Raica sara na lewena

Raica na lewenivola

 GEORGIA | 1991-1997

Veivakavulici na iVakatawa

Veivakavulici na iVakatawa

Joni Shalamberidze kei Tamazi Biblaia ena veiyabaki ni 1990

Ena veiyabaki ni 1990, levu na ivavakoso e Georgia e dua ga na kena qase se dauveiqaravi. Era dau soqoni vakaiwasewase lalai na ivavakoso baleta era veituyaki na dautukutuku ena veitauni kei na veikorokoro.

Erau sa veiqaravi oti ena yalava tuyawa o Joni Shalamberidze kei Pavle Abdushelishvili. Erau mani lesi me rau lai veivuke i Telavi, dua na korolevu ena yasayasa o Kakheti. E 300 na dautukutuku ena ivavakoso o Telavi, ia e sega na qase ni  ivavakoso. E 13 na iwasewase lalai, qai duidui na vanua era soqoni kina.

Pavle Abdushelishvili

Ni rau yaco i Telavi o Joni kei Pavle, rau raica e dua na leqa e vakavuna tiko nodra sega ni toso vakayalo na mataveitacini tagane. E vakamacalataka o Joni: “Levu era vakaiteitei lelevu kei na loganivaini. Ni kena ivakarau ena veikorokoro mera veivuketaka na cakacaka ena nodra iteitei, era veimaliwai kina vakalevu na mataveitacini tagane kei ira era sega ni vakabauta.”—1 Kor. 15:33.

Erau mani vakatututaka o Joni kei Pavle mera veivukei ga vakamataveitacini ena nodra iteitei. Ena vinaka vei ira na nodra veimaliwai ga vakamataveitacini. (Dauv. 4:9, 10) E kaya o Joni: “Sa qai kaukaua ga na nodra veilomani vakamataveitacini ena ivavakoso.” Ni rau biubiu mai Kakheti o Joni kei Pavle ni oti e tolu na yabaki, sa 5 na qase ni ivavakoso qai 12 na dauveiqaravi.

Yaga ni Soqoni

A vakatabui tu na neimami cakacaka me yacova na veiyabaki ni 1990. Qori e vakavuna me keimami soqoni vakaiwasewase lalai, qai caka ga na Vulivola ni iVavakoso kei na vuli Vale ni Vakatawa. E veiuqeti na soqoni va qori, ia e sega ni vukei keimami ena cakacaka vakavunau.

E veisau na ituvaki ni cava na veiliutaki vaKominisi. Ena veidusimaki ni isoqosoqo i Jiova, sa caka tale ga e veimacawa na Koronivuli ni Vuli Vunau kei na Soqoni ni Cakacaka.

E levu na ka totoka rau se nanuma vinaka tu na veitacini o Naili Khutsishvili kei Lali Alekperova me baleta na soqoni ena gauna ya. E kaya o Lali: “E gauna marautaki dina. Dua na ka na neimami marau nira sa rawa tale ga ni vakaitavi na yalewa ena soqoni.”

 E kaya o Naili: “Ena dua na vakatasuasua a caka, a wili niusiveva toka na itaukeinivale ena buturara. Erau tukituki sara mai katuba e rua na tacida yalewa. Ni kacivi rau yani i loma o itaukeinivale, rau lai curu sara ga mai na katuba levu rau qai gole ena buturara!” E tomana o Lali: “Ena rairai lasa eso na ka e caka ena soqoni va ya, ia keimami vakavinakataka kina na neimami iwalewale ni vunau.”

Vinakati Vakalevu na Kakana Vakayalo

Dua na gauna balavu era tabaka tiko kina ena nodra vale na mataveitacini na ivola vakaivolatabu. Ni vinakati vakalevu na ivola, era vaqara kina na mataveitacini na kabani ni tabaivola isau rawarawa me tabaka na mekesini.

Ni vakarautaki na imatai ni itabataba ni mekesini vakaGeorgia, era kotiva na mataveitacini eso na matanivola rokataki mai na niusiveva me kabi ena waqa ni mekesini

Era vakarautaka vinaka na mataveitacini na imatai ni itabataba ni mekesini vakaGeorgia me tabaki. E taipataki vakamaqosa na ka e vakadewataki me lakovata kei na mekesini vakavalagi. Era kotiva mai na itaba ena mekesini vakavalagi qai vakabira ena ulutaga sa taipataki oti. Era kotiva tale ga eso na matanivola rokataki mai na niusiveva me kabi ena waqa ni mekesini. Oti e tabaki sara na mekesini!

Mekesini e tabaki e Georgia

Ena gauna e tekivu vakayagataki kina na kompiuta, rau lai vuli kompiuta sara e rua na tacida cauravou o Levani Kopaliani kei Leri Mirzashvili. E kaya o Leri: “E sega ni levu sara na ka keimami kila, e yaco tale ga na leqa ena so na gauna. Ia ena veivuke i Jiova, keimami vakarautaka rawa kina na mekesini.”

A sega ni rawarawa na neimami sasaga, ia se tabaki rawa ga e Georgia na mekesini e rokataki vinaka. E vinakati e levu tale na ivola ni toso na gauna, mani vukei ira vakayalololoma na mataveitacini e Georgia na isoqosoqo i Jiova.

 Yaco na Veisau

A vakayacori e St. Petersburg, Rusia, ena 1992 e dua na soqo ni veimatanitu. Era sota e keri na mataveitacini mai Georgia kei ratou na mata mai na valenivolavola ni tabana e Jamani. E kaya o Genadi Gudadze: “Eratou vakamacalataka na veika e dau caka ena vakadewa. Ratou tukuna tale ga ni na veisiko yani e dua me lai vukei keimami ena cakacaka ni vakadewa.”

E sega ni rawarawa na kena tabaki na ivola vakaivolatabu ena vosa vakaGeorgia. Ni duatani sara na vosa vakaGeorgia, e sega kina ni se vakacurumi na kena matanivola ena porokaramu ni kompiuta e bulia na isoqosoqo e vakatokai na MEPS (Multilanguage Electronic Publishing System). A mani buli na matanivola vou me veivuke ena kena vakarautaki na ivola me tabaki.

Ena veiyabaki ni 1970, ratou toki i Merika na vuvale na Datikashvili. E lai vulica e kea na ka dina e dua vei ratou na gone o Marina. A qai vukei ira na mataveitacini ena Peceli e Brooklyn o Marina, ena kena vakacurumi na matanivola vakaGeorgia ena porokaramu ni kompiuta e vakayagataka na isoqosoqo. Sega ni dede sa tabaki tale ga mai Jamani eso na tikidua kei na brochure “Raica! Au sa Vakavouya na ka Kece Ga.”

Tuvanaki na Cakacaka ni Vakadewa

E talai rau na veiwatini o Michael kei Silvia Fleckenstein na valenivolavola ni tabana e Jamani ena 1993, me rau lai vakarautaka e dua na valenivolavola ni vakadewa e Tbilisi. E kaya o Michael: “Au se nanuma vinaka tu na veitalanoa a caka mai St. Petersburg. Ni keirau yaco yani i Tbilisi oti e dua veimama  na yabaki, keirau kurabui ni sa toka rawa kina e dua na timi ni vakadewa gugumatua!”

Leri Mirzashvili, Paata Morbedadze, kei Levani Kopaliani ena valenivolavola ni vakadewa ena 1993

Ni oti ga e vica na vula, sa ra tekivu cakacaka sara e le 11 na daunivakadewa ena dua na ofisi. Dua na ka na neimami marau ena veivakavulici e vakarautaka na isoqosoqo i Jiova, keimami vakani vinaka kina vakayalo na ivavakoso kece e Georgia.

Vakarautaki ni Kakana Vakayalo

Ni oti na veiliutaki ni matanitu makawa na Soviet Union, a yaco na tiko yavavala kei na veileti vakamatatamata e Georgia kei na veivanua era dau qali tu ina matanitu makawa. E ririkotaki kina na veitosoyaki mai na dua na vanua ina dua tale.

Erau dau kau ivola o Brother Zaza Jikurashvili kei Aleko Gvritishvili (taba toka kei na dui watidrau) ena gauna ni tiko yavavala

Dua na siga ena Noveba 1994 era tarovi ratou o Aleko Gvritishvili kei na rua tale na tacida e dua na ilala era tauri dakai tu, qai tukuni me ratou sobu mai na motoka. E kaya o Aleko: “Dua na ka nodra cudru nira raica na ivola vakaivolatabu. Keitou nanuma ni keitou na vakamatei ni tukuni me keitou yatuni e matadra. Keitou mani masu vei Jiova. Oti e  rua na aua, e kaya e dua vei ira na ilala, ‘Taura nomudou ivola dou lako, ke dou lesu mai ke, ena vakamai na nomudou motoka dou na qai vakamatei.’”

Era sega ni kauaitaka na mataveitacini na veivakarerei ya, era kauta wavoki tiko ga na ivola vakaivolatabu. Dua e veivuke vakalevu ena kau ni ivola vakaivolatabu i Georgia o Brother Zaza Jikurashvili, e kaya: “Keimami kila nira vinakata na mataveitacini na kakana vakayalo. Era veitokoni vinaka tale ga na wati keimami.”

E kaya o Aleko: “Era vakavuvale e levu na mataveitacini tagane era veivuke ena kau ni ivola.” Na cava e uqeti ira mera cakava qori nira sotava kina na ituvaki leqataki? E tomana o Aleko: “Keimami via vakaraitaka vei Jiova na neimami vakavinavinaka kei na neimami lomani koya. Keimami via vakatotomuria tale ga nona dau karoni ira na mataveitacini o Jiova.”

Dua na ka neimami vakavinavinaka ena nodra vakuai ira na mataveitacini, e sega ni leqa kina na keimami kakana vakayalo ena gauna ni tiko yavavala. Era raica ena dua na gauna e muri na mataveitacini eso tale na sala me kau mai kina na ivola e Jamani i Georgia, qai sega ni sotavi kina e levu na ituvaki leqataki.

Veivakayaloqaqataki ena Kena Gauna Donu

Ni malumu na ituvaki vakapolitiki e Georgia ena 1995, era tuvanaka sara na iVakadinadina me caka na imatai ni soqo ni tikina. E mani vakayacori na soqo ni tikina qori ena 1996, era tiko kina e 6,000 vakacaca e Georgia taucoko. E vakayacori na soqo qori ena tolu na vanua, Gori, Marneuli, kei Tsnori.

O ira na tiko ena soqo ni tikina e Gori ena 1996

 E guiguilecavi dredre na soqo ni tikina a caka mai Gori. Ena vica na yabaki yani e liu, era nanuma na mataveitacini ni na sega ni redetaki rawa e dua na vale ni soqo ena iVakananumi nira le lailai ga. Ia qo era namaka mera na tiko ena soqo ni tikina e rua na udolu vakacaca. Era sega ni kunea rawa e dua na vanua ni soqo me rauta na iwiliwili qori. A mani caka na soqo ena dua na vanua ni keba e sega ni yawa mai na korolevu.

E kaya o Brother Kako Lomidze a lewena na Komiti ni Soqo: “Ni oti na porokaramu, era veitalanoa na mataveitacini, ra lagasere, era marautaka nodra veimaliwai. E laurai votu sara ga na nodra duavata kei na nodra veilomani na tamata ni Kalou.”Joni 13:35.

Tubu Vakasakiti

Me tekivu mai na 1996, e tuvanaki mera veisiko na ivakatawa dauveilakoyaki ena ivavakoso kece me dua na macawa. Era mani lesi eso tale mera tokoni ira na sa veiqaravi rawa toka vakaivakatawa dauveilakoyaki.

Dua na ka nodra yalodina na ivakatawa dauveilakoyaki qai ‘yavutaki ena loloma nodra sasaga kece.’ Qori e veivuke vakalevu ena tubu e rawati ena ivavakoso kei na kena muri vinaka na veidusimaki vakalou. (1 Ces. 1:3) E vakasakiti dina na tubu e rawati ena 1990 ina 1997. Mai na 904 na dautukutuku ena 1990, sa lai 11,082 sara ni oti ga e vitu na yabaki!

Na tubu a se tekivu sara ena vicasagavulu na yabaki yani e liu sa laurai vinaka sara qo e Georgia taucoko. Ia e levu tale na veivakalougatataki era na qai marautaka na tamata i Jiova e Georgia.