Raica sara na lewena

Raica na lewenivola

 GEORGIA

O tu Mada Mai Vei?

Artur Gerekhelia

O tu Mada Mai Vei?
  • SUCU 1956

  • PAPITAISO 1991

  • KENA ITUKUTUKU Ni oti ga e walu na vula nona papitaiso, e biuta nona vale kei na bisinisi me lai veiqaravi ena vanua e vinakati kina vakalevu na veivuke.

NI OTI ga noqu papitaiso, eratou tarogi au na qase keu via vakarabailevutaka noqu cakacaka vakaitalatala. Au mani tiko ena dua na bose lavotaki ena ika4 ni Me 1992, me baleti ira na via veiqaravi ena vanua e vinakati kina vakalevu na veivuke. Ena siga tarava ga, keirau toki kei na noqu itokani i Batumi ena yasayasa o Ajaria.

Au taqaya ena imatai ni gauna au vunau kina e Batumi. Au veinanuyaka, ‘Au na vosa vakacava vei ira na tamata?’ Au kurabui ni tarogi au tale mai na imatai ni marama au sotava: “O tu mada mai vei?” Dua na ka nona via kila e levu na ka me baleti ira na iVakadinadina, mani vulica sara na iVolatabu ena siga tarava!

Ni bera ni keirau lako i Batumi, a soli vei keirau na yaca ni nodra itikotiko na tataleitaki. Keirau sega ni kila vinaka na korolevu, keirau mani vakatataro vei ira na tu e gaunisala.  Era sega ni sauma rawa e levu na neirau taro ni se qai vakayacani vou ga eso na gaunisala, ia era taleitaka na itukutuku keirau vunautaka. Toso na gauna keirau sa vuli iVolatabu kei na le 10 ina 15 ena dua ga na gauna.

Ni oti ga e va na vula neirau yaco yani, sa ra tiko ena soqoni e le 40 vakacaca. Keirau veinanuyaka, ‘O cei ena qaravi ira na ka vovou qo?’ Oti ga vakalailai era toki kece i Batumi o ira keimami dau ivavakoso vata tu, nira sa tekivu veivala na mataivalu e Georgia kei ira na saqata na matanitu. E tauyavutaki ena dua ga na siga na ivavakoso vou sa tu rawa na kena qase kei na painia era matua vakayalo!