Igor: Keirau tiko ruarua ena tauni o Tkvarcheli, Abkhazia, era tiko tale ga kina eso tale na iVakadinadina. Na ivavakoso e qarava na iwasewase lailai keimami lewena e tiko sara mai na korolevu o Jvari, rauta ni 85 na kilomita na kena yawa. Au dau lako gona e veivula i Jvari meu lai kauta mai na neimami ivola vakaivolatabu. Ni cava ga na veiliutaki ni matanitu makawa na Soviet Union ena 1992, era sa vinakata na yasayasa o Abkhazia mera sa kua ni vakarurugi ena dua na lewa. Era mani veivala na mataivalu ni Georgia kei na ilala era saqata na matanitu, qai sotavi kina e levu na ka dredre.

Gizo: Au papitaiso niu yabaki 21, oti ga e dua na yabaki sa qai tekivu na ivalu. Dua na ka nodra rere na mataveitacini ena gauna qori, era sega ni kila mera vunau vakacava. E baci cakava o Igor na nona itavi vakaivakatawa qai vakayaloqaqataki keimami ena nona kaya: “Qo na gauna meda vakacegui ira  kina na lewenivanua. Meda vunau meda rawa ni kaukaua tiko ga vakayalo.” Keimami sa qai qaseqasetaka toka e veisiga na neimami vakacegui ira na lewenivanua ena itukutuku vakaivolatabu.

Igor: Gauna e tekivu kina na ivalu, sa vinakati me keimami muria e dua na gaunisala vou me lai kau mai kina e Jvari na ivola. Niu susu ena yasayasa qo, au kila kina eso na vanua e rawa ni muri ena veiteitei kei na ulunivanua. Ia sega ni kena ibalebale qori nira sega ni rawa ni yaco yani e keri na ilala era vakaiyaragi. E leqataki tale ga de bulu tu ena veivanua ya na gasaukuro. Au nanuma meu dau lako taudua ga e veivula niu sega ni via vakaleqai ira na mataveitacini. Ena veivuke i Jiova, e sega vakadua ni leqa na keimami kakana vakayalo qai veivuke vakalevu qori ena neimami kaukaua tiko ga vakayalo.

A sega ni yaco na ivalu e Tkvarcheli, ia keimami sotava e levu na ka dredre ni sa caka tale ga na sogo gaunisala ena neimami tauni. Keimami lomaleqa ni sa voleka tiko na vulaililiwa, sa lailai tale ga na kakana. Dua na ka neimami marau nira sa vakarautaka tu eso na ka na mataveitacini mai Jvari mera vukei keimami kina!

Gizo: E kerei ratou na noqu vuvale o Igor ke rawa ni lai maroroi tiko e vale na kakana, me qai wasei tiko mai kea vei ira na mataveitacini. Sa nanuma tiko o Igor me lai kau iyaya mai Jvari. Dua na ka neimami leqataki koya ni levu na vanua e yadravi tu, e rawa ni sotavi ira tale ga na ilala era vakaiyaragi kei ira na daubutako.—Joni 15:13.

Keimami marau ni lesu bula mai o Igor ni oti e vica na siga, na kakana e kauta mai keimami sa rawa ni kana toka kina me vica na vula! Keimami vakadinadinataka ena gauna dredre qori ni sega ni seavu na loloma dina vaKarisito.—1 Kor. 13:8.