A QALI tu o Georgia ina matanitu makawa na Soviet Union me yacova na 1991. Ni cava na veiliutaki ni matanitu qori, na levu ni veiveisau vakapolitiki kei na tiko yavavala a vakavuna na torosobu ni ivakarau ni bula e Georgia. A veiqaravi tu vakaivakatawa dauveilakoyaki ena veiyabaki qori o Genadi Gudadze. E se nanuma vinaka tu na nodra dau laini na tamata me voleka ni dua na siga taucoko nira waraka voli na kakana.

Qori e gauna vinaka mera wasea kina na tacida na itukutuku vakaivolatabu. E kaya o Genadi: “E levu era  taleitaka na ka dina ena gauna dredre qori. E vica vata na drau era vakaraitaka vei keimami na vanua era vakaitikotiko kina nira via vulica na iVolatabu.”

Ni cava na soqoni, ena wilika e dua na tacida tagane na yacadra na tataleitaki kei na vanua era vakaitikotiko kina. Era qai dau sikovi ira na tataleitaki qori na dautukutuku.

E nanuma lesu e dua na qase ni ivavakoso e Tbilisi o Brother Levani Sabashvili na ka e yaco vei rau e dua na veiwatini. E kaya: “Era lomasoli na dautukutuku mera lai sikovi ira na vo ni tataleitaki. Ia e sega ni dua e bole me sikovi rau na veiwatini qo ni yawa na vanua rau tiko kina, levu tale ga vei keimami sa tu na neimami vuli iVolatabu.”

Oti e vica na vula rau kerea tale mai na veiwatini me rau sikovi. Ena ikatolu ni nodrau kerekere, rau sa biuta toka mai na itukutuku qo ke sega ni dua ena sikovi keirau mai, ena tarogi vei kemuni na neirau dra. (Cakacaka 20:26, 27) E kaya o Levani: “Ni donuya toka na vakatawase, keimami sega ni via veisiko kina. Ia keimami nanuma me rau sa sikovi mada ga na veiwatini.”

Erau kidacala na veiwatini o Roini kei Nana Grigalashvili ena dua na mataka ni rau sa yaco yani o Levani kei na dua tale na tacida. Sa tekivu sara ga ena siga ya na vuli iVolatabu ena levu ni nodrau karamaca vakayalo. Eratou sa veiqaravi voli vakapainia tudei nikua o Roini, Nana, kei na rua na luvedrau.

Na levu ni nodra marautaka na ka dina era sa mai kila, era solia kina e levu na nodra gauna, kaukaua, kei  na nodra iyau ena nodra vukei eso tale. Kena ivakaraitaki, erau vakavuvale o Badri kei Marina Kopaliani, ia erau yalorawarawa me rau lai vukei ira na tataleitaki ena veikoro tu yawa.

E rua na luvedrau tagane o Badri kei Marina, na yacadrau o Gocha kei Levani. Rau dau tomani rau na itubutubu na cauravou ena muanimacawa, mera lai sikovi na tataleitaki ena veiulunivanua o Dusheti ena vualiku kei Tbilisi. E rauta ni 150 na kilomita na yawa ni vanua ratou lakova ena so na gauna.

Dua na siga a sureti Badri kei watina ina nona valenicakacaka e dua na marama. E kaya o Badri: “Au kidacala nira waraki keirau tu e rauta ni le 50 ena dua na rumu levu. Au kerea na veivuke i Jiova ena masu, au vakamacalataka sara na Maciu 24 me baleta na iotioti ni veisiga. E taroga sara e dua ena levu ni nona kurabui, ‘Na  cava era sega ni tukuna kina vei keimami qo na neimami iliuliu ni lotu?’”

Na iVakananumi ni mate i Jisu e gauna vinaka mera rogoca kina na ka dina na lewenivanua e Georgia. Kena ivakaraitaki, na iVakananumi mai Tbilisi ena 1990 ena vale i Ia Badridze e vakavuna nodra tataleitaki e levu.

E vakarautaka o Badridze na nona vale me caka kina na iVakananumi ratou qai veivuke kina na luvena. Ia ena kauta mai vei na nodra idabedabe na vulagi? Me vaka ga e kena ivakarau e Georgia, e sauma eso na idabedabe me vakayagataki. Ia era dau tarogi koya na itaukei ni idabedabe: “O sega ni vinakata eso na teveli? Era na kana vakacava nomu vulagi?”

A vakayacori na ivakananumi ni mate i Jisu ena vale i Badridze ena ika13 ni dua na tabavale ra qai tiko kina e le 200. Oti na soqo qori, e levu sara nodra vakatataro na toka voleka me baleti ira na iVakadinadina i Jiova.

A redetaki ena 1992 na vanua ni soqo me vakayacori  kina na iVakananumi ena levu na vanua e Georgia. E nanuma lesu o Davit Samkharadze e tiko e Gori na nona vakatarogi ira e dua na ivakatawa dauveilakoyaki me baleta na nodra vakavakarau ina iVakananumi.

Ni rogoca nira na vakayagataka na dautukutuku e dua na vale ni mataveitacini, e taroga sara: “E sega na vanua ni soqo ena korolevu qori? Ke tiko, cava oni sega ni via vakayagataka kina?” E rawa nira dabe ena vanua ni soqo e 1,000 vakacaca, ia e sivia toka ga na 100 na dautukutuku ena vanua qo. Qori na vuna era sega ni via redetaka kina na vanua ni soqo.

E qai vakatututaka na ivakatawa dauveilakoyaki: “Ke dua na dautukutuku e sureta e tini na tamata, ena tawa kece na idabedabe.” E dredre toka me vakabauti na vakatutu qori, ia era muria na mataveitacini. Dua na ka nodra kurabui kei na nodra marau nira tiko ena iVakananumi e rauta ni 1,036! *

A se vo tu na yalava me vunautaki kina na itukutuku vakaivolatabu e Georgia ena 1992. Ena tarai vakacava na yalava qori ni sotava tu na matanitu na leqa vakailavo?

E nanuma lesu o Tamazi Biblaia, a vakaitikotiko ena gauna ya ena ra kei Georgia: “Keimami a bose kei na ivakatawa dauveilakoyaki ena ka me caka. E sega ni levu sara na ka keimami kila me baleta na ituvatuva ni painia lavotaki. Keimami kila ga ni bibi me vunautaki na itukutuku vinaka.” (2 Tim. 4:2) E mani digitaki e 16  na painia ra qai lesi ena yalava kece e vinakati kina na veivuke e Georgia.—Raica na mape.

E tolu na aua na bose e Tbilisi ena Me 1992, ra qai vakayaloqaqataki kina na painia era na lai veiqaravi me lima na vula ena yalava e vinakati kina na veivuke. Era veisiko e veivula na qase ni ivavakoso mera lai veivuke vakayalo, vakayago tale ga.

Erau a lesi ena tauni o Ozurgeti e rua na painia o Manea Aduashvili kei Nazy Zhvania. E kaya o Manea, a yabaki 60 voli ena gauna ya: “Keirau kila ni tiko e dua na na marama e tataleitaki ena dua na vanua volekati Ozurgeti, keirau nanuma sara me keirau lai raici koya. Ni keirau yaco yani ena nona vale, sa waraki keirau toka kei na le 30 tale e sureta. E tauyavutaki ena siga qori e vica na vuli iVolatabu.”

E toso vinaka sara na cakacaka ena vica na vula tarava. Oti ga e lima na vula, era sa rawata na ivakatagedegede ni papitaiso e le 12!

Erau a lesi i Tsageri e rua na painia o Pavle Abdushelishvili kei Paata Morbedadze. Era daulotu na lewenivanua e Tsageri, ia era wakia vata tu na ivakavuvuli vakatamata kei na ivakavuvuli ni lotu ni Veivanua Vakarisito.

Ni vakarau cava na lima na vula ni nodra veiqaravi na painia, a sureti o Paata me lai veivuke ena vakadewa ena dua tale na vanua. Ia vakacava o Pavle? E kaya: “Au kila ni na sega ni rawarawa na vulaililiwa e Tsageri. Au vakatulewataka ga meu tiko nira vinakata na vuli iVolatabu na veivuke.”

E nanuma lesu o Pavle: “Au tiko kei ratou e dua na vuvale, qai levu na gauna au lako tu ena cakacaka vakavunau. Niu suka yani ena yakavi, au dau dabe vata kei ratou na vuvale ena yasa ni sitovu buka. Ia niu lai moce, au dara e dua na ka me katakata kina na uluqu, dua tale ga noqu itutuvi vavaku.”

Nira sikovi Pavle na qase ni ivavakoso, era sa rawata tu na ivakatagedegede e le 11 mera dautukutuku bera ni papitaiso. Sega ni dede era sa papitaiso kece.