Raica sara na lewena

Raica na lewenivola

Jamani: Vunau e matanalevu ena dua na keba ni isenivalu

 ITUKUTUKU NI VUNAU ENA YABAKI SA OTI

iRogo—iTukutuku Mai na Veiyasa i Vuravura

iRogo—iTukutuku Mai na Veiyasa i Vuravura

Vunau Vei Ira na iSenivalu kei Ira na Curuvanua

E vuavuaivinaka tiko na vunau ena yalava e duidui na kena vosa e Jamani, vakabibi vei ira na iwiliwili levu ni isenivalu kei ira na curuvanua. Ena loma ga ni ciwa na vula, a tauyavu rawa kina e 229 na iwasewase lalai. E vakayacori tiko ena gauna qo e 30 na kalasi, era vuli tiko kina e rauta na 800 na dautukutuku ena 13 na vosa.

Era dau vunau na mataveitacini vei ira na isenivalu ena so na vanua ni wawa. Era solia tale ga e rauta ni 640,000 na ivola ena 200 vakacaca na vanua e dau biu kina na qiqi ni vunau.

 A tuvanaka na iLawalawa Dauvakatulewa me vakayacori e dua na cakacaka vakavunau lavotaki ena Me ina Julai 2016. E 700 vakacaca na dautukutuku mai na vitu na vanua era kila na vosa vakaArapea, era gole ina tini na vanua e Austria kei Jamani mera lai vunau vei ira e dua na ilala levu ni kai Arapea.

Tomi Sede e Gaunisala

Era dau taubale na le 50 na dautukutuku ena ivavakoso o Kriol e Belize nira lai vunau. Era sega ni rawaka vinaka sara e levu na mataveitacini, ia dua na ka nodra lomasavu. Sa vica qo na yabaki nodra tomi sede tiko ena gaunisala kuvu era taubaletaka ena cakacaka vakavunau. Ni cava e dua na yabaki, era dau savata na sede, raica na kena e rawa ni vakayagataki, ra wilika tale ga na levu ni sede era sa kumuna rawa.

E levu na sede era tomika e sega mada ga ni yacova na dua na sede ni Merika, ia era dau kumuna rawa e veiyabaki na ilavo e tautauvata kei na $225 na ilavo ni Merika. E veimama ni ilavo qori era vakayagataka na mataveitacini ena veika e gadrevi ena Vale ni Soqoni, na kena vo era cautaka ina cakacaka e vuravura raraba.

Va na Milioni Era Vakarorogo!

Dua na soqo guiguilecavi dredre a vakayacori e Burundi ena ika5 ni Maji, 2016. A sikova yani na valenivolavola ni tabana e kea o Anthony Griffin, e dua na mata mai na itikotiko liu. Era sega ni rogoca ga na porokaramu ni soqo na mataveitacini, e rauta ni va na milioni na lewenivanua era rogoca ni a kaburaki ena retio!

Dua na ka nodra qoroqoro e levu ena ka era rogoca, e levu tale ga na ka totoka e tukuni me baleta na porokaramu. E kaya e dua a veivuke ena kakaburaki: “Ni cakava  e levu tale na porokaramu va qo!” Dua tale na vakailesilesi e kaya: “Au kerea moni cakava tiko ga [na porokaramu va qo], nira na vakabulai kina e levu.” A rogoci tale ga na porokaramu ena levu na basi kei na motoka.

Mudu Vakasauri na Soqo ni iVakatagi

Dua na ka nodra rarawa na lewe ni dua na iwasewase tu yawa e Nepal. Na vuna? Ni vo e dua na siga me vakayacori na iVakananumi ena 2016, era rogoca ni na vakayacori tiko e dua na soqo ni rogo ivakatagi ena koronivuli e toka tikiva na vanua me caka kina na iVakananumi.

Na soqo ni rogo ivakatagi va qori e macala ga ni dau kosakosa. Nira sasamaki tiko na mataveitacini ena vanua ni iVakananumi, e kaya sara vei ira e dua a veivuke ena tuvanaki ni soqo ni rogo ivakatagi: “Ena rogo levu duadua na neitou ivakatagi.”

A tekivu na soqo ena sigalevu, qai kosakosa me vaka ga e namaki. Era sauma na mataveitacini e dua na sipika e ka levu sara mai na kena era nanuma taumada mera vakayagataka. Ni lai caka na vakatovotovo ni gusunivosa, e sega mada ga ni rogo e dua na ka. Dua na ka nodra rarawa na mataveitacini, ia e sega ni cegu nodra masu. Nira se yaco tiko yani e levu na mataveitacini ni vo e veimama ni aua me tekivu na iVakananumi, a mudu vakasauri na soqo ni ivakatagi. Era veibuturaki e dua na ilala mateni ra qai kaya na ovisa ni sa na cegu tale ga e kea na soqo ni rogo ivakatagi. E mani vakayacori vinaka na iVakananumi, e vakanomodi ni sega ni dua na ka e veivakasosani ra qai marautaka na mataveitacini na nodra soqo bibi.

Vakacaucautaki na jw.org

E painia tudei o Giuseppe, dua na tacida tagane mai Itali. E cakacaka ena dua na kabani ni Internet, ia e cakacaka  tiko ga mai vale. A vakayacori ena vula o Me ena yabaki sa oti e dua na bose ni kabani me veivosakitaki kina eso na ka vovou e rawa ni vakayacori ena kabani. A tiko ena bose qori o Giuseppe, kei na 70 vakacaca nona itokani vakacakacaka. Ni vosa e dua na vakailesilesi liu ni kabani, a kaya ni rawa ni vulica e levu na ka nodratou kabani ena veika era cakava eso na website. A vakaraitaka sara e dua na kena sabolo. Dua na ka nona kurabui o Giuseppe ni raica ni sa vakaraitaki tu na jw.org. A kaya na vakailesilesi liu: “Qo na website totoka duadua e vuravura!” Oti a vakamacalataka sara eso na ka me baleta na jw.org, vakabibi na idusidusi e raici totolo kina na ka e vaqarai kei na totoka ni droini.

E kaya o Giuseppe: “Era kurabuitaka na noqu itokani vakacakacaka na levu ni vosa e vakarautaki kina na website. E tukuna sara noqu boso vei ira na vakarorogo kei na vakailesilesi  liu ni kabani: ‘O Giuseppe e dua na iVakadinadina i Jiova.’ E raici au na vakailesilesi liu qai kaya: ‘E dodonu me vakacaucautaki na nomudou isoqosoqo. Era na vinakata dina na kabani se isoqosoqo kece e vuravura mera vakarautaka e dua na website me vaka na nomudou. Sa wacava na cakacaka e vakayacori me biu tiko ga kina na ka vovou, me rawarawa na kena vakayagataki, qai qarauni me donu na itukutuku e biu kina.’ Au madua niu vakacaucautaki ena dua na ka au sega ni cakava. Ia au marau nira sa qai kilai keda na iVakadinadina i Jiova e levu era sega tu ni kilai keda e liu. Keimami sa dau veitalanoa vakalevu ena gauna qo kei na so na noqu itokani vakacakacaka, e le tolu keitou sa vuli iVolatabu tiko.” E se saga tiko ga na kabani e cakacaka kina o Giuseppe me “vulica” e levu na ka ena website na jw.org, ia o Giuseppe e se vuli iVolatabu tiko ga kei na tolu nona itokani vakacakacaka.

Vakuai Koya Mai na Soka

Argentina: Qito soka tiko o Jorge kei ira na mataveitacini

O Jorge e dua na cauravou mai Argentina. A vunau vua e dua na nona icaba ena 2010, ni toso na gauna a tekivu sara na vuli iVolatabu ena ivola Na Cava Mada e Kaya na iVolatabu? Ia a qito soka tiko ena gauna qori o Jorge, qai digitaki me lewe ni dua na kalavo ni soka sa bau kilai toka ena gauna ya ena nona vanua ni sa rui totoka nona qito. Ena Epereli 2014, a vinakata e dua na timi mai Jamani me lai qito yani e kea. A vakaio o Jorge ni nanuma ena dua kina na dauqito rogo. Ni vo e vica na siga me biubiu me gole i Urope, a kaya vua nona dauveivakavulici: “Au kila ni o dua na iVakadinadina i Jiova. O na sotava ga na leqa ke o gole i vanuatani. Au a dua tale ga na iVakadinadina niu se gone. A vinakata e dua na timi ena vanua vakaEsia meu lai qito e kea. E vesumonataki au sara ga na levu ni ka e tukuni ni na soli vei au. Keitou mani gole vakavuvale, ia keitou vakila ga  kina na rarawa.” E kaya o Jorge: “E tarai au sara ga na ka e kaya noqu dauveivakavulici, au mani vakatulewataka meu kua ni lako i Urope. Au dautukutuku bera ni papitaiso ena 2015, au sa papitaiso tale ga.”

Au Kalougata Dina

A vakayacori e Kampala, Uganda, ena Seviteba, 2015, na Soqo ni Veiwasewase e kena usutu “Vakatotomuri Jisu!” Dua na ka nodra marau na tiko ena soqo ni sevutaka o Mark Sanderson e lewe ni iLawalawa Dauvakatulewa, na iVolatabu Vakadewa ni Vuravura Vou ena vosa vakaLuganda.

E kaya e dua na yalewa e vuli iVolatabu tiko: “Au sa marautaka dina na iVolatabu totoka qo! Era vakavakarau tu na lewenivanua ena gauna ya ina nona veisiko na tui tabu. E mani caka na rosario e tukuni ni ‘vakalougatataki,’ qai volitaki ena $30 na ilavo ni Merika me rawa kina eso na ilavo me baleta na veisiko ni tui tabu. Era vinakata tu na lewenivanua na veivakalougatataki, e sega ga na nodra ilavo. Ia e soli wale na ka au vakalougatataki kina o yau. Era vakila na veivakalougatataki qori i Jiova o ira kece na tiko ena soqo, qai vakatau ga vei ira na cau era solia mai vu ni lomadra. Au kila niu kalougata dina niu mai kilai Jiova vinaka ena noqu wilika e veisiga na nona Vosa ena noqu vosanisucu. Au vakavinavinaka vei Jiova ni solia vei au na noqu iVolatabu.”

Veibeitaki Vakailasu

Era via vakarogorogocataka na website na www.jw.org eso na italatala ena dua na yasayasa e Congo (Kinshasa). Era tukuna vei ira na nodra lewenilotu ni tabaki ena vuravura ni yalo na noda ivola na iVakadinadina i Jiova. Me tokona na nodra veibeitaki, era dusia na matanivola  na “www” ra qai kaya ni tautauvata kei na naba 666 e cavuti ena Vakatakila. (Vkta. 13:18) Na itukutuku qori e vakavuna mera muduka eso na nodra vuli iVolatabu.

Erau masulaka na ituvaki qori e dua na veiwatini painia rau qai sureti ira vakaveiwatini na nodrau vuli iVolatabu ina nodrau vale. Eratou ciqoma na veisureti e tolu na veiwatini. Oti na kana, rau vakaraitaka sara na painia na vidio Jehovah’s Witnesses—Organized to Share the Good News. Eratou vakadeitaka na vulagi ena ka ratou sarava ena vidio ni lasu na itukutuku me baleta na vanua e tabaki kina na noda ivola. Dua na yalewa e vuli iVolatabu tiko kei rau na painia, e sega ni se vuli iVolatabu o watina. Ni rau lai caka vuli na painia ena macawa tarava ena nodrau vale na veiwatini qori, e vakamamasu sara ga o tagane me rau taura na painia e $100 na ilavo ni Merika me nona cau ina cakacaka e vuravura raraba.

Vulici ni Sere Vou

E sega na internet ena so na vanua tu yawa e Papua Niu Kini, ia dua na ka nodra sasaga na mataveitacini mera vulica na noda sere vovou. Ena ivavakoso o Mundip, e dau taubale e dua na tacida me rua na aua qai vodo basi tale me rua na aua ina tauni voleka duadua. Ni yaco i tauni, e dau kopitaka mai na Internet na qaqa ni sere vou ena nona vola sara ga ena dua na ivola. Ni lesu i vale, e dau lai vola tale na qaqa ni sere ena papaloaloa ena Vale ni Soqoni mera raica kece na mataveitacini. O ira na lewe ni ivavakoso era dau qai kopitaka mai na papaloaloa na qaqa ni sere vou me lagati ena soqoni. Era raica vakabibi na nodra duavata ena lagasere kei ira na mataveitacini e veiyasa i vuravura nira kila e tiki ni nodra sokalou vei Jiova.