veiuqeti tale ga vei ira na veisureti se o ira na veivuke ena muanimacawa qori. E veivakayaloqaqataki nida rogoca na ka era tukuna o ira na sa dede nodra tiko ena yasayasa qori e Brooklyn.

 E kaya e dua na turaga: “Au a veitokiyaki voli ena vica na vale ena yasayasa qo [volekati Peceli] me tekivu mai na veiyabaki ni 1960. O kemuni ga na itokani vinaka duadua. Nomuni toki qo ena vakatagatagasa sara ga, au kerea moni kua ni toki.”

E kaya e dua na marama: “Keimami sa kalougata dina. Ke sega o kemuni na iVakadinadina i Jiova, ke sega ni vakatorocaketaki na yasayasa qo.”

Era marautaka na painia na cakacaka ena yasayasa ya nira dauveikauaitaki qai yalorawarawa na tiko kina. E kaya e dua na turaga e tiko ena yasayasa ya e dau taleitaka na noda isoqosoqo, ni veivutunitaka nona sega ni tiko ena gauna ni sarasara e Peceli.

Sa bau dua dina na muanimacawa totoka. Era mai sarasara e Peceli ena loma ni rua na siga e le 48 era sega ni iVakadinadina, era raica tale ga na iVolatabu makawa era maroroi tu. Ni vakacagau tiko na sarasara, era veikidavaki eso na lewenivuvale e Peceli ra qai veitalanoa kei ira na vulagi.

Dua vei ira na sarasara o Sally e yabaki 20 vakacaca, e veimama na aua nona sarasara toka ena vanua e tu kina na iVolatabu. Ni sarasara oti, a sotavi rau ena vanua ni wawa na tacida yalewa painia rau a sureti koya. E sega vakadua ni vakabauta o Sally ni maroroi tu na iVolatabu. Erau kaya vua na painia ni rau marautaka dina ni vakamareqeta na iVolatabu e dua e cakacaka vinaka me vakataki koya. E kaya o Sally: “E dodonu ga me vakamareqeti baleta na iVolatabu ga ena vakatakila vei keda na itukutuku ni Kalou. E bula na ka e volai tu ena ivola qo, qai yaga ena noda bula.”

 Nona taleitaka o Sally na iVolatabu e uqeti koya me vulica na vosa vakaLatina kei na vosa vaKirisi, e taleitaka tale ga na cakacaka ni vakadewa. E nanuma ni bibi me donu na vakadewa, me kua ni vola ga e dua nona nanuma se rai. E kidroa qai marau o Sally ni rau tukuna na painia ni tu tale ga na ivola vakaivolatabu ena noda website na jw.org qai vakadewataki ena sivia e 800 na vosa. Ni rau vakamacalataka vei Sally na tacida yalewa na ka era cakava na daunivakadewa me baleta na yaca i Jiova, e kidacala qai kaya: “Na cava e kau laivi kina na yaca i Jiova mai na iVolatabu?” Ni vakarau biubiu o Sally, e kaya: “Au vakaitikotiko ena yasayasa qo ena noqu bula taucoko, o kemuni ga na itokani vinaka duadua.”

Ni oti na veivakasarasarataki ena Moniti, a vakaitavi o John e lewenivuvale e Peceli ena vunau e matanalevu voleka toka ga ena valenivolavola. A gole sara yani e dua na italatala qai vakamacalataka vei John ni dua na ka nona taleitaka na sarasara ena muanimacawa, e taleitaka tale ga na noda dau muria vinaka na iVolatabu. Ni rau veitalanoa tiko, e kidacala o John ni sa cudru na italatala qai kaya: “Au cati kemuni sara ga na iVakadinadina!” E lomaleqa o John qai taroga se cava e cudruvaka. E kaya tale na italatala: “Ni oni sa toki! NI TIKO GA EKE! Volia eso tale na vale lelevu se tara ga na vale oni vinakata, ia moni tiko ga eke. O kemuni ga oni vakavuna na rogo vinaka ni yasayasa qo. Au sega ni taleitaka nomuni toki!”

Era qoroya vakalevu na lewenivanua era toka voleka na nodra sureti mera sarasara e Peceli. Era sarava kina na iVolatabu e maroroi tu, kei na kena vakabibitaki na yaca ni Kalou. E se bera vakadua ni caka e dua na ka va qori e Brooklyn ena veiyabaki sa sivi.