Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 GEORGIA | 1924-1990

Yaga ni Soqoni

Yaga ni Soqoni

E vukei ira e levu na ka vovou na soqoni vaKarisito me dei nodra vakabauta. Era dau lomasoli na sa dede ena dina kei ira na se qai papitaiso me caka na soqoni ena nodra vale. Era dau kauaitaki kece o ira na gole yani ena soqoni, qori e vaqaqacotaka na veilomani ena ivavakoso.

E dau tuvanaki eso na soqo lavotaki ke ra sa rawata eso na gonevuli na ivakatagedegede mera papitaiso. Dua na soqo va qori a vakayacori ena Okosita 1973, ena saula kei Sokhumi volekata na Wasawasa Loaloa. Ia ka ni rarawa nira sega ni papitaiso na le 35 era sa  vakarau tu! Era yaco yani na ovisa ni se caka tiko na soqo, ra mani vesu eso na mataveitacini, wili kina o Vladimir Gladyuk.

Gauna ga e sere mai kina o Vladimir kei na so tale na mataveitacini, era kacivi tale o ira na dodonu mera papitaiso. Oti e rua na siga, sa ra qai papitaiso rawa. E kaya o Vladimir: “Keimami vakila na veitokoni i Jiova. Oti na papitaiso, keimami masu me keimami vakavinavinaka vei Jiova.”

Guce na Veitusaqati

Oti e rua na siga nodra papitaiso na ka vou, a vesu tale o Vladimir Gladyuk. Dua na gauna e muri ratou qai bala e valeniveivesu me vica vata na yabaki o Vladimir Gladyuk, Itta Sudarenko, kei Natela Chargeishvili. Era rarawataka na ka e yaco qori na vo ni dautukutuku. Ia era vakadeitaka mera vunau tiko ga ra qai qaseqasetaka na iwalewale era cakava kina qori.

Nira tusaqati na dautukutuku e Sokhumi, era mani lai vunau ena so tale na tauni se koro. Na veitusaqati era sotava ena nodra vanua a veivuke ena kena vakatetei na itukutuku vinaka ena so tale na vanua.

Ena gauna ni veiliutaki vakominisi, era dau vunau na dautukutuku ena vanua e sega ni lakovi vakalevu kei na rara ni gade. Era sotavi ira e keri na gole mai na so tale na tauni se koro, era gade yani vei ira na wekadra se lai volivoli. Ke ra sotava e dua e tataleitaki, era dau taroga na dautukutuku na nona itikotiko ra qai veivosakitaka e dua na gauna mera sota tale kina.

Dua e bau sikova vinaka na veiyasana ena ra kei Georgia o Babutsa Jejelava. E kaya: “Nira veituyaki na  wekaqu, sega ni dua e bau kilakasamitaka na inaki ni noqu dau gadivi ira. Oti e rua vakacaca na yabaki, sa sivia toka na 20 na noqu vuli iVolatabu e Zugdidi, 5 eratou tiko ena tauni o Chkhorotsku. Era papitaiso kece.”

Vinakati Vakalevu na iVola vakaGeorgia

E laurai ni toso na gauna ni vinakati vakalevu na ivola vakaGeorgia. Nira caka veisikovi lesu se vuli iVolatabu na dautukutuku, era raica ni na yaga vakalevu vei ira na gonevuli na iVolatabu kei na ivola vakaivolatabu e tabaki ena vosa era kila vinaka. *

E vakadinata o Babutsa ni dredre na caka vuli iVolatabu ni sega na ivola vakaGeorgia. E kaya: “Au dau vakadewataka vei ira noqu gonevuli na ka me vulici, ni tu ga vei au na iVolatabu kei na ivola vakaRusia.” A vakadewataka eso na ulutaga mai na noda mekesini, na ka ga e bau vukei koya ena nona vakadewa na ivolavosa. A vakadewataka tale ga na Kosipeli i Maciu!

Misini ni tabaivola era vakayagataka ena nodra vale na iVakadinadina

Na levu ni nodra marautaka na tataleitaki na ulutaga sa vakadewataki tu ena nodra vosanisucu, era bolea mera vola ga na nodra ilavelave mera vakayagataka e veisiga. Ni dredre me kunei na iVolatabu vakaGeorgia, era lavetaka kina na Vosa ni Kalou eso na Gonevuli ni iVolatabu.

‘Au Lavetaka na iVolatabu ena Siga Taucoko’

A dau veisoliyaki na ivola sa vakadewataki rawa ena vosa vakaGeorgia me rawa nira wilika kece na  mataveitacini kei na tataleitaki. E soli ga vei ira e vica na siga se macawa mera wilika kina e dua na ivola. Gauna era taura rawa kina na mataveitacini e dua na iVolatabu vaKirisi ena vosa vakaGeorgia, eratou bole sara e dua na vuvale me ratou lavetaka.

A se qai yabaki 13 voli ga o Raul Karchava ena gauna e kerei koya kina o tamana me lavetaka na iVolatabu vaKirisi. E kaya: “A volia o tamaqu e dua na kateni ivola, na veimataqali peni kei na penikau, ni nanuma au na makutu kina na volavola. Au a lomalomarua mada e liu, ia e muri au bole meu cakava. Au lavetaka toka na iVolatabu ena siga taucoko, au dau cegu ga meu vakadre vakalailai.”

iLavelave vakaGeorgia ni Vale ni Vakatawa kei na Dikeva na iVolatabu e Veisiga era vola na mataveitacini

Eratou marau na vuvale i Raul nira lomasoli na  mataveitacini me vica tale na macawa na kena biu toka vei ratou na iVolatabu vaKirisi vakaGeorgia, me rawa ni vakaotia o Raul na nona cakacaka. A lavetaka rawa ena loma ni rua ga na vula na 27 na ivola ena iVolatabu vaKirisi vaKarisito!

E marautaki na nodra sasaga vagumatua eso me lavetaki na iVolatabu, ia e tubu tiko ga na iwiliwili ni mataveitacini era vinakata mera vakani vakayalo. Era mani yalovata eso na dautukutuku mera vakarautaka mai na nodra vale na ivola vakaivolatabu me veisoliyaki vei ira na mataveitacini. Ia na ka era cakava qori e leqataki kina nodra bula.

Sa vuavuaivinaka sara na cakacaka vakavunau ena ra kei Georgia. Ia vakacava ena tokalau? E bau tiko e dua  e Tbilisi me vukei ira na via kila tu na ka dina me vakataki Vaso Kveniashvili sa cavuti oti mai?

Vunautaki na ka Dina ena Koroturaga

Ena veiyabaki ni 1970, a vakalolomataki ira na iVakadinadina na matanitu o Rusia ni cemuri ira mai na nodra itikotiko. Qori na ka rau sotava e dua na veiwatini mai Ukraine o Oleksii kei Lydia Kurdas ni rau toki i Tbilisi. Erau a vesu ena vuku ni ka rau vakabauta, qai vica vata na yabaki na nodrau tu ena nodra keba ni veivakararawataki na kai Rusia.

Larisa Kessaeva (Gudadze) ena veiyabaki ni 1970

Erau wasea na ka dina o Oleksii kei Lydia vei rau na veiwatini daulotu o Zaur kei Eteri Kessaev. E dua tiko na luvedrau yalewa o Zaur kei Eteri, na yacana o Larisa. E kaya o Larisa me baleta na imatai ni gauna ratou sota kina kei Oleksii kei Lydia: “Keitou saga me keitou vakadinadinataka vei rau ni lotu dina ga na Orthodox. Ni toso tiko na veivosaki, lakolako ga keitou sa galu. Ia rau se vakamacala toka ga mai na iVolatabu na veiwatini.”

E tomana o Larisa: “Au dau wilika ni keitou lai lotu na iVunau e Tini e volai tu ena lalaga ni valenilotu ena maliwa ni rua na ivakatakarakara. Ia au kurabui ni wilika vei keitou o Oleksii ena dua na yakavi na Lako Yani 20:4, 5. Au sega ni moce niu vakasamataka tu ga, ‘Eda beca dina na lawa ni Kalou nida qarava na ivakatakarakara?’”

Me saumi nona lomatarotaro, e lako i valenilotu o Larisa ena siga tarava me lai wilika tale na ivakaro qo: “Mo kua ni cakava e dua na nomu ivakatakarakara  ceuti . . . Mo kua ni cuva vei ira.” Sa qai kila e keri o koya na ibalebale dina ni ivakaro qori. A papitaiso o Larisa kei rau na nona itubutubu, ratou maliwai ira kina na imatai ni iVakadinadina i Jiova e Tbilisi.

Yaga ni Vosota

Ni oti e voleka ni 20 na yabaki nona wawa voli o Vaso Kveniashvili, a qai sotava e dua e dau tiko ena nodra soqoni na iVakadinadina i Jiova. Dua na ka nona marau ni sa dede qai sotavi ira tale na iVakadinadina.

A qai dua na iVakadinadina i Jiova o Vaso Kveniashvili ni oti e rauta ni 24 na yabaki

Era sega ni via okati Vaso na iVakadinadina ena so na ka era cakava ni dau kilai tu me daubasulawa. Era leqataka eso de vakayagataki koya tiko na matanitu o Rusia me vakaraica na ka era cakava na iVakadinadina. Qori na vuna e sega ni vakatarai kina me tiko ena soqoni me va na yabaki.

 Gauna e kilai kina ni na sega ni vakavuleqa o Vaso, sa qai vakadonui me lewe ni ivavakoso, me papitaiso tale ga. Sa rawa ni toro voleka vua na “Kalou lewadodonu” a vaqara voli mai na gauna se itabagone kina! (Aisea 30:18) A yalodina tu ga ni qaravi Jiova o Vaso me yacova na nona takali ena 2014.

Me yacova mai na 1990, sa toso vinaka sara na cakacaka vakavunau ena ra kei na tokalau kei Georgia. E rauta ni 900 na dautukutuku era vakavulici ira tiko e le 942 ena iVolatabu. Ia e levu tale na ka totoka a qai yaco ena veiyabaki e muri.

^ para. 12 E tu tu yadua me laurai na iVolatabu ena gauna ni veiliutaki vakominisi, dina ni se vakadewataki sara eso na iwase ni iVolatabu ena vosa vakaGeorgia ena ikalima ni senitiuri G.V.—Raica na kato “Na iVolatabu vakaGeorgia.”