Raica sara na lewena

Raica na lewenivola

Dua na vanua era dau vunau kina na mataveitacini e Khulo

“Qo na Nodra iVotavota na Dauveiqaravi i Jiova.”—Aisea 54:17.

“Qo na Nodra iVotavota na Dauveiqaravi i Jiova.”—Aisea 54:17.

“Qo na Nodra iVotavota na Dauveiqaravi i Jiova.”Aisea 54:17.

E VAKALOUGATATAKA o Jiova na nodra gugumatua ena cakacaka vakavunau na tacida e Georgia. E rawa ni tukuni ni sa roboti Georgia taucoko na itukutuku vinaka.

Vakarau vunau na dautukutuku ena veiulunivanua e Ushguli

Ena vica na yabaki tiko ga qo, era kauaitaka vakalevu na dautukutuku gugumatua kei na painia na yalava e sega ni dau tarai wasoma. Eso na koro era tu sara ena  veiulunivanua, qai tiko ga na lori e rawa ni gole kina se vakayagataki eso tale na sala ni veitosoyaki.

Dautukutuku ena yasayasa o Svaneti

A vakauta ina ivavakoso kece na valenivolavola ni tabana e Georgia ena 2009 na lisi ni yalava e sega ni dau tarai wasoma. Era sureti tale ga na dautukutuku mera veitokoni ena vunau. Ia e vinakati na sasaga me vakayacori kina na cakacaka qori.

Ana kei Temuri Bliadze

Erau se qai volia oti ga e dua na qele me tara kina nodrau vale e dua na veiwatini vou o Temuri kei Ana Bliadze. Erau rogoca sara ni vinakati vakalevu na veivuke ena veiulunivanua e Ajaria. Erau kila ni qo e dua na sala rau na vakarabailevutaka kina nodrau cakacaka vakaitalatala.

Erau mani gole ena yasayasa vakaAjaria. Ni oti e dua na macawa nodrau tiko e kea, e kaya o Temuri: “Era dau taubale na dautukutuku ina veikorokoro. Au nanuma kina ni na yaga sara vakalevu ena yalava ya na neirau lori.”

E kaya o Ana: “E sega ni rawarawa na toki ni keirau sa veivolekati kei ira na lewe ni neirau ivavakoso e liu, era tu tale ga kina na wekai keirau. Ia keirau vakadinata na veivakalougatataki i Jiova.” Sa tolu vakacaca na yabaki nodrau veitokoni tiko o Temuri kei Ana ena iwasewase lailai o Keda, dua na tauni ena yasayasa vakaAjaria.

Painia Gugumatua

Era lesi eso mera painia lavotaki vakalekaleka, qai vakilai vakalevu na yaga ni nodra veivuke ena veivanua tu yawa. Ni oti na gauna e soli mera qarava kina nodra ilesilesi, era vakatulewataka e levu na painia  mera tiko ga ena vanua era lesi kina nira nanumi ira na nodra vuli iVolatabu.

Erau lesi me rau lai painia ena tauni totoka o Manglisi e rua na tacida yalewa na yacadrau ruarua o Khatuna. E se sega ena vanua ya na iVakadinadina, qai vuavuaivinaka nodrau cakacaka vakaitalatala na tacida yalewa. Erau tauyavutaka e 9 na vuli iVolatabu ena imatai ni vula, 12 na ikarua ni vula, 15 na ikatolu ni vula, oti sa lai 18 sara na vuli iVolatabu! Erau vakatulewataka me rau tiko ga e Manglisi me rawa ni tomani tiko ga na vuli iVolatabu.

E vinakati me rau cakava na tacida yalewa qo eso na ka me rau bula tiko kina e veisiga. Era kenadau na lewenivanua e Manglisi ena kena vakasaqari e dua na ka e vaka na jamu, ia e caka mai na vua ni paini qai tukuni ni rawa ni bulabula vinaka kina e dua. Qori e  dua nodrau ivurevure ni ilavo na painia, erau dau lai tomi vua ni paini vou me lai volitaki ena makete. Ia rau qai kunea e dua tale na ivurevure ni ilavo.

A kauta yani vei rau eso na luvenitoa e dua na vuli iVolatabu. E tukuna o gonevuli ni sega ni kila ni a vakalutu yaloka e dua na tinanitoa, e kidacala ena dua na siga ni sa kauti ira yani na luvena o tinatina. Sa levu tu na nona toa, e mani nanuma me solia vei rau na painia na luvenitoa. E kila toka na susu toa e dua vei rau na painia, rau mani nanuma me sa dua nodrau banitoa me veivuke ena nodrau bula e veisiga.

E kaya e dua vei rau na tacida yalewa: “A rawa ni keirau tiko e Manglisi me lima na yabaki ena veivuke i Jiova, nodra veivuke na mataveitacini kei na vuli iVolatabu.” Sa dua toka na iwasewase lailai ena tauni ya ra qai gugumatua na mataveitacini.

Khatuna Kharebashvili kei Khatuna Tsulaia e Manglisi

Yalava e Duatani na Kena Vosa

Era gole i Georgia ena dua na gauna lekaleka sa oti e levu mai vanuatani. Era vakabauta e levu na painia ni sa tadola e dua tale na yalava vou ni vunau. Era mani vulica eso tale na vosa me vaka na vosa vakaArapea, vakaAzerbaijan, vakaJaina, vakavalagi, vakaPerisia, kei na vosa vakaTaki.

Levu na painia era toki ina iwasewase se ivavakoso e duatani na kena vosa, eso tale era toki ina vanua e vinakati kina vakalevu na veivuke. Erau se yabaki 20 vakacaca o Giorgi kei Gela ena gauna erau toki kina ena dua tale na vanua e tiko tikivi Georgia. E kaya o Giorgi ni rau marautaka nodrau toki ni rawa ni rau qaravi Jiova kina ena nodrau vinaka taucoko.

 E kaya o Gela: “Levu sara na ka au vulica me baleta na itavi ni qase ni ivavakoso niu veiqaravi voli ena dua na vanua va ya. Dua dina na ka totoka me vakayagataki iko o Jiova mo vukei ira na nona ‘sipi lalai.’”Joni 21:17.

E tomana o Giorgi: “E sotavi eso na ituvaki dredre, ia keirau sega ni veivutunitaka e dua na ka ni keirau sa rui ogaoga ena neirau veiqaravi. Keirau kila ni keirau cakava tiko ga na ka e dodonu me keirau cakava.”

A lai veiqaravi e Taki me vica na yabaki e dua na tacida tagane, na yacana tale ga o Gela. E kaya: “Au sega soti ni marautaka noqu veiqaravi ni se qai tekivu, ni dredre noqu vulica na vosanivanua. Ia au sega ni tukuna rawa na levu ni noqu marau niu sa kila na kena vosa, au sa rawa ni veivosaki kei ira na mataveitacini kei ira ena yalava.”

Dua tale na tacida yalewa o Nino, sa tini toka vakacaca na yabaki nona painia e Istanbul, Taki. E kaya: “Au sa tekivu vakila sara ga na veitokoni i Jiova mai na siga au toki kina. Ni o painia ena yalava e duatani na kena vosa, o rawa ni sotava e veisiga na veika marautaki ‘e dau talanoataki ena iVolaniyabaki.’