Raica sara na lewena

Raica na lewenivola

 GEORGIA

Nuitaka na Veidusimaki i Jiova

Tamazi Biblaia

Nuitaka na Veidusimaki i Jiova
  • SUCU 1954

  • PAPITAISO 1982

  • KENA ITUKUTUKU A veivuke ena tabaivola a caka tu vakavuni ena gauna ya. A susugi ratou voli e va na luvena, qai veiqaravi vakaivakatawa dauveilakoyaki ena gauna vata qori.

DUA na ka na cudru nei Na ni keirau sa iVakadinadina i Jiova kei na watiqu o Tsitso. A kacivi ira kece mai na wekai keitou ena dua na siga o Na, e nanuma mera vosa vei au meu kua ni veimaliwai kei ira na iVakadinadina. Oti sa qai tukuni keu sega ni veisautaka noqu vakasama, era na sega ni via kilai au tale na wekaqu.

Na ka ga e lako mai na noqu vakasama meu sa toki ina dua tale na tauni. Au dua na matai ni kaukamea, au mani nanuma meu toki i Kutaisi dua na korolevu e Georgia, ni na rawarawa e kea na cakacaka. Au kerea sara na veidusimaki i Jiova niu rogoca ni vinakati vakalevu ena korolevu ya na dautukutuku.

Keirau sota ena dua na siga kei na noqu vuli iVolatabu e tiko ena tauni o Jvari. Ni rogoca niu via toki i Kutaisi, a kerea sara meu toki ina tauni e tiko kina. A kaya vei au: “E rua tu na neitou rumu. Keitou rawa ni tawana vakaveitamani e dua na rumu, drau qai tawana vakaveiwatini e dua tale na rumu.”

 Au se waraka tiko na macala ni noqu kerea na veidusimaki i Jiova. Au mani tukuna vua na noqu vuli iVolatabu niu na rawa ni lai tiko vakalekaleka e Jvari, keu kunea totolo e dua na cakacaka kei na vale. Dua na ka noqu kurabui ni mai vakaraitaka vei au ena siga tiko ga ya ni sa rawa toka e vica na cakacaka.

Oti ga e vica na siga keirau toki i Jvari. A soli vei au e dua na cakacaka e sau vinaka, a solia tale ga vei au noqu boso e dua na vale ni kabani meu tiko kina. Au a kerei ena dua na gauna meu veivuke ena kena tabaki vakavuni eso na ivola vakaivolatabu. Keirau mani yalorawarawa vakaveiwatini me caka qori e vale ni levu tu na kena rumu.

Ni vakacirigalala na neirau vale, e vica vata na yabaki na kena vakayacori tu kina na iVakananumi kei na so tale na soqo lavotaki. Era papitaiso tale ga ena neirau itikotiko e sivia na 500! Au marau dina niu a muria na veidusimaki i Jiova!