Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 GEORGIA

Sa Wiliwili tu ga o Watiqu!

Marina Kopaliani

Sa Wiliwili tu ga o Watiqu!
  • SUCU 1957

  • PAPITAISO 1990

  • KENA ITUKUTUKU Erau dautukutuku gugumatua o Marina kei na watina o Badri, qai rua na luvedrau tagane. A lesi e muri o Badri me lewe ni Komiti ni Vanua, a yalodina tiko ga me yacova nona mate ena 2010.

ENA 1989, keirau sotavi ira na iVakadinadina ena nona vale e dua na turaga e tiko tikivi keitou. E dau vuli iVolatabu na turaga qori kei Brother Givi Barnadze. Ia e sega na nona iVolatabu o Brother Givi Barnadze ni kunekunei dredre e Georgia ena gauna ya na iVolatabu.

Keirau marautaka na veika keirau vulica, keirau vinakata sara ga me dua na neirau iVolatabu. Dua na gauna ni sotavi tacina o watiqu, e tukuna vua ni vaqara iVolatabu tiko. E kurabui ni tukuna o tacina ni se qai volia ga e dua na iVolatabu vakaGeorgia, ena solia vakailoloma vua.

Ni lesu mai vale o Badri, e wilika sara na iVolatabu me yacova na bogi. Ena siga tarava e tomana tale nona wiliwili. Niu suka mai na cakacaka, au raici koya ni se wiliwili ga. Sa wiliwili tu ga! Au mani vakatututaka me cegu mai  na cakacaka me vica na siga me vakaotia kina nona wiliwili. A qai wilika taucoko na iVolatabu.

Keirau marau ni sa dua ga na neirau iVolatabu ena gauna keirau vulica kina kei Brother Barnadze na ivola Na ka Dina Sa Basika ki na Bula Tawamudu. Keitou veilomanitaka na ivola kei na iVolatabu ni sega neirau ivola ni vuli qai sega nona iVolatabu neirau qasenivuli. Ni oti ga e dua na yabaki keirau papitaiso sara vakaveiwatini.