Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Koronivuli ni Cakacaka Vakapainia volekati Zugdidi

 GEORGIA | 1998-2006

Veivakalougatataki “ena Gauna Vinaka kei na Gauna Ca.”—2 Tim. 4:2.

Veivakalougatataki “ena Gauna Vinaka kei na Gauna Ca.”—2 Tim. 4:2.

 ME TEKIVU mai na veiyabaki ni 1990, e tubu na kedra iwiliwili na dautukutuku kei na tataleitaki e Georgia. Era tiko tale ga ena iVakananumi ni mate i Jisu ena 1998 e le 32,409.

Era se vou ena dina e levu na dautukutuku kei na qase ni ivavakoso, qai lailai na nodra kila. Ena vinakati mera vakavulici ena ka e vauca na cakacaka vakavunau kei na ituvatuva ni isoqosoqo. Ia era na vakavulici vakacava?

Veitokoni na iSoqosoqo i Jiova

Erau vuli ena Gilead Extension School mai Jamani o Arno kei Sonja Tüngler rau qai lesi i Georgia ena Maji, 1998. A vakadonuya tale ga na iLawalawa Dauvakatulewa ena yabaki qori me dua na valenivolavola e Georgia, ia ena vakarurugi ina valenivolavola ni tabana e Rusia.

A tauyavu e dua na Komiti ni Vanua me qarava na cakacaka vakavunau. Gauna e vakadonui kina vakalawa na cakacaka, sa qai vakauta yani na ivola vakaivolatabu na valenivolavola e Jamani. Na veivakadonui vakalawa qori e vakarawarawataka tale ga na voli ni tikiniqele me tara kina na Vale ni Soqoni kei na valenivolavola ni tabana.

Gauna ni Veivakavulici

A vakatabui tu na cakacaka donuya na veiliutaki ni matanitu makawa na Soviet, era sega ni rawa kina ni vunau e veivale na dautukutuku. E nanuma lesu o Arno Tüngler: “Levu na dautukutuku era dau vunau e salatu,  ia era sega ni matau ena vunau e veivale kei na nodra sikovi na tataleitaki.”

Arno kei Sonja Tüngler

E kaya o Davit Devidze dua vei ira na veiqaravi ena valenivolavola vou ena Me, 1999: “E levu sara na cakacaka e tu me caka e Peceli kei na yalava. E levu na ka keimami sa wilika, ia keimami sega ni kila me muri vakacava. Keimami saga kina me keimami vuli vei ira na mataveitacini matua e talai ira yani na iLawalawa Dauvakatulewa.”

Era vuli kece na mataveitacini e Georgia kei ira era gole yani mera lai veivakavulici. (Vkai. 27:17) E levu sara na ka era vulica vei ira na mataveitacini e Georgia o ira na lai veivuke e kea.

Nodra iTovo Talei na Mataveitacini

Erau se nanuma vinaka tu o Arno kei Sonja na nodra veikauaitaki na mataveitacini ena gauna rau yaco yani kina e Georgia. Era veivuke vakalevu ena nodrau sasaga me rau vakamatauni rau ena nodrau ilesilesi vou.

 E kaya o Sonja me baleta nodra lomasoli na mataveitacini: “Erau dau kau kakana yani vei keirau e dua na veiwatini rau toka voleka. Dua na tacida yalewa e dau kauti keirau ena cakacaka vakavunau, vakaveikilaitaki keirau ena ivavakoso, qai vakamacalataka vei keirau e levu na ivakarau vakavanua e Georgia. E dua tale na tacida yalewa e vukei keirau ena vosa vakaGeorgia.”

Erau lesi tale ga i Georgia ena 1999 e dua na veiwatini mai Kenada o Warren kei Leslie Shewfelt. Erau kaya: “Keirau qoroya qai tarai keirau vakalevu na nodra itovo na mataveitacini e Georgia. Dua na ka nodra veikauaitaki kei na nodra veilomani na gone kei na qase.”

Mataveitacini e Georgia kei na daukaulotu era veiqaravi ena valenivolavola

O ira na lesi i Georgia era sega ni kauaitaka na veika dredre era sotava, era kauaitaka ga vakalevu nodra itovo vinaka na mataveitacini. Era taleitaka tale ga na mataveitacini e Georgia na nodra yalomalumalumu kei na  nodra yalololoma na daukaulotu era lai veiqaravi yani.

Taleitaki na Ka Dina

Era taleitaka e levu na ka dina ena veiyabaki ni 1990, ra qai papitaiso ena 1998 e le 1,724. Na cava era taleitaka kina e levu na ka dina?

E vakamacalataka o Tamazi Biblaia a veiqaravi tu vakaivakatawa dauveilakoyaki ena dua na gauna balavu: “E kena ivakarau e Georgia mera vakavulici na lewenivanua mera lomana na Kalou. Ni wasei gona vei ira na itukutuku mai na iVolatabu, e rawarawa sara nodra ciqoma.”

E kaya o Davit Samkharadze e dau veivakavulici ena Koronivuli ni iTalatala ni Matanitu: “Ni tekivu vulica na iVolatabu e dua, era dau saga na wekana se o ira na tiko veitikivi me tagutuva nona vuli. E levu na dauveitusaqati qori era tini vulica tale na iVolatabu!”

E tete na itukutuku ni Matanitu ni Kalou ra qai veisautaka na nodra bula e levu. Dua tale na tubu e rawati ena Epereli, 1999, nira tiko ena iVakananumi e le 36,669.

“E Levu na Dauveitusaqati”

E vola o Paula me baleta nona cakacaka vakavunau e Efeso: “Sa dola tu qo e mataqu e dua na katuba levu ni cakacaka, ia e levu na dauveitusaqati.” (1 Kor. 16:9) Era vakadinadinataka na vosa i Paula na iVakadinadina e Georgia ni oti toka ga na iVakananumi vakairogorogo ena 1999.

Era soqoni vata ena Okosita 1999 e dua na ilawalawa e Tbilisi ra qai vakama na noda ivola. E liutaka na ilawalawa  qori e dua na bete ni lotu Orthodox sa vakacegui o Vasili Mkalavishvili. Sa tekivu sara ga e keri na veitusaqati qai va na yabaki na kena dede.

A tekivu ena 1999 nodra tusaqati, buturaki, kei na vakamai ni nodra ivola na iVakadinadina i Jiova e Georgia

Ena nodra veivakabukani eso na lewenilotu ena ika17 ni Okotova, 1999, era lai vakacaca kina e le 200 ena soqoni ni ivavakoso o Gldani mai Tbilisi. Era mokuti ira na tiko ena soqoni ena kau kei na kaukamea. E vica vei ira na iVakadinadina era kau sara ga i valenibula.

Era sega ni totogitaki na dauvakacaca, qai sega ni cegu nodra vakacacani na iVakadinadina. Era sega ni duavata e levu na vakailesilesi vakamatanitu ena veika e yaco wili kina na peresitedi o Shevardnadze, ia era sega ni cakava e dua na ka. Levu na gauna era dau yaco yani na ovisa nira sa biubiu makawa na dauvakacaca.

A bukana o Guram Sharadze e dua na lewe ni palimedi e Georgia mera vakaucacataki na tacida. E kaya nira vakarerevaki na iVakadinadina. E nanumi ga ni sa oti na “gauna vinaka” ni kena vunautaki na itukutuku vinaka.

Veivuke ni iSoqosoqo i Jiova

E yavala totolo na isoqosoqo i Jiova me vukei ira na iVakadinadina e Georgia. Era dusimaki na mataveitacini ena ka mera cakava ke ra tusaqati. Era vakadreti tale ga ena vuna e bibi kina meda vosota na veitusaqati na lotu vaKarisito dina.—2 Tim. 3:12.

E kauta tale ga na isoqosoqo i Jiova ina mataveilewai na leqa era sotava tiko na mataveitacini. E nanuma lesu e dua na tacida tagane a veiqaravi voli ena Tabana Vakalawa ena valenivolavola ni tabana e Georgia: “Ena loma ni va na yabaki, e sivia e 800 na kudru e kau ina  mataveilewai me baleti Vasili Mkalavishvili kei na nona ilala. Keitou kerea nodra veivuke na vakailesilesi kei na so tale na isoqosoqo era rawa ni veivuke ena ka e vauca na dodonu ni lewenivanua. E kaburaka na itikotiko liu ni iVakadinadina i Jiova na veika era sotava tiko na mataveitacini e Georgia me rawa ni kilai, ia e sega ni tarova qori na veitusaqati.” *

^ para. 30 Ena ikuri ni ivakamacala me baleta na veilewai e valataki kina noda dodonu, raica na Awake! ni 22 Janueri, 2002, tabana e 18-24.