Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 GEORGIA

“E Rawarawa Vua na Kalou na ka Kece”

Natela Grigoriadis

“E Rawarawa Vua na Kalou na ka Kece”
  • SUCU 1960

  • PAPITAISO 1987

  • KENA ITUKUTUKU A veivuke vakalevu ena tabaivola a caka tu vakavuni ena gauna ya ni oti ga nona papitaiso.

GAUNA keimami se soqoni kina ena veiyabaki ni 1980, a se volai ga Na Vale ni Vakatawa e vulici qai vakayagataka na ilavelave qori o koya e taura na vuli. Keirau veitalanoa sara kei na dua na qase ni ivavakoso o Genadi Gudadze, au qai vakatututaka vua me keimami tabaka ga na neimami mekesini.

A se vakayagataki voli ena gauna ya na misini ni tabaivola e vakatokai na mimeograph, ia e taba rawa ga e vica na ivola. E vinakati e dua na misini vou ni tabaivola, dua na misini ni taipa kei na kena pepa, me dua tale ga na dautaipa totolo me rawa ni tabaki wasoma na mekesini. E leqa ga ni iyaya kece ni tabaivola wili kina na pepa e dodonu me kerei ina matanitu qai yadravi vinaka tu na kena veisoliyaki.

A solia vei au na misini ni taipa e dua na noqu itokani e kila na vanua e rawa ni kau mai kina eso na misini va ya, qai sega ni gadrevi me kerei ina matanitu. E rawa ni vukei keitou ena taipa o taciqu. Era cakava sara na mataveitacini e dua na misini vou,  sa ra raica rawa tale ga na vanua me voli kina na pepa. E toso vinaka na vakavakarau, oti ga vakalailai sa taba rawa sara na imatai ni ilavelave ni Vale ni Vakatawa vakaGeorgia.

Ia e tukuna vei au ena dua na siga o Genadi: “Me vaqarai e dua tale na vanua e voli kina na pepa.” Sa raica toka o Genadi eso na pepa ena dua na valenivolavola ni matanitu, ia e sega ni rawa ni volia nira tu e kea na yadra. Ena voli mada vakacava na pepa? Au vuki tukuna tiko ga, ‘Sa sega tu ga ni rawa!’ Ia e kaya vei au o Genadi: “Kua ni kaya tiko sa ‘sega tu ga ni rawa.’ ‘E rawarawa vua na Kalou na ka kece’!”—Maciu 19:26.

Au vakasamataka tiko ga na vosa qori niu gole ina valenivolavola ni matanitu ena siga tarava. A qai vagolei au o Jiova vua e dua na marama yalovinaka, e kaya ni na vakauta na noqu kerekere vua na boso. A boso tiko e kea o watina! Me tekivu mai na siga ya, au sa voli pepa tu ga mai na valenivolavola ya. Sega tale ni dua na leqa keitou sotava me baleta na voli ni pepa.